Падчас хапуна ў Іванаве сілавікі застрэлілі сабаку затрыманай настаўніцы

Праваабаронцам сталі вядомыя падрабязнасці масавага хапуна ў Іванаве, які адбываецца апошнія два дні. Ён санкцыяваны пракурорам Сяргеем Жуковічам. Ператрусы праходзілі ў актывістаў і ў тых, каго раней прыцягвалі па палітычных справах — паведамляецца, што некаторым людзям разграмілі кватэры.

Пацвердзілася інфармацыя пра тое, што міліцыянты застрэлілі сабаку настаўніцы Алены Пуцыковіч, якая адбывае «хатнюю хіміі» за два рэпосты з інфармацыяй пра міліцыянтаў. Яны пагражалі зрабіць гэта ўжо не аднойчы і ўчора мэтанакіравана застрэлілі хатняга гадаванца. Міліцыянты хацелі таксама застрэліць сабаку Марыны Кіявец, але тая змагла яе абараніць.

Таксама стала вядома, што сёння адбыліся суды над затрыманымі: Тамара Падымка — 30 базавых штрафу, Марына Кіявец — 29 базавых штрафу, Дзіяна Міховіч — 15 сутак арышту. Тамару і Марыну судзілі паводле арт. 19.11 КаАП (распаўсюд экстрэмісцкіх матэрыялаў), Дзіяну — паводле арт. 24.3 КаАП РБ (непадпарадкаванне міліцыянтам).

У Марыны трое непаўнагадовых дзяцей, аднак яе дагэтуль не вызвалілі пасля ўчорашняга затрымання (па законе, яе павінны былі адпусціць праз 3 гадзіны). Паведамляецца, што на яе склалі тры пратаколы, таму могуць судзіць некалькі разоў запар — пасля сённяшняга суда жанчыну адразу перазатрымалі.

Таксама вядома, што сярод затрыманых мужчына па прозвішчы Савіцкі, а таксама Дзмітрый Сянчук і Аляксандр Юшкевіч.

Затрыманні праводзілі супрацоўнікі ГУБАЗіКа і «Алмазу». У адным з РАУСаў мужчыне павязалі на шыю БЧБ-сцяг і пагражалі задушыць. У кішэні яму таксама засунулі БЧБ-сцягі — так з ім запісвалі «пакаяльнае відэа».