Замест звалкі – на канвеер. Пад Гродна пачаў працу завод па сартаванні смецця
Завод па ўтылізацыі і механічным сартаванні адходаў адкрылі 14 сакавіка. Да гэтага прадпрыемства некалькі месяцаў працавала ў тэставым рэжыме. Зараз усё смецце з горада, а гэта каля 120 тысяч тон штогод, будзе папярэдне сартавацца для выдзялення другаснай сыравіны з адходаў.
Гродзенскі завод першае прадпрыемства такога кшталту ў рэгіёне. Плануецца, што пазней у вобласці з’явяцца яшчэ два аналагічных аб’екты — у Лідзе і Ваўкавыску.
Заля папярэдняга сартавання смецця. Згружаныя з аўтамабіля адходы загружаюцца ў прыёмныя бункеры
Асноўнае прызначэнне завода – запаволіць запаўненне палігона цвёрдых бытавых адходаў, што месціцца ў 17 кіламетрах ад Гродна, каля вёскі Рагачы. Ён быў адкрыты ў 2004 годзе і разлічаны на 2,5 млн тон смецця. На сёння тут захавана ўжо 2,1 млн тон. Калі б адходы не сартаваліся і надалей, ён бы запоўніўся праз тры гады. Праца завода дазволіць карыстацца выдзеленымі плошчамі ўтрая даўжэй.
Пра тое, што завод даўно быў неабходны гораду, казаў у сваім выступе і старшыня гарвыканкама Мечыслаў Гой. «Гродна заўжды вылучаўся чысцінёй і ўтульнасцю, а з пускам гэтага прадпрыемства стане яшчэ чысцейшым. Уся сістэма збору, сартавання і перапрацоўкі смецця будзе дзейнічаць па-новаму».
Старшыня гарвыканкама, Мечыслаў Гой
Каб вырашыць праблему смецця комплексна, у Гродне не толькі пабудавалі завод, але і ўсталёўваюць кантэйнерныя пляцоўкі для раздзельнага збору смецця, абнавілі транспарт для яго вывазу. Таксама Мечыслаў Гой адзначыў, што адначасова з развіццём новай сістэмы абыходжання з адходамі будуць скарачацца старыя метады — смеццеправоды ў дамах будуць выводзіцца з эксплуатацыі.
Каб сістэма перапрацоўкі адходаў працавала комплексна, закуплена 54 новых смеццявозы і 30 тысяч кантэйнераў для раздзельнага збора смецця
Новы завод гэта яшчэ і новыя працоўныя месцы. Калі прадпрыемства выйдзе на запланаваны трохзменны рэжым працы, тут будзе занята больш за 200 чалавек.
Прапановы вакансій для працы на заводзе па ўтылізацыі і механічным сартаванні смецця. Інфармацыя са старонкі job-by.info
У бліжэйшы час, для забеспячэння двухзменнага рэжыму, на заводзе атрымаюць працу каля 60 чалавек
Незважаючы на сучасную тэхніку, на сартаванні адходаў шмат ручной працы. Смецце з аўтамабіляў выгружаецца наўпрост на падлогу ў залі папярэдняга сартавання. Тут рабочыя адбіраюць вялікія прадметы.
Заля папярэдняга сартавання. Тут пачынаецца вытворчы шлях прывезенага з горада смецця
Пасля гэтага смецце загружаецца ў прыёмныя бункеры і праходзіць праз сістэму разрывання пакетаў.
У грохатах адбываецца разрыванне пакетаў для раўнамернай падачы смецця на стучку транспарцёра
Пасля бункера адходы падаюцца ў першую кабіну сартавання, дзе працуюе па 4 чалавекі на кожнай ленце. Яны аддяляюць веташ і шкло. Кожная лінія можа прыняць 15 тон адходаў за гадзіну.
У першай кабіне сартавання аддзяляюць шкло і веташ
Астатняе смецце па транспарцёрнай стужцы падаецца ў грохаты — сістэмы сітаў, дзе аддяляюцца харчовыя адходы, якія ідуць на захараненне. З таго, што засталося, выбіраюць метал, пластык і паперу.
Далей са смецця выбіраюць другасную сыравіну — пластык, паперу і метал
Адсартаванае смецце паступае ў прэсы і пакуецца.
Адабраныя пластыкавыя бутэлькі сартуюцца па колерах. Такім чынам падрыхтавныя адходы можна прадаць на перапрацоўку па 200 € за тону. Несартаваны пластык каштуе каля 40 рублёў
Спецыялістка па развіцці гарадской інфраструктуры Сусветнага банка Клемена Іонкава выказала спадзяванні на паспяховую працу прадпрыемства і далейшае супрацоўніцтва.
Паводле hrodna.life