У выніку начной атакі на Кіеў загінулі мінімум 14 чалавек. «Расія выбірае балістыку замест стала перамоваў» — Зяленскі

Сёння ноччу Расія атакавала сталіцу Украіны. У асноўным удары закранулі жылыя раёны Кіева. Вядома, што як мінімум 14 чалавек загінулі, сярод іх трое дзяцей — 2, 14 і 17 гадоў. Не менш за 30 чалавек параненыя. У Кіеве 29 жніўня абвешчаны Днём жалобы. Ідуць 1282-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

Начная атака на Кіеў — найбуйнейшы напад на сталіцу Украіны з 31 ліпеня, калі загінулі больш за 30 чалавек. 

«Частка ракет і дронаў-камікадзэ патрапілі ў жылыя дамы. Складана растлумачыць мэту ворага разбураць мірны горад. Адно тлумачэнне — распаўсюдзіць дэпрэсію сярод украінцаў, зламаць волю да барацьбы. Іншага тлумачэння я не бачу, — сказаў мэр горада Віталій Клічко. —  Зараз ажыццяўляюцца работы па ліквідацыі наступстваў гэтай жудаснай ночы. Больш за 100 дамоў былі разбураныя. Мы гаворым зараз аб загінулых і дзясятках параненых. І, на жаль, гэта колькасць павялічваецца».

Кіеў быў абстраляны новымі рэактыўнымі дронамі «Герань-3», якія развіваюць вельмі высокую хуткасць і складаныя для збіцця, паведамляе Clash Report.

Адзначаецца, што ў паліўнай сістэме гэтага дрона была выяўлена нямецкая паліўная помпа Bosch 0-580, які звычайна выкарыстоўваецца ў грамадзянскіх аўтамабілях. Таксама «Герань-3», як паведамляе выданне, абсталяваны рухавіком PBS TJ40-G2, вырабленым кампаніяй PBS Velká Bíteš у Чэхіі.

Таксама выкарыстоўваюцца і рухавікі кітайскага паходжання SW400 pro.

Сярод пашкоджаных будынкаў — офісы місіі ЕС і Брытанскай Рады.

Міністр замежных спраў Украіны заклікаў да «рэзкай міжнароднай рэакцыі» на апошнія ўдары Расіі пасля таго, як быў пашкоджаны будынак місіі ЕС ва Украіне.

«Падчас начнога ўдару Расія таксама атакавала дыпламатаў — прамое парушэнне Венскай канвенцыі. Місіі ЕС ва Украіне была нанесена шкода», — напісаў Андрэй Сібіга на X.

Гэта патрабуе асуджэння не толькі з боку ЕС, але і з боку ўсяго свету. Мы выказваем салідарнасць з нашымі калегамі з ЕС і гатовыя аказаць дапамогу.

«Што б ні казаў Пуцін на Алясцы, яго рэальныя дзеянні адкідаюць дыпламатыю, дыялог і мірныя намаганні», — дадаў Сібіга.

Прэзідэнт Украіны Уладзімір Зяленскі заявіў: «Расія выбірае балістыку замест стала перамоваў. Яна выбірае працяг забойстваў замест спынення вайны. А гэта значыць, што Расія ўсё яшчэ не баіцца наступстваў».

Мы чакаем адказу ад усіх у свеце, хто заклікаў да міру, але цяпер часцей маўчыць, замест таго, каб займаць прынцыповыя пазіцыі. І, безумоўна, настаў час для новых, жорсткіх санкцый супраць Расіі за ўсё, што яна робіць.

Усе тэрміны ўжо сарваныя, дзясяткі магчымасцей для дыпламатыі зруйнаваныя. Расія павінна адчуваць адказнасць за кожны ўдар, за кожны дзень гэтай вайны».

Сітуацыя на фронце

Як паведамляе Генштаб УСУ, усяго за мінулыя суткі зафіксавана 139 боесутыкненняў. Паводле ўдакладненай інфармацыі, за ўчора, РФ нанесла 84 авіяцыйныя ўдары, скінула 154 кіраваныя авіяцыйныя бомбы. Акрамя таго, расіяне прыцягнулі для паражэння 5770 дронаў-камікадзэ і ажыццявілі 5177 артылерыйскіх абстрэлаў па пазіцыях украінскіх войскаў і населеных пунктах, у тым ліку 86 — з рэактыўных сістэм залпавага агню.

