Кангрэс ЗША прапануе ўвесці пошліны ў 500%, калі Расія сарве мірнае пагадненне

У адміністрацыі Дональда Трампа ўсё больш расчароўваюцца ў планах хутка скончыць вайну ва Украіне. І, падобна, што ўрэшце асэнсоўваюць: Пуцін не зацікаўлены спыняць агрэсію. А таму ў Кангрэсе ЗША плануюць санкцыі супраць Расіі і яе партнёраў. Ідуць 1134-я суткі вайны РФ супраць Украіны пры саўдзеле ў агрэсіі рэжыму Лукашэнкі.

За мінулыя суткі на франтах ва Украіне зафіксавана 176 баявых сутыкненняў, паведамляе Генштаб УСУ ў ранішняй зводцы 2 красавіка.

Пакроўскі кірунак застаецца самым «гарачым» — там абаронцы Украіны спынілі 64 атакі расіян ў раёнах Калінавага, Тарасаўкі, Бярозаўкі, Зялёнага, Котліна, Вадзянога Другога, Елізаветаўка, Лісоўкі, Удалага і іншых.

На Ліманскім кірунку расіяне атакавалі 17 разоў, спрабуючы прасунуцца наперад у бок Торскага, Новага, Мірнага, Новаміхайлаўкі і Зялёнай Даліны.

На Северскім кірунку армія РФ 15 разоў атакавала у раёнах Белагораўкі, Івана-Дар'еўкі, і ў бок Верхнекаменскага і Серабранкі. 

На Купянскім кірунку за мінулыя суткі адбылося 11 атак расіян, на Тарэцкім кірунку армія РФ здзейсніла 14 атак у раёнах Дачнага, Шчарбінаўкі, Тарэцку і ў бок Дыліеўкі.

У Курскай вобласці Расіі за мінулыя суткі адбылося 18 боесутыкненняў. Расіяне зладзілі 27 авіяцыйных удараў па сваёй тэрыторыі, скінуўшы 41 кіраваную авіяцыйную бомбу.

* * * 

Амерыканскі Інстытут вывучэння вайны (ISW) фіксуе прасоўванне расійскіх войскаў на Ліманскім, Пакроўскім і Курахоўскім кірунках, а таксама ў Курскай і Белгародскай абласцях.

Геалакацыйныя кадры, апублікаваныя 1 красавіка, паказваюць, што расійцы прасунуліся на ўсход ад Алешні (на паўднёвы захад ад Суджы). Расійскія крыніцы сцвярджаюць, што баі працягваліся ў раёне Басоўкі і Жураўкі ў Сумскай вобласці і на поўдзень ад Суджы ў раёне Гуева Курскай вобласці.

Геалакацыйныя кадры, апублікаваныя 31 сакавіка, паказваюць, што войскі РФ прасунуліся ў цэнтральную частку Дзямідаўкі Белгародскай вобласці.

Кадры, апублікаваныя 28 сакавіка, паказваюць, што войскі РФ нядаўна прасунуліся на паўночны захад ад Новалюбаўкі (на паўночны ўсход ад Лімана) і, верагодна, акупавалі саму Новалюбаўку Луганскай вобласці.

Расійцы нядаўна прасунуліся на Пакроўскім кірунку. Як паказваюць апублікаваныя 1 красавіка геалакацыйныя кадры, войскі РФ прасунуліся на ўсходнюю ўскраіну Багданаўкі (на паўднёвы захад ад Пакроўска).

Прадстаўнік АСУВ «Хорціца» Віктар Трэгубаў 1 красавіка паведаміў, што армія РФ засяроджвае свае ўдары на ўсход ад Пакроўска і адыходзіць ад спробаў ахапіць горад з захаду.

Як дэманструюць геалакацыйныя кадры, апублікаваныя 31 сакавіка і 1 красавіка, войскі РФ прасунуліся на паўночны захад ад Андрэеўкі (на захад ад Курахава), і нядаўна акупавалі Разліў (на паўднёвы захад ад Курахава) Данецкай вобласці.

* * *

Расія рыхтуе рэзервы, каб паспрабаваць ажыццявіць наступ на фронце ў траўні гэтага года, напісаў у сваім Telegram-канале кіраўнік Цэнтра процідзеяння дэзінфармацыі (ЦПД) Андрэй Каваленка.

У апошні час паведамленні аб падрыхтоўцы Расіяй новага наступу ва Украіне з'яўляюцца ўсё часцей. Напрыклад, Associated Press са спасылкай на прадстаўнікоў урада Украіны, вайскоўцаў і аналітыкаў пісала, што расійцы могуць пачаць наступ ужо ў бліжэйшыя тыдні.

