Як «ціхары» сочаць за сям'ёй Рамана Бандарэнкі

Еўрарадыё расшыфравала аўдыязапіс паміж ціхарамі, якія сачылі за членамі сям'і Рамана Бандарэнкі.

Смерць Рамана Бандарэнкі беларускія сілавікі выстаўляюць як простую "бытавуху". "Кожны дзень адбываюцца дзясяткі такіх інцыдэнтаў", — сказаў галоўны інспектар па Мінску Аляксандр Барсукоў.
У той жа час сваякі Рамана заўважылі сочку за сабой. Прычым вельмі шчыльную: "За намі сачылі не менш за 20 чалавек, людзі ў цывільным стаялі на кожным паверсе крамы, — расказала TUT.by Вольга Кучарэнка, стрыечная сястра Рамана Бандарэнкі, пра паездку 17 лістапада ў гандлёвы цэнтр па касцюм для пахавання. — Мы не ведаем, для чаго гэта робіцца".
Днём 18 лістапада ў тэлеграм-канале "Мотолько, помоги!" з'явіўся шматгадзінны аўдыязапіс перамоў паміж сілавікамі. Па версіі аўтараў канала, людзі на запісе размаўляюць менавіта ў працэсе сочкі за сям'ёй Бандарэнкі. Сапраўднасць запісу ўскосна пацвярджаецца тым, што на ім абмяркоўваецца тая самая паездка ў ГЦ, пра якую незалежна ад Матолькі расказала Вольга Кучарэнка.

Павярнулі. Прымайце

Каля 14:15 "назіральнікі" працуюць як звонку ГЦ Dana Mall, так і ўнутры будынка. У ліку тых, хто размаўляе, — не толькі мужчыны, але і як мінімум адна жанчына.
Адна машына сілавікоў, пакуль сваякі Рамана была ўнутры, праязджае па праспекце ў бок Уручча, іншая займае пазіцыю на вуліцы Каліноўскага. "Назіральнікі" абмяркоўваюць перамяшчэнне сваякоў Бандарэнкі па гандлёвым цэнтры і іх далейшы маршрут.
— Хто за руль сеў?
— Жонка [ў Бандарэнкі не было жонкі. — Еўрарадыё] за руль села.
— Ва ўсім чорным апранутая?
— Так-так-так, не жонка, сястра. Маладая жанчына, цёмныя валасы — за рулём... Жанчына ў белай куртцы ззаду.
Калі машына са сваякамі пад'язджае да выезду на праспект, гучыць наступнае:
— Павярнулі. Прымайце.
Мяркуючы па запісе, машына са сваякамі едзе ў бок МКАД. Тут па запісе можна зразумець, што ціхары, якія перамаўляюцца, не ведаюць, хто першапачаткова на якой машыне ездзіць.
— Ваван, а ты ў "кія" ці ў "рэно" таксама катаешся?
— У "шкодзе".
Перыядычна яны губляюць адно аднаго з-пад увагі:
— Вы машыны нашых калег бачыце?
Крыху пазней:
— Чыя карычневая "джылі"?

У морг — значыць, у морг

Адна з брыгад ціхароў, мяркуючы з усяго, ненадоўга страціла з-пад увагі машыну са сваякамі Рамана.
— Туды ў бок Навінак паехала тачка падобная.
— Дагонім.
[…]
— Давай у Навінкі... Там нейкі ёсць морг.
— На Даўгінаўскім, злева псіхіятрычны, а насупраць морг.
— Я ў курсе.
Мяркуючы па запісе, сваякі сапраўды заходзілі ў морг Дзяржаўнай службы судовых экспертыз, які якраз знаходзіцца на Даўгінаўскім тракце.
— Яны адзенне павінны былі аднесці. Сяструха сядзела ў машыне, і цяпер яны павінны паехаць у Генпракуратуру, — кажа адзін.
Адкуль назіральнікі ведаюць пра планы сям'і? Адкрыта паміж сабой гэта ціхары не абмяркоўваюць.
— Інструктажы атрымалі? — пытаецца ў пэўны момант адзін.
— Атрымалі.

Напэўна, на "Рокасы"

Большая частка перамоў прысвечана маршруту перамяшчэнняў. Гучаць тапонімы: вуліца Арлоўская, праспект Пераможцаў, вуліца Леніна і іншыя. Узнікае ў размове і "цэнтральная база". Таксама ў дыялогу ціхары згадваюць слова "карагоды" — мяркуючы з усяго, так сілавікі называюць сочку.
Раптам сваякі Бандарэнкі разварочваюцца і едуць не да Генпракуратуры, а ў бок стадыёна "Дынама". Ціхары гэтым вельмі здзіўлены.
— Яны, можа, не ў Генпракуратуру, а ў Следчы камітэт хочуць, б**дзь?
Але сям'я едзе і не туды: яны едуць па вуліцы Першамайскай, у той жа час іншая (магчыма, новая) "брыгада" выварочвае на вуліцу Ванеева.
— Па кальцы шча павольна [едуць. — Еўрарадыё], напэўна, на "Рокасы" хочуць... Так, пайшлі на Ракасоўскага.
— Добра, падцягваем.

Куртка ніжэй д*пы

Нарэшце, сваякі Бандарэнкі дабіраюцца да сваёй мэты. Ціхары паміж сабой абмяркоўваюць: пакуль "аб'екты" на вуліцы, яны выходзіць з машын не павінны.
Да сваякоў выходзіць хтосьці: як мяркуюць "назіральнікі", адвакат. Апісваюць: чалавек высокі, зялёная куртка. Далей ён зноў з'явіцца ў абмеркаванні, але куртка ператворыцца ў "балотную" або "нават карычневую".
— Дзімон, а куртка такая, ніжэй д*пы, так? — пытаецца адзін, але адказу не атрымлівае.
Праз некаторы час сваякі зноў садзяцца ў машыну і рухаюцца ў бок выезду. За імі — ціхары.
— Аператыўна максімальна, каб нас не пафоткалі! — кажа адзін.

Піца "па вушах"

Працягваецца абмеркаванне маршрутаў сям'і. Гучыць фраза пра тое, што яны "па вушах нейкую піцу заказвалі". Магчыма, "па вушах" азначае, што сваякоў і праслухоўваюць.
Нарэшце, каля 17:00 машына са сваякамі набліжаецца да Генпракуратуры. У гэтым месцы запіс перарываецца.