Стала вядома, калі Украіна зможа скарыстацца амерыканскім ленд-лізам

Для гэтага Украіна спачатку павінна вычарпаць пакет дапамогі ад Кангрэсу. Пасля заканчэння фінансавання бюджэтных праграм ЗША па ваеннай падтрымцы Украіны Кіеў зможа звярнуцца па пастаўкі ўзбраення па ленд-лізу. Пра гэта паведаміла амбасадар Украіны ў Вашынгтоне Аксана Маркарава ў інтэрв'ю «Голасу Амерыкі».

«Пазіцыя Пентагона заключаецца ў тым, што цяпер, калі ёсць гэтыя праграмы фактычна грантавай, бязвыплатнай перадачы нам зброі, фокус будзе на іх. Фокус Пентагона цяпер — максімальна хутка знаходзіць тую зброю, якая нам трэба, і прадастаўляць яе нам праз гэтыя праграмы», — патлумачыла Маркарава.

Яна адзначыла, што ленд-ліз — гэта дадатковы інструмент, які Украіна пачне больш актыўна ўжываць у выпадку неабходнасці, калі будуць заканчвацца сродкі з іншых праграм.

«Тады будзе два варыянты. Альбо мы ў гэты момант хутка падлучаем ленд-ліз, альбо мы звяртаемся да Кангрэсу з дадатковымі запытамі. Дакладней, мы звяртаемся да адміністрацыі ЗША, а адміністрацыя звяртаецца да Кангрэсу», — дадала амбасадар Украіны ў Злучаных Штатах.

Паводле яе слоў, грошы ад праграмы падтрымкі неабходна выкарыстоўваць да канца фіскальнага года ЗША ў верасні. Маркарава не выключае, што яны могуць скончыцца і да гэтага.

«Складана сказаць, калі скончацца гэтыя сродкі — мы хочам, каб нам перадавалі хутчэй. Магчыма, яны скончацца і раней, але пакуль пра гэта цяжка казаць», — зазначыла пасол.

Раней паведамлялася, што ЗША ў новым абаронным бюджэце павялічылі дапамогу Украіне, але ёсць жорсткія ўмовы.

Паводле unian.net.