Беларускага блогера Дзяніса Лаўнікевіча закатавалі да паўсмерці

Жонка беларускага блогера, колішняга аўтара «Новага Часу» Дзяніса Лаўнікевіча Вікторыя Лаўнікевіч апублікавала страшную гісторыю, якая адбылася з яе мужам, меркавана, ва Украіне.

«Мы з дзіцем выязджалі на некалькі тыдняў у Заходнюю Украіну. У адзін з дзён з маім мужам рэзка знікла сувязь. Калі я змагла вярнуцца і выявіла нашу кватэру, то выявіла Дзяніса без прытомнасці на падлозе каля батарэі. Мяркуючы па стане, яго катавалі і збівалі некалькі дзён запар. Ён быў увесь абматаны смеццевымі пакетамі, на галаве — коўдра, поўны рот зямлі, на запясцях — выразны след ад кайданкоў.

Пасля двух тыдняў у шпіталі сінякі пачалі сыходзіць
Ад збіцця на ім літаральна не было жывога месца. Асабліва моцна білі па галаве, рэбрах, нырках, руках, нагах, пальцах ног.

Прысутнічалі нажавыя парэзы: на рэбрах, спіне, ягадзіцах.

Дзяніса прымусова паілі сумессю алкаголю з барбавалам і септылам (каля 10 упаковак, менавіта тое, што дасылалі нам для аказання валанцёрскай дапамогі людзям). Магчыма, таксама калолі метадонам або скапаламінам. Ва ўсякім разе, у смеццевым вядры была знойдзена іголка ад шпрыца з рэшткамі невядомай вадкасці, а ў пакоі — выкарыстаная вата. Урач канстатаваў, што было атручанне невядомым рэчывам (пасля двух сутак састаў рэчыва ўстанавіць не ўдалося), што выклікала сур'ёзнае паражэнне нервовай сістэмы і паловы лёгкіх.

У нашай кватэры было ўсё перавернута, многае пабіта і сапсавана (калі вы бачылі відэа аб знаходжанні рашыстаў у чужых хатах, то гэта прыкладна вось так). Дзяніса трымалі ў пакоі дзіцяці, што асабіста для мяне з'яўляецца дадатковым траўміруючым фактарам. У кватэры на месцах засталіся грошы і каштоўныя рэчы, што гаворыць аб тым, што галоўнай мэтай нападу было не рабаванне. Прапала інфармацыя. Ёсць падставы меркаваць, што адной з задач нападу было ўзяцце пад кантроль створаных намі каналаў і чатаў для беларусаў ва Украіне, ад мадэравання якіх з прычыны паступаючых пагроз мы адышлі восенню мінулага года, і да мадэравання якіх мы вымушана вярнуліся з-за пачатку вайны ва Украіне. Другой задачай было фізічнае знішчэнне Дзяніса пасля атрымання патрэбнай інфармацыі.

У тым, што меркавалася забойства, сумнявацца не даводзіцца. За апошнія гады ў Беларусі поўнасцю ідэнтычным чынам былі ліквідаваны ў розны час двое актывістаў: мужчына і жанчына.
Спроба ліквідацыі Дзяніса напрамую звязана з забойствам Віталя Шышова летам 2021 года. Для многіх не было сакрэтам, што яны размаўлялі і ўзаемадзейнічалі. Мала хто ведае, што за тры дні да смерці Віталя нас вельмі настойліва спрабавалі выцягнуць з дому незнаёмыя людзі. Пасля смерці Шышова любое жаданне "пазнаёміцца" рэзка знікла. Акрамя таго, у жніўні 2021-га я бачыла ў непасрэднай блізкасці ад нашага дома двух чалавек з так званай "расстрэльнай каманды". Усё гэта сведчыць аб тым, што на той момант было абыякава, каго з актывістаў дыяспары прыбраць. Тады прыбралі таго, да каго на той момант было лягчэй дацягнуцца. Да нас на той момант — цяжэй. Але ў сувязі з вайной такая магчымасць, нарэшце, прадставілася.
Следства не сумняваецца, што прычына нападу — тое, што за апошнія некалькі гадоў мы стварылі вялікую сетку тэлеграм-каналаў і чатаў для беларусаў ва Украіне, якая пачалася з канала "Прыгоды беларусаў у Кіеве". Гэтая сетка стала самым вялікім СМІ, якое ахапіла беларускую дыяспару ва Украіне.

Нашыя каналы і чаты для беларусаў ва Украіне спрабавалі ўзяць пад шчыльны кантроль са жніўня 2020 года, перыядычна арганізоўваючы розныя правакацыі. З пачаткам вайны гэтыя рэсурсы сталі стратэгічна важнымі, у тым ліку таму, што праз іх было б вельмі зручна арганізоўваць укідванні і распаўсюджваць фэйкі пра вайну ва Украіне. Такая неабходнасць, відавочна, стаяла востра, зыходзячы з таго, што ў першыя некалькі дзён вайны КДБ Беларусі прапанавала мужу "плённа ўзаемавыгадна пасупрацоўнічаць" — але было паслана ўслед за рускім ваенным караблём.
Што цікава — нават напад на Дзяніса не дазволіў ім перахапіць кантроль над рэсурсамі. Занадта шмат "засцерагальнікаў" мы ўбудавалі ў нашу сістэму. Увогуле, у іх нічога не атрымалася. (Ну, амаль нічога, — Дзяніс усё ж такі пабываў на тым свеце.) Сёння ўся наша сям'я знаходзіцца пад абаронай украінскіх спецслужбаў. Якія таксама адразу правялі паралель паміж леташнім забойствам у Кіеве Віталя Шышова і цяперашняй спробай забіць Дзяніса.
Дзяніс правёў у коме каля тыдня і перажыў некалькі клінічных смерцяў. Пасля — яшчэ тыдзень на ШВЛ. Увесь гэты час лекары ацэньвалі яго стан як вельмі цяжкі і не давалі больш за 30% на выжыванне. Тое, што Дзяніс наогул выжыў, — самы сапраўдны цуд.
Перыяд рэабілітацыі, паводле слоў урачоў, зойме да некалькіх месяцаў. З-за мэтанакіраваных удараў па галаве ўсярэдзіне ўтварылася мноства гематомаў, з памяці сцёрты падзеі апошняга года. "У хлам" разбіта правая рука — падобна, ёю ён абараняўся ад удараў па галаве.

Дрэнна з нагамі, якія і раней былі пашкоджаны. Але Дзяніс, тым не менш, "рвецца ў бой", хаця лячэнне яшчэ далёка не скончана».