Сілавікі прыходзілі да журналіста Аляксандра Вялітчанкі. Яго абвесцілі ў крымінальны вышук

Праваабаронцам «Вясны» стала вядома, што раніцай супрацоўнікі ГУБАЗіКа па Гомельскай вобласці прыходзілі па месцы прапіскі журналіста-фрылансера і актывіста Аляксандра Вялітчанкі.

Дома яны нікога не засталі. Тады маці Аляксандра, якая знаходзіцца ў працоўным адпачынку, патэлефанавалі з працы і ў тэрміновым парадку выклікалі на размову да ідэолага прадпрыемства.

Калі жанчына прыйшла на працу, там яе сустрэлі двое супрацоўнікаў, пасля чаго адвезлі дадому і правялі вобшук. У паперы на правядзенне ператрусу значылася не менш за пяць артыкулаў Крымінальнага кодэкса. У выніку быў канфіскаваны адзін стары ноутбук.

Таксама супрацоўнікі цікавіліся, дзе знаходзіцца Аляксандр Вялітчанка, сказалі маці, што ён пададзены ў крымінальны вышук.

Напрыканцы, жанчыне далі на подпіс паперу, у якой значылася, што супрацоўнікі паводзілі сябе карэктна і дзейнічалі ў межах закона.