Летні наступ УС РФ ва Украіне праваліўся — Bild

Чацвёртае лета вайны не прынесла поспехаў расійскай арміі. Большасць мэтаў, якія Масква ставіла на кампанію з красавіка да жніўня 2025 года, выявіліся нерэалізаванымі, мяркуе вайсковы аглядальнік BILD Юльян Рэпке. Ідуць 1281-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

У Данецкай вобласці расійскія войскі беспаспяхова спрабавалі ўзяць Пакроўск. Нягледзячы на прарыў у цэнтр горада ў жніўні, праз тры тыдні ўсе расійскія падраздзяленні былі знішчаныя або трапілі ў палон. На паўночным кірунку планы Уладзіміра Пуціна па стварэнні «пояса бяспекі» ў Чарнігаўскай, Сумскай і Харкаўскай абласцях таксама сарваліся: пад кантролем Расіі апынулася менш за 70 кіламетраў тэрыторыі ўздоўж мяжы.

На поўдні, у Херсонскай і Запарожскай абласцях, фронт застаўся стабільным, і Крэмль вымушаны быў фактычна адмовіцца ад планаў наступу. Пры гэтым Украіна ўзмацніла ўдары беспілотнікамі па расійскіх нафтаперапрацоўчых заводах — да 1200 кіламетраў углыб тэрыторыі РФ. Па звестках экспертаў, з пачатку года Украіна вывела з ладу 17% магутнасцяў расійскіх НПЗ, што выклікала рост коштаў і дэфіцыт паліва ўнутры краіны.

Усяго за лета Расія захапіла толькі 1800 квадратных кіламетраў — блізу 0,3% украінскай тэрыторыі. Прэзідэнт Уладзімір Зяленскі заявіў, што гатовы да абмеркавання перамір'я, але не капітуляцыі, як таго патрабуе Масква.

«Перш за ўсё, рэарганізацыя ўкраінскай арміі наводзіць парадак у шэрагах. Сярод расейцаў жа, наадварот, назіраецца пэўная стомленасць. Тым не менш зімой, калі зямля прамерзне, а лісце ападуць з дрэў, што знізіць абарону ад беспілотнікаў, расейцы могуць паспрабаваць зноў перайсці ў наступ», — адзначыў у размове з BILD вайсковы эксперт Густаў Грэсель.

Праз украінскія ўдары па НПЗ Расію чакае рост рэзкі рост інфляцыі

Украінскія ўдары па расійскіх нафтаперапрацоўчых заводах спрыялі дэфіцыту бензіну па ўсёй Расіі, што, верагодна, павысіць інфляцыю і выкліча далейшую макраэканамічную нестабільнасць, піша ISW. 

Агенцтва Reuters паведаміла 25 жніўня, што нядаўнія ўкраінскія ўдары па 10 нафтаперапрацоўчых заводах у Расіі парушылі як мінімум 17 працэнтаў расійскіх перапрацоўчых магутнасцей, або прыкладна 1,1 мільёна барэляў у дзень, і выклікалі дэфіцыт бензіну А-95 (прэміум) у некаторых раёнах акупаванай Украіны, поўдня Расіі і Далёкага Усходу Расіі. Учора з“явіліся паведамленні, што Расія павялічыла свой план экспарту сырой нафты на 200 000 барэляў у дзень у жніўні, паколькі ўдары ўкраінскіх беспілотнікаў парушылі працу нафтаперапрацоўчых заводаў і пакінулі сырую нафту даступнай для экспарту Расіяй. Гэты перагляд планаў экспарту сырой нафты можа павялічыць даходы Расіі ад нафты ў кароткатэрміновай перспектыве, але, верагодна, негатыўна ўплывае на ўнутраную эканоміку. У некалькі рэгіёнаў Расіі і акупаванага Крыма ўведзена нарміраванне на бензазапраўках. Расійскія ўлады прыпынілі продаж бензіну А-92 жыхарам Расіі на Курыльскіх астравах Сахалінскай вобласці.

