«Гэта былі вельмі светлыя людзі»: Гісторыя сям'і з Крывога Рогу, якая загінула ад расійскай ракеты

Крывы Рог абвясціў жалобу па сям'і, якая загінула 11 лістапада ў сваім доме пасля трапляння расійскай ракеты ў іх жылы дом. Так 33-гадовы Максім Кулік за лічаныя хвіліны страціў усю сваю сям'ю – жонку Алену і траіх сваіх дзяцей.

Расійская ракета пазбавіла жыцця 32-гадовую Алену Кулік і траіх яе дзяцей — двухмесячную Ульяну, Дзяміда, якому было 2 гады і 9 месяцаў, і дзесяцігадовага Кірыла. Жывым застаўся толькі бацька сямейства – Максім Кулік, піша BBC Украіна.

Ля пад'езда разбуранага дома — кветкі і цацкі, сям'ю Кулікоў добра ведалі ў горадзе.

Раніцай у панядзелак, 11 лістапада, у Крывым Рогу прагучала паветраная трывога.

Горад быў абстраляны балістычнай ракетай, паведаміў кіраўнік Рады абароны Крывога Рогу Аляксандр Вілкул. Паводле яго слоў, гэта была ракета «Іскандэр-М», якая была запушчаная з Крыма.

Ракета трапіла ў шчыльную гарадскую забудову — разбурыўла ўвесь пад'езд пяціпавярховага дома. Алена і Максім Кулікі з трыма дзецьмі жылі ў адной з яго кватэр на трэцім паверсе.

Мужчыну цудам удалося выратавацца.

«Калі трапіла ракета, Алена карміла дзіцятка»

Сябры сям'і Кулікоў распавялі tsn.ua. падрабязнасці жудаснай трагедыі ў Крывым Рогу, якая ўскалыхнула ўсю Украіну. 

Самай маленькай дзяўчынцы было 2 месяца, у момант трапляння маці карміла немаўля. Бацька дзяцей выжыў пасля таго, як выйшаўшы на кухню і з-за разбурэння перакрыццяў праваліўся да суседзяў, якія жылі на павер ніжэй.

ТСН адшукаў сябра гэтай сям'і, крыварожскага фатографа Аляксандра Дзігцяра.

Ледзь стрымліваючы слёзы, Аляксандр распавёў: «З Максімам я не змог цяпер пагутарыць, ён проста не можа размаўляць... як кажуць у народзе, у яго шторы на вачах».

І працягнуў: «У момант трапляння ракеты яны былі дома, гэта 5 членаў сям'і – ён, жонка і трое дзяцей. Жонка карміла самае маленькага дзіцяці, двое іншых дзяцей, 10-гадовы Кірыл і Дзямід, якому было 2,8, гулялі побач. Максім пайшоў на кухню нешта ўзяць, магчыма, вады ці за сурвэткамі. Пачуўся выбух, Макс апынуўся на другім паверсе, у кухні ў суседа. Ён стаў спрабаваць трапіць на свой паверх, але праз абрынутыя перакрыцці не змог гэтага зрабіць. Да дома аператыўна прыехалі «хуткая», пажарныя, паліцыя, пачалі адцягваць Макса ад дома, таму як была пагроза новага абвальвання». 

Пра сям'ю Максіма Куліка Аляксандр кажа, што яна была пазітыўнай і жыццярадаснай. 

«Я не ведаю, у якую царкву хадзіў Максім, але ведаю, што яшчэ падчас кавіду Макс валанцёрыў, падкормліваў бяздомных, развозіў боксы з ежай, Алена была ў дэкрэтным адпачынку», — кажа Аляксандр.

Аляксандр дадае: «У сацсетках я ўбачыў, што ракета трапіла ў іх дом. Брат Максіма сказаў мне, што навіны дрэнныя. Я прыехаў на месца і ўбачыў усё гэта... Для Максіма і жонкі дзеці былі сэнсам жыцця, кветкамі. У планах у іх было і чацвёртае дзіця. Цяпер ён страціў усё... цяпер з ім яго бацькі, брат, з Максам немагчыма звязацца, ён не размаўляе... Завалы разбіралі каля 14 гадзін. Як я зразумеў, траплянне было як у той пакой, дзе былі Алена з дзецьмі. Увесь стаяк заваліўся. Цагляны дом рассыпаўся як пясочны», — кажа Аляксандр.