РФ наносіла авіяцыйныя ўдары, у прыватнасці па раёнах населеных пунктаў Зарэчча Сумскай вобласці; Белагор'е, Сцепнагорск Запарожскай вобласці; Мікалаеўка Херсонскай вобласці.

За мінулыя суткі авіяцыя, ракетныя войскі і артылерыя Сіл абароны ўразілі чатыры раёны засяроджвання асабістага складу, узбраення і ваеннай тэхнікі, адзін пункт кіравання, чатыры гарматы і адзін склад боепрыпасаў праціўніка.

Сілы абароны Украіны працягваюць стрымліваць захопнікаў на Паўночна-Слабажанскім і Курскім кірунках. Так, за мінулыя суткі РФ нанесла 17 авіяцыйных удараў — скінула пры гэтым 33 кіраваныя авіяцыйныя бомбы, здзейсніла 245 абстрэлаў, з якіх чатыры — з рэактыўных сістэм залпавага агню. Украінскія абаронцы спынілі дзевяць штурмавых дзеянняў ворага.

Агулам, за мінулыя суткі страты расейскіх захопнікаў склалі 880 чалавек. Таксама ўкраінскія воіны абясшкодзілі чатыры танкі, сем баявых браніраваных машын, 40 артылерыйскіх сістэм, дзве рэактыўныя сістэмы залпавага агню, 325 беспілотнікаў аператыўна-тактычнага ўзроўню, адну цяжкую агнямётную сістэму, 120 адзінак аўтамабільнай і дзве адзінкі спецыяльнай тэхнікі акупантаў.

У ноч на 28 жніўня праціўнік нанёс масіраваны ўдар па тэрыторыі Украіны з ужываннем ударных БпЛА, ракет паветранага і наземнага базавання, усяго — 629 сродкаў паветранага нападу:

— 598 ударных БПЛА тыпу Shahed і беспілотнікамі-імітатарамі розных тыпаў з кірункаў Курск, Бранск, Мілерава, Арол, Шаталава, Прыморска-Ахтарск — РФ, Гвардзейскае — акупаваны Крым;

— 2 аэрабалістычныя ракеты Х-47М2 «Кінжал» з паветранай прасторы Ліпецкай і Варонежскай вобл.;

— 9 балістычных ракет Іскандэр-М / KN-23 з Бранскай і Варонежскай вобл.;

— 20 крылатых ракет Х-101 з паветранай прасторы Саратаўскай вобл.

Па стане на 09:00, супрацьпаветранай абаронай збіта 589 паветраных цэляў:

— 563 БПЛА тыпу Shahed і дронов-імітатараў розных тыпаў;

— 1 аэрабалістычная ракета Х-47М2 «Кінжал»;

— 7 балістычных ракет Іскандэр-М / KN-23;

— 18 крылатых ракет Х-101.

Новыя пажары на расійскіх НПЗ

У ноч на 28 жніўня 2025 года падраздзяленні сіл абароны Украіны нанеслі паразу шэрагу важных аб'ектаў РФ.

У прыватнасці, падраздзяленні сіл беспілотных сістэм і Галоўнага ўпраўлення разведкі Украіны атакавалі Афіпскі НПЗ, што ў Краснадарскім краі РФ. Гэты нафтаперапрацоўчы завод, асноўнымі прадуктамі перапрацоўкі якога з'яўляюцца бензін і дызельнае паліва, задзейнічаны ў забеспячэнні арміі РФ. Гадавы аб'ём перапрацоўкі складае 6,25 млн тон нафты ў год.

Зафіксаваны маштабны пажар на тэрыторыі аб'екта.

Таксама паведамляецца пра атаку на нафтаперапрацоўчы завод у Новакуйбышэўску Самарскай вобласці на поўдні Расіі. Прадпрыемства выпускае бензіны, дызельнае паліва, мазуты, растваральнікі, усяго — больш за 30 відаў нафтапрадуктаў. Магутнасць перапрацоўкі 7 млн тон нафты ў год. Зафіксаваныя выбухі і пажар на тэрыторыі завода.

Акрамя таго, у агні дзве стратэгічныя чыгуначныя станцыі — Пятроў Вал і «Краж». Паводле звестак Генштаба, знішчаныя і склады боепрыпасаў і лагістычныя аб'екты РФ як на тэрыторыі Расіі, так і на часова акупаваных землях Украіны.

Атакі працягваліся з ночы да раніцы.