Асноўныя падзеі 2024-га, якія дакладна трапяць у гісторыю. Дасье ў карыкатурах
Адыходзіць у мінулае 2024-ты. «Новы Час» з дапамогай карыкатурыстаў згадвае яго ключавыя моманты.
У пачатку года ў Расіі стартавала прэзідэнцкая кампанія. Аднак больш, чым электаральныя баталіі грамадства ўразіла навіна ад 16 лютага пра смерць лідара апазіцыі Аляксея Навальнага. Ён адбываў 19-гадовы тэрмін у адной з самых аддаленых расійскіх турмаў «Палярны воўк» — у 60 кіламетрах на поўнач ад палярнага круга. У афіцыйным заключэнні аб смерці напісана, што Навальны памёр ад «натуральных прычын». Паплечнікі палітыка і ягоная жонка Юлія Навальная ўпэўненыя, што яго забілі.
Глядзіце таксама
Аляксея Навальнага пахавалі 1 сакавіка ў Маскве, а сама цырымонія нагадвала хутчэй маніфестацыю пратэсту. Заходнія карыкатурысты ўбачылі развітанне з Навальным наступным чынам.
26 ліпеня ў Парыжы пачаліся летнія Алімпійскія гульні. Алімпіяда пакінула супярэчлівае ўражанне, паколькі праходзіла на фоне маштабнага крызісу ў краіне: партыя прэзідэнта Макрона прайграла датэрміновыя выбары ў парламент. Прычым прэзідэнт адмаўляўся даць апазіцыі шанец сфарміраваць кабінет. Многія французы разглядалі Гульні як спробу Макрона адцягнуць увагу ад крызісу. Тэматычная карыкатура на гэты конт. Варта адзначыць, што ўрадавы крызіс у Францыі працягваецца да гэтага часу.
У пачатку жніўня, пакуль увесь свет сачыў за Алімпіядай, Узброеныя сілы Украіны (УСУ) задзейнічалі свае самыя баяздольныя падраздзяленні для ўварвання ў Курскую вобласць Расіі. У першыя тыдні наступу Украіне ўдалося ўзяць пад кантроль каля 800 квадратных кіламетраў Курскай вобласці. На канец снежня УСУ кантралююць тэрыторыю ў два разы меншую і не ў стане спыніць прасоўванне расейцаў на Данбасе. Аднак на нейкім этапе, як сведчыць карыкатура, шмат хто верыў, што на фронце адбыўся пералом на карысць Украіны.
Увосень вайна на Блізкім Усходзе паступова выйшла за межы сектара Газа: у пачатку кастрычніка Ізраіль уварваўся ў суседні Ліван. Мэтай наземнай аперацыі было знішчэнне праіранскай тэрарыстычнай групоўкі «Хезбала», якая да гэтага рэгулярна наносіла ўдары па тэрыторыі Ізраіля. Ізраільскія ВПС бамбілі Бейрут і іншыя гарады Лівана, а таксама праводзілі дыверсійныя аперацыі супраць высокапастаўленых асоб «Хезбалы». За час бамбёжак загінулі амаль чатыры тысячы чалавек. Ізраілю ўсё ж удалося забіць лідара «Хезбалы», аднак сама ісламская арганізацыя не перастала існаваць, хоць і аслабла. Як бачым па гэтай карыкатуры, частка сусветнай грамадскасці крытычна паставілася да акцыі Ізраілю.
5 лістапада ў ЗША прайшлі 60-я прэзідэнцкія выбары. Яны дакладна трапяць у гісторыю, бо за пару месяцаў да галасавання Джо Байдэн, кандыдат ад Дэмакратычнай партыі і прэзідэнт, адмовіўся ў іх удзельнічаць. Замест яго кандыдатам у прэзідэнты ад Дэмпартыі стала віцэ-прэзідэнт ЗША Камала Харыс.
Глядзіце таксама
Але перамогу на выбарах атрымаў рэспубліканец Дональд Трамп. Прэзідэнцкія выбары прайшлі адначасова з выбарамі ў Сенат і Палату прадстаўнікоў, на якіх таксама перамаглі рэспубліканцы, якія зараз кантралююць усе галіны ўлады. Нядзіўна, што адзін брытанскі часопіс выявіў прыход Трампа ў Белы дом як каранацыю.
Тая акалічнасць, што групоўка «Хезбала» з-за вайны з Ізраілем аслабла, збольшага прывяла да падзення рэжыму прэзідэнта Сірыі Башара Асада, чыя сям'я кіравала краінай больш за 50 гадоў. Рэжым Асада трымаўся на падтрымцы Расіі і праіранскіх груповак, якія ваявалі з узброенай сірыйскай апазіцыяй. Аднак у канцы лістапада 2024 года мяцежнікі пачалі раптоўнае наступленне і паступова захапілі гарады, якія амаль 10 гадоў знаходзіліся пад кантролем урада. 8 снежня паўстанцы ўзялі сталіцу Сірыі Дамаск, а Башар Асад уцёк у Маскву. Праўда, пакуль не зразумела, што паўстане на рэштках асадаўскай дыктатуры. Гэтым пытаннем задаецца адзін з карыкатурыстаў.
Рэвалюцыі, інтэрвенцыі, крызісы, забойствы... Вось такім напружаным быў гэты год. На жаль, пакуль нічога не кажа, што 2025-ты стане спакайнейшым. Але не будзем сумаваць загадзя.
З Новым годам!