Маці Максіма Куліка, Ірына, распавяла «Суспільному» наступнае: «Сын пайшоў на кухню гатаваць сняданак, застаўся жывы. Упаў на другі паверх».

Жанчына, калі пачула пра ракетны ўдар, адразу прыбыла на месца трагедыі.

«Я была на працы, пачула выбух, пачала тэлефанаваць — не адказваюць. Прыехала і ўбачыла такую бяду», — распавяла бабуля загінулых дзяцей.

Яна да апошняга спадзявалася, што нявестка і ўнукі знойдуцца. Але ўвечары, пасля больш чым 13 гадзін пошукаў, ратавальнікі знайшлі цела Алены, а да раніцы — і целы дзяцей.

Прэзідэнт Украіны Уладзімір Зяленскі, каментуючы трагедыю, назваў расійскіх вайскоўцаў «тэрарыстамі».

«Крывы Рог. Звычайная пяціпавярхоўка, якую расійскія тэрарысты абстралялі ракетай. Разбураныя кватэры з першага па пяты паверх аднаго з пад’ездаў», — сказаў Зяленскі.

Усяго ад удару балістычнай ракеты пашкоджана больш за 40 шматпавярховых дамоў. Пацярпелі 14 чалавек, двое з іх дзеці. 11-гадовага хлопчыка шпіталізавалі.

Што вядома пра сям'ю

«Усе, хто іх ведаў, кажуць, што гэта былі вельмі светлыя людзі».

У каментарах журналістам і ў допісах у сацыяльных сетках жыхары горада ўспамінаюць загінуўшую сям'ю.

Алена Кулік, цела якой ноччу знайшлі ратавальнікі, працавала аператарам у чыгуначным цэху кампаніі «Стыл Сэрвіс». Але калі здарылася трагедыя, яна была ў дэкрэтным адпачынку.

Толькі два месяцы таму жанчына нарадзіла дачку, пра якую яны з мужам так доўга марылі.

Максім і яго маці Ірына працуюць на заводзе «АрселорМіттал Крывы Рог». Максім — дыспетчар на чыгунцы.

«Яны былі вельмі прыгожай парай, усюды былі разам», — напісала ў сацсетках карыстальніца yevheniia_bezi_, і дадала, што ведала сям'ю асабіста.

Алена, Максім і Ірына з’яўляліся сябрамі мясцовай рэлігійнай суполкі – царквы Благаславення ў Радушным.

«Гэта такая цудоўная сям’я, — распавёў мясцоваму тэлеканалу «Рудана» евангеліст Мікалай Каралюк.

Ён расказаў, што сям'я прыйшла ў царкву каля сямі гадоў таму. І з таго часу яны дапамагаюць малазабяспечаным людзям, раздаюць абеды бяздомным. Максім удзельнічаў ва ўсіх грамадскіх мерапрыемствах, дапамагаў у дзіцячых прытулках.

«Гэта людзі з вялікай літары, — дадае Каралюк, — Воленька таксама была прыхаджанкай нашай царквы, але яна была больш занятая трыма дзецьмі. Яна была прыгожай дзяўчынай, цудоўнай маці для дзяцей, мела вельмі добрае сэрца».

Мужчына дадае, што «ў царкву са спачуваннямі тэлефануюць браты і сёстры з Амерыкі і іншых краін».

13 лістапада аб'яўлены ў Крывым Рогу днём жалобы.

Кожную ноч у Крывым Рогу гучаць сігналы аб налёце, паведаміла BBC Украіна журналістка Іна Іванчанка. Але горад жыве, працуюць камунальныя службы, працуюць установы.

Паводле tsn.ua,  www.bbc.com, suspilne.media