987-мы дзень вайны. «Першыя баі з паўночнакарэйскімі салдатамі адкрываюць новую старонку нестабільнасці ў свеце»

8 чалавек загінулі ў выніку расійскага ракетнага абстрэлу Запарожжа. Зяленскі павіншаваў Трампа з перамогай на прэзідэнцкіх выбарах. Распавядаем пра галоўныя падзеі чарговага дня поўнамаштабнай вайны Расіі супраць Украіны. 

8 чалавек загінулі, 25 атрымалі раненні ў выніку расійскага ракетнага абстрэлу Запарожжа

За суткі акупанты нанеслі 301 удар па 13 населеных пунктах Запарожскай вобласці, паведаміў кіраўнік адміністрацыі Запарожскай вобласці Іван Фёдараў.

Паступіла 8 паведамленняў аб разбурэнні жылых дамоў і аб'ектаў інфраструктуры.

Зяленскі: першыя баі з паўночнакарэйскімі салдатамі адкрываюць новую старонку нестабільнасці ў свеце

Прэзідэнт Украіны Уладзімір Зяленскі ўслед за міністрам абароны Умеравым заявіў аб першых баях ўкраінскіх вайскоўцаў з паўночнакарэйскімі і сказаў, што яны азначаюць новы этап у дэстабілізацыі абстаноўкі ў свеце, перадае Бі-бі-сі.

«Першымі баямі з паўночнакарэйскімі салдатамі адчыняецца новая старонка нестабільнасці ў свеце. Мы павінны разам са светам зрабіць усё, каб гэты расійскі крок да пашырэння вайны, да сапраўднай эскалацыі […] стаў пройгрышным. І для яго [для Пуціна], і для Паўночнай Карэі», — сказаў Зяленскі ў вечаровым відэазвароце ў аўторак.

Раней у аўторак міністр абароны Украіны Рустэм Умераў у інтэрв'ю паўднёвакарэйскаму тэлеканалу KBS пацвердзіў паведамленні аб невялікіх боесутыкненнях украінскіх вайскоўцаў з паўночнакарэйскімі ў Курскай вобласці.

"Мы фіксуем кантакты з паўночнакарэйскімі сіламі, але мы лічым, што праз некалькі тыдняў будзе большая колькасць баявых сутыкненняў, і мы будзем іх адпаведна аналізаваць і пераглядаць", — сказаў Умераў.

Пераканаўчых доказаў таго, што ўкраінскія вайскоўцы сапраўды ўступалі ў бой з паўночнымі карэйцамі, украінцы пакуль не прад'яўлялі, удакладняе Бі-бі-сі.

У ноч на 6 лістапада Расія нанесла ўдар па Адэсе дзвюма кіраванымі авіяцыйнымі ракетаміХ-59 і Х-31П

Таксама, як паведамляюць Паветраныя Сілы УСУ, праціўнік выпусціў 63 ударных БПЛА тыпу «Шахед» і неўстаноўленых беспілотнікаў з напрамкаў Бранск, Прыморска-Ахтарск, Арол - РФ, Чаўда - Крым. 38 беспілотнікаў былі збітыя, яшчэ 20  беспілотнікаў «страцілі па дыслакацыі ў розных рэгіёнах Украіны», яшчэ два – у паветранай прасторы Украіны.

Зяленскі павіншаваў Трампа з  перамогай на выбарах

Прэзідэнт Украіны апублікаваў у сацсетцы X віншаванне Дональда Трампа з перамогай на выбарах прэзідэнта ЗША.

5 цікавых фактаў пра перамогу Трампа

«Я ўспамінаю нашу выдатную сустрэчу з прэзідэнтам Трампам яшчэ ў верасні, калі мы падрабязна абмяркоўвалі ўкраінска-амерыканскія адносіны, стратэгічнае партнёрства, "план перамогі" і спосабы пакласці канец расейскай агрэсіі супраць Украіны. Я шаную прыхільнасць прэзідэнта Трампа да падыходу "мір праз сілу" ў глабальных справах. Менавіта гэты прынцып можа практычна наблізіць справядлівы сьвет ва Ўкраіне. Я спадзяюся, што мы разам прывядзем яго ў дзеянне», — напісаў ён.

Прэзідэнт Турцыі Рэджэп Таіп Эрдаган, віншуючы Трампа, заявіў, што разлічвае на тое, што "рэгіянальныя і глабальныя крызісы і войны, асабліва палестынскае пытанне і расійска-ўкраінская вайна, спыняцца", і "будзе прыкладзена больш намаганняў для стварэння больш справядлівага свету".

Украінскі беспілотнік сёння раніцай атакаваў Дагестан. Што вядома

Сёння раніцай кіраўнік Дагестана Сяргей Мелікаў паведаміў, што сілы СПА знішчылі над Каспійскім беспілотнік, перадае Бі-бі-сі. Ніякіх падрабязнасьцяў здарэння ён не паведаміў, уключаючы інфармацыю аб пацярпелых людзях або аб'ектах.

Праз некалькі гадзін у Міністэрстве аховы здароўя Дагестана заявілі, што «аскепкам ад знішчанага дрона была лёгка параненая дзяўчына 16 гадоў», але стан дзяўчыны "здавальняючы".

Блізкі да расійскіх сілавікоў тэлеграм-канал Mash паведамляў са спасылкай на відавочцаў, што чуваць было два выбухі.

"Украінская праўда" са спасылкай на крыніцу ва ўкраінскіх спецслужбах паведамляе, што сёння ўкраінскія беспілотнікі ўразілі марскую базу Каспійскай флатыліі ВМФ Расіі. У выніку ўдараў былі ўражаныя сама меней два аб'екты, адзначае выданне. Незалежных пацверджанняў гэтай інфармацыі пакуль няма, падкрэслівае Бі-бі-сі.