«Калі ўбачым сустрэчны канструктыў — супер». Пра што размаўлялі каліноўцы і Святлана Ціханоўская

Упершыню з пачатку вайны ва Украіне прадстаўнікі палка Каліноўскага сустрэліся з лідаркай дэмакратычных сіл Беларусі Святланай Ціханоўскай. Паводле слоў байца падраздзялення з пазыўным «Марк», размова праходзіла спакойна. «Крычаць і перакрыкваць кагосьці — гэта нешта несур'ёзнае, — адзначыў ён. — Мы можам размаўляць вельмі ціха і пры гэтым чуць адзін аднаго». Пра тое, што абмяркоўвалі на сустрэчы, Марк распавёў «Люстэрку».

Сярод тых, хто ўдзельнічаў у гутарцы, таксама былі дэпутат Вярхоўнай рады Украіны Аляксей Ганчарэнка, народны дэпутат ад кіруючай партыі «Слуга народа» Багдан Ярэменка.

— Давайце пачнём з таго, як вы трапілі на гэту сустрэчу і хто яе арганізаваў?

— Мы не так даўно выехалі з Бахмута. Цяпер у нас час навучання. Мне сказалі, што з ініцыятывы ўкраінскіх дэпутатаў, якія добра ставяцца да палка і ў якіх баліць душа за будучыню Беларусі, будзе арганізаваны медыятарскі зум са Святланай Ціханоўскай <...>, каб беларусы, якія хочуць жыць у нармальнай дэмакратычнай краіне, пачалі размаўляць.

— Калі ўкраінскі бок загаварыў пра сустрэчу, як адрэагавалі ў палку? Да гэтага было адчуванне, што ў падраздзялення і Офіса не атрымліваецца кантактаваць.

— Я гляджу на гэту сітуацыю так: у нас з'явілася магчымасць данесці свае думкі, задаць пытанні і атрымаць на іх адказы. І, можа быць, гэта неяк палепшыць нашу сітуацыю.

— Пра што гаварылі?

— Святлана Георгіеўна выказала сваё захапленне байцамі палка Каліноўскага. Такая стандартная працэдура. Словы ад палітыка. Што мяне цікавіла. У «Дзядзькі» і «Ігара» (пабрацімы Марка, якія таксама ўдзельнічалі ў гутарцы) былі свае пытанні.

Я падняў пытанне, што са жніўня 2022 года створаны Аб'яднаны пераходны кабінет, у сілавы блок якога ўваходзяць дзве структуры: структура BYPOL і структура Сахашчыка. Я спыніўся на структуры Сахашчыка. Спытаў, ці разумее Святлана Георгіеўна, што адбываецца ў гэтым падраздзяленні. Яна адказала, што плюс-мінус валодае сітуацыяй. Я патлумачыў, што стварэнне [падобных] падраздзяленняў прымушае людзей разгубіцца. Яны не разумеюць, да каго ісці. У выніку мы размываем рэзервы, якія маглі б у нас быць, якіх мы маглі б навучыць, з якімі мы б разам атрымлівалі баявы досвед, каб прымяніць яго для вызвалення Беларусі.

Полк Каліноўскага лёгка зойдзе ў Беларусь — гэтага Лукашэнка і баіцца

Другая думка, якую я хацеў данесці: спадзявацца на несілавы сцэнар вызвалення Беларусі не варта. [Лукашэнка] ужо 30 гадоў трымае краіну, і яна з кожным днём усё больш і больш становіцца падобнай на канцэнтрацыйны лагер. Дакладней, гэта ён і ёсць. Святлана Георгіеўна патлумачыла, што яна займаецца маніторынгам сітуацыі ў Беларусі і што людзі чакаюць, калі іх прыйдуць і вызваляць. «Гэта цалкам няправільнае меркаванне», — адказаў я. Мірную рыторыку трэба забыць і распавядаць людзям праўду. Казаць, што ім трэба аб'яднанне (я не маю на ўвазе аб'яднанне палка і Офіса) і разуменне агульнай мэты. Мы павінны не кветкі кідаць і крычаць «Жыве Беларусь», а «кактэйлі Молатава». Калі ўся нацыя зразумее, што нам не па дарозе з гэтым рэжымам і палітыкай, якую ён праводзіць, толькі тады мы зможам змяніць сітуацыю.

— Удакладню з нагоды вашых пытанняў. Вы казалі Святлане, што не варта ствараць падраздзяленні накшталт беларускай вайсковай часці, пра якую распавядаў Валерый Сахашчык?

— Гэта часць стваралася пампезна, але, наколькі я ведаю, адтуль сыходзіць шмат людзей, людзі расчароўваюцца. Гэта паказвае, што структура створана і спрыяе адтоку добраахвотнікаў, якія маглі б прыйсці да нас.

