«За тое, што не змірылася». Двойчы асуджанай за «палітыку» айцішніцы прызначылі «хатнюю хімію»

17 сакавіка суд Заводскага раёна Мінска разгледзеў справу палітзняволенай Марыны Неўдах. Дзяўчыну абвінавачвалі ў здзяйсненні злачынства паводле ч. 1 арт. 342 («Арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх»).

Марыне Неўдах 37 гадоў, паведамляюць праваабаронцы. Паводле адной з адукацый яна журналістка. Паспела стаць нават кандыдаткай тэхнічных навук. З 2015 года працавала ў EPAM тэсціроўшчыцай праграмнага забеспячэння. Разам з мужам выхоўвала дваіх дзяцей, якім на момант яе затрымання было 9 і 11 гадоў.

Вядома, што ў 2020 годзе Марыну двойчы затрымлівалі і судзілі паводле адміністрацыйных артыкулаў 23.34 («Парушэнне парадку арганізацыі ці правядзення масавых мерапрыемстваў») і 23.4 («Непадпарадкаванне законнаму распараджэнню ці патрабаванню службовай асобы пры выкананні ёю службовых паўнамоцтваў»). Абодва разы жанчыну каралі штрафамі.

Праз падазрэнне ў здзяйсненні крымінальнага злачынства паводле ч.1 арт. 342 жанчыну арыштавалі 16 снежня 2021 года. Прыйшлі проста дадому. Праверылі тэлефон, зладзілі ператрус, затрымалі на вачах у дзяцей і павезлі спачатку ва УСК па Мінску, а потым на Акрэсціна, дзе стварылі для яе невыносныя ўмовы знаходжання. Вельмі хутка ў жанчыны пахіснулася здароўе і яна захварэла.

Пазней Марыну перавялі ў СІЗА-1 на Валадарскага, дзе і пратрымалі да суда.

29 снежня 2021 года праваабарончая супольнасць прызнала Марыну Неўдах палітзняволенай з патрабаваннем неадкладна вызваліць яе з-пад варты.

Падрабязнасцяў з залы суда зусім няма. Але, мяркуючы па звестках ад крыніц, блізка знаёмых з гісторыяй Марыны, можна казаць пра тое, што, па сутнасці, усе тры разы жанчыну судзілі за тое, што пасля абвяшчэння вынікаў выбараў-2020 яна не змагла з імі змірыцца і гэтак жа, як і тысячы іншых беларусаў, выяўляла сваю нязгоду словам і справай. За што і апыналася на лаве падсудных.

17 сакавіка суд Заводскага раёна Мінска прызнаў Марыну Неўдах вінаватай у здзяйсненні злачынства паводле ч. 1 арт. 342 і прызначыў ёй абмежаванне волі без накіравання ў папраўчую ўстанову адкрытага тыпу тэрмінам на тры гады плюс штраф, дакладны памер якога пакуль невядомы.