Праваабаронцы: 12 кастрычніка было затрымана больш за 70 чалавек

12 кастрычніка ў Беларусі было затрымана больш за 70 чалавек (у асноўным у сталіцы). Некалькі чалавек з раённых упраўленняў міліцыі забралі «хуткія», паведамляюць праваабаронцы.

У панядзелак у Мінску прайшоў Марш пенсіянераў, супраць удзельнікаў якога міліцыя выкарыстала спецсродкі. А ўвечары ў сталіцы сотні людзей удзельнічалі ў перакрыцці вуліц, у некаторых кропках гарэлі шыны, будаваліся барыкады. «Лятучыя» брагады сілавікоў разганялі гэтых людзей, ёсць відэа жорсткіх затрыманняў і «зачыстак» мікрараёнаў.

Увесь вечар у розны час і па некалькі разоў перакрываліся асноўныя транспартныя магістралі горада:

— праспект Незалежнасці ў раёне Нацыянальнай бібліятэкі і станцыі метро «Усход»;

— праспект Пераможцаў у раёне Лебядзінага;

— праспект Дзяржынскага на «Грушаўцы» і ў раёне станцыі метро «Міхалова»;

— Партызанскі праспект;

— праспект Машэрава;

— вуліца Прытыцкага ў Каменнай Горцы і ў раёне станцыі метро «Спартыўная»;

— вуліца Сурганава ў раёне ўніверсама «Рыга»;

— вуліца Раманаўская слабада.

На станцыі метро «Уручча» пратэстоўцы выцягнулі на дарогу лаўкі, на «Каменнай Горцы» — пластыкавыя блокі, а ў Шабанах на дарозе палілі пакрышкі.

Сілавікі затрымалі некалькі дзясяткаў чалавек. Больш за ўсё — ва Уруччы і ў Каменнай Горцы. Таксама жорсткія затрыманні адбыліся на «Грушаўцы», у Лебядзіным і ў Серабранцы.

Паводле Еўрарадыё, ПЦ «Вясна»