Аналітыкі лічаць, што асноўныя ўдары РФ могуць быць накіраваны супраць паўночна-ўсходніх рэгіёнаў Украіны: Запарожскай, Сумскай, а таксама Харкаўскай абласцей.

* * *

Расійская армія мае дзесяціразовую перавагу ў жывой сіле паблізу горада Ліман у Данецкай вобласці і рыхтуецца да далейшага маштабнага наступу ў гэтым раёне, мяркуюць аналітыкі Інстытута вывучэння вайны (ISW).

У ISW нагадалі, што ў пачатку студзеня войска РФ прасунулася праз раку Жарабец на заходні (правы) бераг, і цягам апошніх трох месяцаў павольна пашырала свой плацдарм на правым беразе.У справаздачы таксама мяркуецца, што расійскія войскі могуць выкарыстоўваць свой пашыраны плацдарм на паўночны ўсход ад Лімана для падтрымкі захопу Баравой або Лімана ў бліжэйшыя месяцы.

«Далейшае прасоўванне расійскіх войскаў у кірунку Баравой і Лімана з'яўляецца часткай працяглых намаганняў Расіі, накіраваных на тое, каб выцесніць украінскія сілы з пазіцый на ўсходнім беразе ракі Аскол і прасунуцца далей у заходнюю частку Харкаўскай вобласці, а таксама стварыць умовы для наступу на пояс украінскіх умацаванняў у Данецкай вобласці з поўначы», — перакананыя ў ISW.

* * *

З вечара 1 красавіка расійскія войскі атакавалі Украіну 74-ма ўдарнымі БПЛА тыпу Shahed і беспілотнікамі розных тыпаў, паведамілі Паветраныя сілы УСУ. Пацверджана збіццё 41 ударнага БПЛА тыпу Shahed і беспілотнікаў іншых тыпаў на поўначы, поўдні і ўсходзе краіны. 20 беспілотнікаў лакацыйна страчаныя (без негатыўных наступстваў).

* * *

* * *

Чыноўнікі адміністрацыі прэзідэнта ЗША Дональда Трампа ў апошнія дні абмяркоўваюць верагоднасць таго, што ЗША не змогуць забяспечыць мірнае пагадненне па Украіне ў бліжэйшыя некалькі месяцаў. У сувязі з гэтым яны распрацоўваюць новыя планы ціску як на Кіеў, так і на Маскву, піша Reuters са спасылкай на дасведчаных амерыканскіх чыноўнікаў.

Выданне адзначае, што пасля серыі перамоваў на выходных афіцыйныя асобы ў Белым доме і Дзяржаўным дэпартаменце ЗША прызналі, што расійскі кіраўнік Уладзімір Пуцін актыўна процідзейнічае спробам Вашынгтона дасягнуць працяглага мірнага пагаднення і абмеркавалі эканамічны і дыпламатычны ціск, каб падштурхнуць Расію да пагаднення.

«Трамп тыднямі заяўляў, што давярае расійскаму кіраўніку і верыць, што лідар (РФ) адданы міру, але ў апошнія дні Белы дом насцярожана ставіцца да намераў Пуціна, паведамілі крыніцы, хоць Трамп працягвае публічна дэманстраваць сваю веру ў тое, што Пуцін хоча... Незразумела, якія канкрэтныя планы можа мець адміністрацыя (Трампа – Рэд.) па ціску на Маскву, але адзін высокапастаўлены чыноўнік ЗША сказаў, што Белы дом працягвае разглядаць увядзенне дадатковых тарыфаў і санкцый, якія ён можа ўжыць да Расіі», — піша Reuters.

* * *

У Сенаце ЗША прадставілі законапраект аб новых санкцыях супраць Расіі за адмову Крамля ад мірнага пагаднення, піша The Washington Times.

Сааўтары законапраекта — 50 сенатараў, пароўну рэспубліканцаў і дэмакратаў, што сведчыць аб шырокай двухпартыйнай падтрымцы ініцыятывы.

«У Сенаце Злучаных Штатаў дамінуе меркаванне, што Расія з'яўляецца агрэсарам, і што жудасная вайна і агрэсія Пуціна павінны спыніцца цяпер і стрымлівацца ў будучыні», — гаворыцца ў сумеснай заяве сенатараў.

Санкцыі будуць уведзеныя ў дзеянне, калі мірныя перамовы будуць сарваныя, або калі пагадненне будзе дасягнутае, але яго парушыць Расія.

Законапраект прадугледжвае як першасныя, так і другасныя санкцыі супраць Расіі і асоб, якія падтрымліваюць агрэсію Крамля ва Украіне. Сярод санкцый ёсць 500% пошліны на імпартныя тавары з краін, якія купляюць расійскую нафту, газ, уран і іншыя рэсурсы.