Трамп «проста спытаў». Вашынгтон не хоча, каб Украіна бамбіла Маскву
Дональд Трамп заявіў, што першыя ракеты Patriot ужо адгружаюцца Украіне, аднак з наступальным узбраеннем пакуль яшчэ нічога не вырашана. І патлумачыў сваё пытанне Уладзіміру Зяленскаму наконт удараў па Маскве і Санкт-Пецярбургу. Ідзе 1239-ты дзень поўнамаштабнай вайны РФ супраць Украіны пра саўдзеле ў агрэсіі рэжыму Аляксандра Лукашэнкі.
За мінулыя суткі ва Украіне адбылося 171 баявое сутыкненне, паведамляе Генштаб УСУ ў ранішняй зводцы 16 ліпеня.
На Пакроўскім кірунку абаронцы Украіны спынілі 60 штурмаў расіян у раёнах Мікалаеўкі, Шаўчэнка, Арэхавага, Папова Яру, Міралюбаўкі, Лісоўкі, Котліна, Зверава, Удалага, Аляксееўкі і іншых.
На Новапаўлаўскім кірунку Сілы абароны Украіны спынілі 27 атак у раёнах Запарожжа, Паддубнага, Лясной, Мірнага, Шаўчэнка, Навасёлкі, Зялёнага Поля і іншых.
На Ліманскім кірунку расіяне атакавалі 25 разоў, спрабуючы прасунуцца паблізу Новага Свету, Новаегораўкі, Грэкаўкі, Карпаўкі, Студні, Зялёнай Даліны, Торскага і іншых.
На Паўночна-Слабажанскім (Курскім) кірунку за мінулыя суткі адбылося 21 баявое сутыкненне. На Тарэцкім кірунку расійцы здзейснілі 11 атак паблізу Дыліеўкі, Тарэцка, Новаспаскага і Русінага Яра.
Па сем атак на кожным было адбіта на Паўднёва-Слабажанскім (Харкаўскім) і Краматорскім кірунках.
* * *
Расійцы працягваюць спробы прарваць абарону ўкраінскіх абаронцаў на некалькіх кірунках фронту, піша Інстытут вывучэння вайны (ISW).
Геалакацыйныя кадры, апублікаваныя 15 ліпеня, сведчаць, што ўкраінскія сілы нядаўна прасунуліся ў Паўночнай Кандратоўцы Сумскай вобласці.
Паводле геалакацыйных кадраў, расійскія войскі нядаўна прасунуліся на поўнач ад Чырвонага Першага на Купянскім кірунку, а таксама на паўночны ўсход ад Грэкаўкі (паўднёвы ўсход ад Баравой).
На апублікаваных 15 ліпеня геалакацыйных кадрах бачна, як расійскія войскі падымаюць сцяг на паўночным захадзе Новаспаскага (на захад ад Тарэцка), што паказвае, што расійскія войскі, імаверна, захапілі населены пункт. «Імаверна», бо ў той жа дзень расійскі вайсковы блогер прызнаў, што баі за населены пункт працягваюцца.
Дадатковыя геалакацыйныя кадры, апублікаваныя 7 і 14 ліпеня, паказваюць, што расійскія войскі прасунуліся на паўночны захад ад Яблонаўкі і на паўднёвы ўсход ад Русіна Яра (абодва — на паўночны захад ад Тарэцка).
* * *
У ноч на 16 ліпеня аналітычны праект DeepState паведаміў аб прасоўванні расійскіх войскаў адразу ў некалькіх кірунках у Харкаўскай і Данецкай абласцях. Па даных DeepState, расійцы прасунуліся каля Свірнавага на Паўднёва-Слабажанскім кірунку ў Харкаўскай вобласці, а таксама каля Удалага на Пакроўскім кірунку, і паблізу Талстога і Фёдараўкі на Новапаўлаўскім кірунку.
