Што, зноў?! СААЗ заклікала аднавіць масачны рэжым з-за росту захворвання на COVID-19
Генеральны дырэктар Сусветнай арганізацыі аховы здароўя Тэдрас Гебрэесус выступіў за аднаўленне масачнага рэжыму з-за павелічэння колькасці выпадкаў віруса COVID19, грыпу і іншых вірусных захворванняў, якое назіраецца ў многіх краінах на працягу апошніх некалькіх тыдняў.
Фота pixabay.com
На думку кіраўніка СААЗ, пасля навагодніх святаў тэндэнцыя да росту колькасці рэспіраторных захворванняў працягнецца, таму ён заклікаў людзей «зноў выконваць меры прафілактыкі супраць COVID-19».
«Абавязкова праходзьце тэставанне і пры неабходнасці звяртайцеся па дапамогу, паколькі пры належным лячэнні COVID-19 можна прадухіліць цяжкае захворванне і смерць», — напісаў Гебрэесус на сваёй старонцы ў сацсетцы X (былы Twitter).
Ён заклікаў людзей працягваць выкарыстоўваць маскі і «дыстанцыявацца, каб паменшыць рызыку заражэння», а таксама не грэбаваць прышчэпкамі ад COVID-19 і грыпу.
Звяртаючыся да ўрадаў краін, Гебрэйесус заклікаў іх «забяспечыць доступ да надзейных тэстаў, лячэння і вакцын», асабліва для тых, хто «падвяргаецца найбольшай рызыцы цяжкай інфекцыі».
«Працягвайце эпіднагляд, секвеніраванне і справаздачнасць для адсочвання эвалюцыі віруса COVID-19, а таксама выразна інфармуйце пра рызыкі і мерах па зніжэнні рызыкі для вашага насельніцтва», — агучыў свае рэкамендацыі кіраўнік СААЗ.
Глядзіце таксама
У снежні паведамлялася, што Міністэрства аховы здароўя Беларусі правяло ў краіне «вірусалагічны маніторынг» і, зыходзячы з яго вынікаў, выказала здагадку, калі чакаць «высокія ўзроўні захворвання».
Тады Мінздароўя заявіла, што ва ўсіх рэгіёнах краіны адзначаецца штотыднёвы прырост захворвання на вострыя рэспіраторныя інфекцыі, у тым ліку і COVID-19. У ведамстве паведамілі, што ў бягучым сезоне нельга выключыць высокія ўзроўні захворвання на грып сярод насельніцтва, «аднак рост захворвання на грып чакаецца не ў снежні 2023 года, а са студзеня па сакавік 2024 года».
У Міністэрстве нагадалі аб неабходнасці выкарыстоўваць сродкі абароны органаў дыхання, выконваць сацыяльную дыстанцыю (асабліва ў бальніцах і паліклініках) і правілы асабістай гігіены.
Тым часам расійскія распрацоўшчыкі вакцыны ад каронавіруса «Спутнік V», якой прышчапляюць у тым ліку і беларусаў, заявілі аб яе поўнай неэфектыўнасці супраць найноўшых штамаў COVID-19. У цяперашні час у Расіі вядуцца распрацоўкі абноўленай вакцыны.
Нагадаем, у першую хвалю каронавіруса, якая пракацілася па свеце ў 2020-2021 гадах, Лукашэнка спачатку адмаўляў наяўнасць самога ковіда, а потым казаў, што смяротна небяспечную хваробу трэба лячыць гарэлкай, дымам і лазняй. Можна ўпэўнена сцвярджаць, што ковіддысідэнцтва рэжыму каштавала жыццяў тысяч беларусаў. Улады дагэтуль хаваюць статыстыку смяротнасці за тыя гады.
Паводлеtelegraf.news