Да таго ж рэвалюцыя 2020 года была рэвалюцыяй крэатыву. Рэжым жа працягваў дзейнічаць так, як было напісана ў іх метадычках <...>. Сахашчык — кадравы савецкі ваенны. Ён думае сапраўды гэтак жа. Ён паехаў, дамовіўся і стварыў часць. Але вялікі Савецкі Саюз (Расію) не зможа перамагчы маленькі Савецкі Саюз — Беларусь. Гэта не працуе.

— Вы не абмяркоўвалі сваё ўзаемадзеянне з гэтай часцю?

— Не, але Святлана Георгіеўна сказала, што бачыць, які вялікі ўклад уносіць полк. Што Кабінет гатовы прыняць нашага прадстаўніка, каб была магчымасць больш размаўляць. Яна сказала: «Прыязджайце да нас». На што мы пасмяяліся і адказалі, што нам прасцей у Бахмут зайсці, чым у Вільню прыехаць. Мы ўсё ж такі вайскоўцы.

— Што адказала вам Ціханоўская на словы пра сілавы сцэнар?

— У мяне было адчуванне, што чалавеку трэба гэта прыняць. Чаканне, што Лукашэнка памрэ ці заўтра Расія прайграе і ён зменіць рыторыку — гэтага не адбудзецца. Наш шлях магчымы толькі пасля поўнага разгрому рэжыму. Яна адказала, што да гэтага трэба прызвычаіцца. Мы ёй казалі, што людзям трэба даваць іншы парадак дня і тлумачыць: цудаў не бывае. Надзея на мірны пратэст — гэта размыванне парадку дня. Пладзіць «ждуноў», якія будуць думаць, што іх вызваляць, — гэта толькі на руку рэжыму.

Скрыншот з сустрэчы

— Ёсць нешта канкрэтнае, што б вы хацелі атрымаць ад Кабінета?

— Нашы пажаданні, каб Святлана Георгіеўна агітавала людзей уступаць у наша падраздзяленне і тлумачыла, навошта гэта. А таксама каб мы ад Аб'яднанага пераходнага кабінета не толькі чулі словы, але і мелі падтрымку. Мы — баявое падраздзяленне, у нас многае завязана на валанцёрстве і дапамозе, пачынаючы ад машын, заканчваючы дронамі. Гэта ўсё нам трэба, таму што вайна — вельмі дарагое задавальненне.

— Ці ёсць нешта канкрэтнае, пра што вы дамовіліся?

— Напэўна, агучыць гэта мы не можам. На сустрэчы мячык быў на нашым полі. Мы зрабілі пас Святлане Георгіеўне і чакаем крокаў у адказ. Калі ўбачым сустрэчны канструктыў — супер. Значыць, гутарка была нездарма. А калі ўсё скаціцца ў нейкае маўчанне, значыць, наш рух нецікава Кабінету. І мы будзем працягваць далей рухацца ў тым кірунку, які мы для сябе выбралі.

— Для чаго палку ісці на кантакт з Офісам?

— Для нас няма розніцы — Офіс гэта ці палітычная арганізацыя. Калі мы глядзім у адзін бок і аб'яднаны агульнай мэтай (а мэта — звяржэнне рэжыму Лукашэнкі і свабодныя дэмакратычныя выбары), то мы гатовы глядзець у гэты бок з усімі. У нас няма прадузятага стаўлення ні да каго.

— Калі полк, як вы заяўляеце, вызваліць Беларусь, што будзе далей?

— Мы гатовы стварыць платформу для правядзення дэмакратычных выбараў. Калі палітыкі падзяляюць гэту ідэю, яны могуць увайсці ў кааліцыю (але кааліцыя — гэта не значыць дзяльба чагосьці). Наша галоўная задача — каб прайшлі выбары і людзі змаглі зрабіць свой выбар. Мы [у гэты перыяд] будзем сачыць за аховай парадку ў краіне. Глядзець, каб не адбылася сітуацыя, як у 2014-м ва Украіне. Каб «ветлівыя людзі» на бусіках не прыехалі ў Гомельскую вобласць і не сталі яе ў нас адціскаць. Стварэнне платформы — гэта стварэнне нармальнай абстаноўкі, у якой людзі б адчувалі сябе абароненымі.

— Ці спатрэбіцца ў гэты перыяд палку дапамога палітычных сіл? Напрыклад, штаба Ціханоўскай, Бабарыкі.

— Безумоўна, хацелася б размаўляць з аднадумцамі і разумець, што людзі бачаць гэту сітуацыю гэтак жа, што няма паветраных замкаў. Нас чакае вельмі вялікая, вельмі цяжкая і небяспечная праца. І чым больш людзей да нас далучыцца, тым большай будзе верагоднасць, што гэта рэвалюцыя будзе з найменшымі стратамі.

— На другую сустрэчу са Святланай вы дамаўляліся?

— Пра гэта будуць дамаўляцца іншыя людзі. Ёсць тыя, каму даручана нейкае ўзаемадзеянне і пачынанне размовы. Мы чакаем. Калі я буду мець магчымасць, прыеду і на тую сустрэчу.