* * *
У ноч на 16 ліпеня расійцы атакавалі Украіну балістычнай ракетай Іскандэр-М, а таксама больш за 400 беспілотнікамі розных тыпаў. Сілам СПА ўдалося знішчыць 198 ударных дронаў, яшчэ 145 БПЛА былі задушаныя сродкамі радыёэлектроннай барацьбы.
Масіраванай атацы падвергнулася Вінніца. У выніку ўдару зафіксаваныя трапленні па аб'ектах прамысловай і грамадзянскай інфраструктуры. Папярэдне сем пацярпелых, пяцёра з іх — з апёкамі, двое ў цяжкім стане.
У ноч на 16 ліпеня расійскія войскі атакавалі Краматорск. У выніку атакі ўспыхнуў пажар у шматпавярхоўцы.
Расійцы ў ноч на 16 ліпеня атакавалі Крывы Рог балістыкай і дронамі. У выніку абстрэлу разбурана прамысловае прадпрыемства, сур'ёзна паранены 17-гадовы хлопец.
Таксама ў гэтую ноч адбыўся масіраваны дронавы ўдар па Харкаве. На працягу 20 хвілін у Харкаве прагучала не менш за 17 выбухаў. Было атакавана грамадзянскае прадпрыемства, пацярпелі тры чалавекі.
* * *
* * *
Прэзідэнт ЗША Дональд Трамп падчас размовы з журналістамі заявіў, што праз 50 дзён для Расіі будзе «вельмі дрэнна», калі не будзе дасягнутае пагадненне аб спыненні агня ва Украіне.
«Праз 50 дзён, калі мы не заключым пагадненне, гэта будзе вельмі дрэнна. Будуць мыты, будуць іншыя санкцыі, накіраваныя на Маскву», — заявіў ён.
На пытанне, чаму Трамп даў Пуціну так шмат часу, ён адказаў: «Я не думаю, што 50 дзён — гэта вельмі доўга, і гэта можа адбыцца раней».
* * *
Тым часам у Крамлі не ўспрынялі ўсур'ёз патрабаванне Трампа дасягнуць пагаднення аб міры ва Украіне цягам 50 дзён. Масква падкрэсліла, што працягне «дасягаць сваіх мэтаў у вайне», нягледзячы на міжнародны ціск і эканамічныя санкцыі — Інстытут вывучэння вайны (ISW) сабраў рэакцыю расійскіх афіцыйных асоб на ўльтыматум Трампа.
Намеснік міністра замежных спраў Расіі Сяргей Рабкоў у каментары расійскаму дзяржаўнаму інфармагенцтву ТАСС заявіў, што Расія лічыць «непрымальнымі» любыя спробы вылучаць ёй патрабаванні, «асабліва ультыматумы».
Спікер Крамля Дзмітрый Пяскоў паўтарыў словы Рабкова і абвінаваціў Кіеў у адсутнасці прагрэсу для далейшага дыялогу.
Намеснік старшыні Савета бяспекі РФ Дзмітрый Мядзведзеў у сваім акаўнце ў сацсетцы X заявіў, што «Расію не хвалююць тэатральныя ўльтыматумы Трампа».
Міністр замежных спраў Расіі Сяргей Лаўроў заявіў, што РФ зможа справіцца з амерыканскімі тарыфамі, паколькі яна ўжо «справілася» з папярэднімі санкцыямі.
Дэпутат Дзярждумы і лідар партыі «Справядлівая Расія» Сяргей Міронаў падкрэсліў, што патэнцыйнае ўзмацненне эканамічнага ціску не паўплывае на ход і мэты вайны РФ ва Украіне.
Прэзідэнт Расіі Уладзімір Пуцін пакуль афіцыйна не адказаў Трампу і, верагодна, «поўны рашучасці працягваць вайну, паколькі лічыць, што Расія можа вытрымаць любыя далейшыя эканамічныя цяжкасці, якія накладзе Захад», адзначаюць эксперты ISW.
* * *
Сенатар ЗША Ліндсі Грэм у сацсетцы Х перасцярог Пуціна ад памылкі, нагадаўшы, як у свой час ЗША жорстка пакаралі Іран.