Расія з цяжкасцю задавальняла ўнутраны попыт на бензін яшчэ да нядаўніх украінскіх удараў і ўводзіла перыядычныя забароны на экспарт бензіну з 2022 года, апошні раз такая забарона была ўведзена ў канцы ліпеня — жніўні. Нядаўнія ўкраінскія ўдары павялічылі дэфіцыт бензіну і выклікалі рэзкі рост цэн на бензін па ўсёй Расіі і акупаванай Украіне, што, верагодна, прывядзе да павелічэння спажывецкіх выдаткаў і павелічэння бізнес-выдаткаў ва ўсіх галінах прамысловасці. У спалучэнне з доўгатэрміновым павелічэннем выплат на падтрыманне набору вайскоўцаў і павелічэнне працоўнай сілы абаронна-прамысловай базы гэта, верагодна, прывядзе да рэзкага росту інфляцыі, аслаблення пакупніцкай здольнасці спажыўцоў, дэвальвацыі рубля ў сярэдне- і доўгатэрміновай перспектыве і стварэння далейшай макраэканамічнай нестабільнасці ў Расіі.

*****

У ноч на 27 жніўня РФ атакавала 95-ю ўдарнымі БПЛА тыпу Shahed і беспілотнікамі-імітатарамі розных тыпаў з кірункаў: Курск, Мілерава, Арол, Прыморска-Ахтарск, Чауда-той.

Супрацьпаветранай абаронай збіта 74 БПЛА тыпу Shahed і дронов-імітатараў розных тыпаў на поўначы, поўдні і ўсходзе краіны.

Зафіксавана трапленне 21 БпЛА на 9 лакацыях.

У Херсоне ў выніку атакі загінула 81-гадовая жанчына, паранена 53-гадовая жанчына. 

Таксама паведамляецца, што начныя атакі РФ былі скіраваныя на аб'екты энергетычнай і газатранспартнай інфраструктуры ў шасці абласцях Украіны: Сумскай, Палтаўскай, Данецкай, Чарнігаўскай, Харкаўскай, Запарожскай.

У Сумах пашкоджана абсталяванне на адной з ключавых падстанцый, у выніку чаго без электразабеспячэння засталася значная частка горада і прамысловых спажыўцоў.

На Палтаўшчыне РФ мэтанакіравана комплексна атакавала аб'екты газатранспартнай інфраструктуры, якія атрымалі значныя пашкоджанні.

У выніку атакі расейскіх БпЛА ў Ноўгарад-Северскай абшчыне на Чарнігаўшчыне 27 жніўня без электразабеспячэння застаецца 51 населены пункт. Для патрэб насельніцтва разгарнулі сем пунктаў нязломнасці.

Учора РФ атакавала абагачальную фабрыку ДТЭК у Данецкай вобласці. Паведамляецца, што будынак пасля ўдару разбураны, а абсталяванне сур'ёзна пашкоджана. Супрацоўнікі ДТЭК, якія працавалі падчас абстрэлу, ацалелі, ратавальнікі ўжо патушылі пажар. 

Зараз праца фабрыкі цалкам паралізаваная, а яе абагачальныя магутнасці непрыдатныя да працы. Гэта ўжо не першая маштабная атака на фабрыку, якая забяспечвала вуглём цеплавую генерацыю Украіны.

*****

Спецпрадстаўнік Трампа Стыў Уіткаф заявіў, што на гэтым тыдні сустрэнецца з прадстаўнікамі Украіны ў Нью-Ёрку.

Уіткаф таксама сказаў, што Пуцін гатовы да міру.

«Безумоўна. На стале ёсць мірная прапанова. Спадзяемся, ён будзе прытрымлівацца свайго абяцання», — заявіў Уіткаф.

Між тым, прэзідэнт Украіны Уладзімір Зяленскі заявіў, што «цяпер расейцы даюць негатыўныя сігналы наконт сустрэч і далейшага развіцця падзей. Удары па нашых гарадах і вёсках працягваюцца».

*****

Заходнія партнёры Украіны падрыхтавалі папярэдні план яе бяспекі на выпадак завяршэння вайны, і ён прадугледжвае тры ўзроўні абароны, піша FT.

Першы ўзровень прадугледжвае стварэнне дэмілітарызаванай зоны, якая, верагодна, будзе патрулявацца нейтральнымі міратворчымі войскамі трэцяй краіны, узгодненай Украінай і Расіяй.

Далей, са слоў трох службовых асоб, значна больш трывалую мяжу павінны абараняць украінскія войскі, узброеныя і падрыхтаваныя краінамі NATO.

Еўрапейскія сілы стрымлівання павінны былі б размясціцца глыбей на тэрыторыі Украіны як трэцяя лінія абароны, а амерыканскія рэсурсы падтрымлівалі б іх з тылу.

Але, як адзначае выданне, нават пры ўмове патэнцыйнай падтрымкі ЗША, грамадскасць і палітыкі ў многіх еўрапейскіх краінах застаюцца ўстрывожанымі магчымасцю адпраўкі войскаў ва Украіну.

******