Аляксей Венядзіктаў: перамовы Лукашэнкі і апазіцыі адбудуцца, іх будзе весці АБСЕ пад кіраўніцтвам Швецыі
Галоўны рэдактар «Эха Москвы» Аляксей Венядзіктаў у эфіры праграмы «Будзем назіраць» пракаментаваў свой допіс у сацсетках ад 25 сакавіка пра перамовы з Лукашэнкам пры ўдзеле АБСЕ і ЗША. Ён намякнуў на крыніцы атрымання інфармацыі.
«Я з двух розных крыніц — аднаго заходняга, іншага беларускага, — атрымаў гэтую інфармацыю. Называць я іх не буду, я ваш крыніца. Яна мне падалася вартай увагі, тым больш, што яна фактамі размоў пацверджана, галасаваннем пацверджана. І ніхто не абверг з названых... Ну абвергнуць, значыць, сарвалася. Але на той дзень, калі я казаў — рух быў», — цытуе Венядзіктава REFORM.by.
Ён сцвярджае, што перамовы Лукашэнкі і апазіцыі адбудуцца, іх будзе весці АБСЕ пад кіраўніцтвам Швецыі, усіх палітвязняў запатрабуюць неадкладна вызваліць і рэабілітаваць.
«Краіны ЕС бяруць на сябе абавязацельства па аказанні макраэканамічнай падтрымкі ў плыні пераходнага перыяду, у тым ліку і пасля правядзення свабодных выбараў. Усебаковую падтрымку абяцаюць аказаць незалежным СМІ, праваабаронцам, прамысловым прадпрыемствам і малому бізнесу», — напісаў ён у сваім Telegram-канале.
Венядзіктаў сцвярджае, што тэрміны і ўмовы правядзення перамоваў апазіцыі пад кіраўніцтвам Святланы Ціханоўскай і беларускай улады абмяркоўваліся падчас тэлефоннай размовы дарадцы Дзярждэпартамента ЗША Дэрэка Шоле з міністрам замежных спраў Беларусі Уладзімірам Макеем у панядзелак, 22 сакавіка. Стартавым тэрмінам для пачатку перамоўнага працэсу журналіст называе дату не пазней за 1 траўня. Яны пройдуць пры ўдзеле амбасадара ЗША Джулі Фішэр, экс-старшыні Еўракамісіі Жазэ Мануэль Барозу, АБСЕ і МЗС Нямеччыны, піша Венядзіктаў.
У эфіры на «Эхо Москвы» ён пацвердзіў напісанае двума днямі раней і звярнуў увагу на тое, што ніхто з бакоў, якія фігуруюць у ягоным інсайдзе — ні Дзярждэп, на адміністрацыя Лукашэнкі, ні прадстаўнікі Ціханоўскай — не зняпраўдзіў агучаную ім інфармацыю.
«А прадстаўнік Ціханоўскай сказала: “Я не ўпаўнаважаная адказваць на такія пытанні, ці праўду напісаў Венедыктаў у сваім Telegram-канале”. Таму так, такая размова паміж Дзярждэпам і дарадцам Дзярждэпу Шоле і міністрам замежных спраў Макеем была. І гэта цалкам укладваецца ў тыя абяцанні, якія Лукашэнка рабіў і расійскім уладам па пераходнаму перыяду, па канстытуцыйнаму працэсу», — заявіў журналіст.
Ён дапускае, што перамовы могуць сарвацца, паколькі ў бакоў рознае бачанне праблем, аднак на сёння, на яго думку, «усе да гэтага (да перамоваў — Reform.by) рыхтуюцца». Разам з тым ён звяртае ўвагу на сам факт галасавання, называючы яго ў гэтай гісторыі вырашальным аргументам.
«Ціханоўская кажа: я стаўлю на галасаванне на платформе “Голас” пытанне: ці павінны мы пасля ўсіх вось гэтых вось жахлівых дзеянняў Лукашэнкі (...) садзіцца з ім за стол перамоваў? На пазаўчора ( ... ) з 727 тысяч прагаласаваўшых беларусаў — 6 мільёнаў краіна (насельніцтва Беларусі, паводле звестак Белстата на 1 студзеня 2020 года, складала 9,4 млн чалавек — Reform.by), 727 тысяч прагаласавала — так нядрэнна, 18%, — 718 выступілі за перамовы. Не за паўстанне, а за перамовы. І гэта зрабіла ўражанне, тым больш, што платформа “Голас” ( ... ) — яна даволі нядрэнна абаронена», — каментуе вынікі Венядзіктаў.
Ён сцвярджае, што практычна гэта галасаванне прызналі ўсе бакі.
«І для заходнікаў гэта быў аргумент, і для Лукашэнкі гэта быў аргумент, і, натуральна, для апазіцыі гэта быў аргумент. ( ... ) Гэта падштурхнула ўсе бакі да пачатку размовы, можа быць, — не перамоваў. Таму так, такая падрыхтоўка вядзецца, яшчэ раз паўтараю: не ведаю, адбудзецца ці не, паўтараю, таму што кан'юнктура можа памяняцца. Расіі там няма, у гэтым перамоўным працэсе. Лукашэнку ці апазіцыі гэта можа здацца несвоечасовым — давайце будзем зыходзіць з таго, што палітыкі каньюнктурныя. Але (...) сёння гэта так. У гісторыі Беларусі гэта такі дзіўны выпадак, калі гэтае галасаванне ніхто не аспрэчвае», — рэзюмуе ён.
Нагадаем, Святлана Ціханоўская абвясціла аб пачатку агульнанацыянальнага галасавання за перамовы аб выхадзе з крызісу пры міжнароднай падтрымцы 18 сакавіка. На думку яе каманды, яна прадэманструе сусветнай супольнасці, што палітычны крызіс узмацняецца і патрабуе тэрміновага ўрэгулявання, верне беларусам пачуццё адзінства, спыніць грамадзянскі канфлікт і прадэманструе непазбежнасць перамоваў як адзінага рашэння крызісу мірным шляхам.
Адзначым, што па выніках тэлефоннай размовы прэс-служба беларускага МЗС паведамляла, што абмеркаванне двухбаковага парадку прайшло ў прагматычным ключы. Бакі пагадзіліся з неабходнасцю развіваць дыялог, але адзначылі наяўнасць істотных рознагалоссяў. У адказ на выказванне заклапочанасці прадстаўніком Дзярждэпартамента, Макей заклікаў амерыканскі бок аб’ектыўна ацэньваць сітуацыю ў Беларусі. Ён падкрэсліў контрпрадуктыўнасць спробаў ціску на суверэнную дзяржаву.
Амерыканскі бок па выніках размовы паведаміў, што заклікаў ўлады Беларусі вызваліць палітвязняў і таксама выказаў падтрымку правядзення новых выбараў. Акрамя таго, абмяркоўвалася абмен амбасадарамі.