Грэм адзначыў, што Расію і яе партнёраў могуць чакаць сур'ёзныя наступствы, калі прэзідэнт Расіі Уладзімір Пуцін не пагодзіцца спыніць баявыя дзеянні на працягу наступных 50 дзён.
«Калі Пуцін і іншыя задаюцца пытаннем, што адбудзецца на 51-шы дзень, я б параіў ім звярнуцца да аятолаў. Калі б я быў краінай, якая купляе танную расійскую нафту, падтрымліваючы вайсковую машыну Пуціна, я б паверыў прэзідэнту Трампу на слова», — напісаў сенатар, асабліва акцэнтуючы, што Расія рызыкуе аказацца пад беспрэцэдэнтным эканамічным ціскам.
Такім чынам, Ліндсі Грэм прама заявіў, што для Расіі наступствы могуць быць значнымі нават без прамога ваеннага ўдару, а ў выглядзе жорсткіх эканамічных санкцый і павышаных пошлін.
* * *
Дональд Трамп паведаміў журналістам, што першыя ракеты Patriot ужо адгружаюцца хаўруснікам, а гэта значыць, што неўзабаве іх атрымае Украіна, піша Reuters. «Яны паступаюць з Германіі, а затым замяняюцца Германіяй. І ва ўсіх выпадках Злучаныя Штаты атрымліваюць поўную аплату», — сказаў Трамп.
У той жа час Трамп заявіў, што не плануе перадаваць Украіне дальнабойныя ракеты JASSM — высокадакладныя крылатыя ракеты вялікай далёкасці, прызначаныя для паразы добра абароненых наземных мэтаў.
* * *
Таксама Дональд Трамп адмовіўся ад сваёй прапановы прэзідэнту Украіны Уладзіміру Зяленскаму нанесці ўдар па Маскве.
Журналісты спыталі ў Трампа, ці можа Зяленскі ўдарыць па Маскве. «Не, ён не павінен наносіць удары па Маскве», — адказаў прэзідэнт ЗША.
Раней Financial Times пісала, што Трамп падчас перамоваў з Зяленскім 4 ліпеня нібыта заклікаў яго актывізаваць удары па РФ і пацікавіўся, ці зможа Кіеў нанесці ўдар па Маскве. Зяленскі адказаў Трампу, што такія ўдары магчымыя пры наяўнасці адпаведнай зброі.
Прэс-сакратарка Белага дома Кэралайн Левіт патлумачыла, што амерыканскі лідар «проста задаў пытанне» і не заклікаў да бамбёжкі Масквы.
* * *
Міністры замежных спраў ЕС актыўна абмяркоўваюць стварэнне механізму падтрымкі, які дазволіць выкарыстоўваць замарожаныя актывы Расійскай Федэрацыі для аплаты амерыканскіх паставак зброі Украіне, піша The Telegraph.
15 ліпеня ў Брусэлі адбылася сустрэча прадстаўнікоў краін Еўрапейскага Саюза. Асноўным пытаннем сустрэчы стала абмеркаванне працэсу закупкі для Украіны ўзбраенняў у ЗША, а таксама спосабаў яго рэалізацыі.
Чакаецца, што каардынацыйную ролю ў перадачы зброі будзе адыгрываць NATO праз сваю місію падтрымкі Украіны. У якасці верагоднага варыянту фінансавання абмяркоўваецца стварэнне адзінай фінансавай базы з удзелам еўрапейскіх краін і Канады.
Міністр замежных спраў Польшчы Радаслаў Сікорскі выступіў з прапановай прыцягнуць для пакрыцця выдаткаў замарожаныя расійскія актывы, адзначыўшы: «Чаму гэта павінна быць цяжарам для нашых падаткаплацельшчыкаў, калі ёсць магчымасць выкарыстоўваць сродкі Расіі?».
Такім чынам можа атрымацца, што зброю для Украіны аплаціць РФ.