Хронікі рэпрэсій у Беларусі за 12 снежня

Агляд галоўных навін краіны за сённяшні дзень.

Генпракуратура агучыла падрабязнасці «справы TUT.BY». Паводле «беларускай феміды», журналісты выдання давалі «загадзя пазітыўныя ацэнкі дзеянняў апанентаў улады» і «прыхавана каардынавалі пратэсную актыўнасць у грамадстве». Да таго ж, ТАА «ТУТ БАЙ МЕДЫЯ» ў 2019-2021 гадах мела нахабства «недаплаціць дзяржаве больш за 3 млн. рублёў падаткаў».
Сёння ў Беларусі пачаўся першы завочны суд. Уяўныя падсудныя — стваральнікі і адміністратары ТГ-каналаў «Чорная кніга Беларусі». Іх абвінавачваюць у «распальваньні сацыяльнай варожасці, незаконных дзеяннях у дачыненні да інфармацыі пра прыватные жыццё і персанальныя звесткі». Дзяржаўныя прапагандысты нават пакрыўдзіліся і напісалі: «У суд з'явіліся дзяржаўны абвінаваўца, а таксама абаронцы абвінавачаных. Самі фігуранты, нягледзячы на тое, што былі апавешчаны належным чынам, у суд не прыйшлі».
Стала вядома пра затрыманне 15 чалавек падчас «аблавы» ў Браславе, арганізаванай сілавікамі 7 снежня. Пра гэта паведаміў праваабаронцам адзін з тых, хто выйшаў з СІЗА пасля трох сутак арышту. «Большасць затрыманы па артыкуле 19.11 КК. Аднаго з затрыманых забралі за рэпост навін з незалежнага Telegram-канала ў лакальны чат у 2020 годзе», — паведаміў краязнаўца Кастусь Шыталь.
Мастака Івана Вярбіцкага будуць судзіць за злоснае непадпарадкаванне адміністрацыі калоніі. 15 сакавіка ён быў прысуджаны да 8 гадоў і 1 месяца пазбаўлення волі. У калоніі на Вярбіцкага аказваўся ціск: два месяцы зняволены утрымліваўся ў ШІЗА і ПКТ. У верасні 2021 года палітвязню пакаранне было павялічана, ён пераведзены ў магілёўскую калонію №4. Цяпер яго чакае новы 
Тры гады «хатняй хіміі» прысудзілі за ўдзел у адным маршы пратэсту 23 жніўня 2020 года Аляксандру Адашчыку. Суддзя прызнаў яго вінаватым паводле арт. 342 Крымінальнага кодэкса. Да вынясення прысуду мужчына знаходзіўся пад вартай, яго вызвалілі ў зале суда. Аляксандр прызнаў сваю віну.
У Слоніме сілавікі затрымалі Андрэя Казялецкага. На «пакаяльным» відэа мужчына кажа, што быў затрыманы праз «абразу міліцыянтаў у каментарах у інтэрнэце».
Паводле даных праваабаронцаў «Вясны», на сённяшні дзень у краіне налічваецца 1437 палітычных зняволеных. Ініцыятыва «Dissidentby» вызнае палітвязнямі 1717 чалавек. Сярод іх — 201 жанчына і 8 непаўнагадовых. 14 палітвязняў адпраўленыя на прымусовае лячэнне.