Улады Калумбіі і групоўка ФАРК дасягнулі гістарычнага пагаднення
Урад Калумбіі і паўстанцкая групоўка ФАРК падпісалі мірнае пагадненне, якое павінна пакласці канец 50-гадоваму супрацьстаянню, якое стала адным з самых працяглых у сусветнай гісторыі канфліктаў.
Кіраўнік калумбійскай урадавай дэлегацыі Умберта дэ ла Кайе (справа) і прадстаўнік ФАРК Іван Маркес (злева) падпісалі мірнае пагадненне ў Гаване
Заява па выніках дамоўленасці была зроблена прадстаўнікамі абодвух бакоў у Гаване, дзе ў лістападзе 2012 года пачаліся мірныя перамовы.
Ахвярамі паўвекавога канфлікту сталі 220 тысяч чалавек, мільёны за мінулыя дзесяцігоддзі былі вымушаныя пакінуць свае дамы.
«Мы дасягнулі мэты. Гэтая вайна скончаная, але зараз мы ў пачатку новага шляху. Гэта пагадненне адкрывае дарогу да больш справядлівага грамадства для ўсіх», — заявіў кіраўнік калумбійскай дэлегацыі на перамовах Умберта дэ ла Кайе.
Рэвалюцыйныя ўзброеныя сілы Калумбіі (ФАРК) ўступілі ў супрацьстаянне з калумбійскім урадам ў 1964 годзе. У ЗША і Еўрасаюзе леварадыкальныя групоўка класіфікуецца як тэрарыстычная.
За апошнія чатыры гады кубінскіх перамоў уладам Калумбіі ўдалося дасягнуць кампрамісу з кіраўніцтвам ФАРК па наступных напрамках: зямельная рэформа, удзел ФАРК ў наркатрафіку, раззбраенне групоўкі, яе інтэграцыя ў палітычнае жыццё краіны.
Канчаткова мірнае пагадненне павінна ўступіць у сілу пасля агульнанароднага галасавання, якое можа адбыцца ўжо ў кастрычніку. Аднак санкцыю на галасаванне спачатку павінен даць парламент.
Паводле BBC