564-ты дзень вайны. Украінскія сілы вызвалілі Андрэеўку, Расія можа вярнуцца да «збожжавай угоды»

Украінскія войскі працягваюць «сціплы контрнаступ». Яны не паведамляюць пра вызваленне Андрэеўкі ў Данецкай вобласці, але пра гэта паведамляюць расійскія крыніцы. Тым часам эксперты кажуць пра тэрміны заканчэння контрнаступу, а ўкраінскія вайскоўцы — пра яго працяг у любым выпадку.

Сітуацыя на франтах

Як піша амерыканскі Інстытут вывучэння вайны (ISW), украінскія вайскоўцы працягваюць наступальныя аперацыі на некалькіх кірунках. Яны дамагліся поспеху на поўдзень ад Кляшчэеўкі. Расійскі вайсковы блогер сцвярджаў, што УСУ цалкам выцеснілі акупантаў з Андрэеўкі, хоць у ISW яшчэ няма візуальнага пацвярджэння гэтаму. Той жа блогер дадаў, што расійская лінія кантролю ў гэтым раёне цяпер праходзіць уздоўж чыгуначнага шляху на ўсход ад Андрэеўкі і Кляшчэеўкі. Іншыя расійскія крыніцы прызналі, што ўкраінскія сілы кантралююць большую частку Кляшчэеўкі.

9 верасня ўкраінскія войскі працягвалі весці наступальныя аперацыі ў раёне Бахмута і, як паведамляецца, прасунуліся. Начальнік прэс-службы Усходняй групоўкі войскаў Ілля Еўлаш заявіў, што ўкраінскія сілы атрымалі поспех на поўдзень ад Кляшчэеўкі.9 верасня расійскія войскі здзейснілі контратаку ў раёне Бахмута, але не дамагліся ніякіх пацверджаных поспехаў. 

Украінскі Генштаб паведаміў, што расійскія сілы 10 разоў беспаспяхова спрабавалі выбіць украінскія сілы з пазіцый паблізу Аўдзееўкі і Мар'інкі.

Украінскія войскі вялі наступальныя аперацыі ў раёне заходняй мяжы Данецкай і ўсходу Запарожскай абласцей і прасунуліся 9 верасня. УСУ прасоўваліся на паўночна-захад ад Новамаёрскага, на паўночны ўсход і ўсход ад Новапракопаўкі, на захад ад Вербавай і на поўдзень ад Рабоцінаша.

Брытанская вайсковая выведка паведамляе, што ўкраінская пяхота працягвае тактычнае наступленне на расійскія пазіцыі на ўсход ад Рабоцінага, вымотваючы расійскія войскі. Мяркуючы з усяго, Расія перакінула на поўдзень сілы з іншых участкаў фронту, каб замяніць выматаныя падраздзяленні пад Рабоціным.

Брытанская выведка адзначае, што такая перадыслакацыя абмяжоўвае магчымасць расійскай арміі праводзіць уласныя наступальныя аперацыі на іншых участках лініі фронту, а сама перадыслакацыя з'яўляецца прыкметай моцнага ціску на расійскія абарончыя лініі, асабліва вакол Рабоцінага.

Атакі дронаў

Уначы 10 верасня Расія запусціла па тэрыторыі Украіны 33 БПЛА тыпу Shahed-136/131. Сілы СПА Украіны «прызямлілі» 26 беспілотнікаў, паведамляе прэс-служба паветраных сіл УСУ.

Беспілотнікі запускалі з паўночнага напрамку, верагодна, тэрыторыі Курскай вобласці, іх мэтай быў Кіеў.

У выніку начной атакі падзенне абломкаў варожых дронаў зафіксавалі ў чатырох раёнах Кіева — пашкоджаная кватэра, машыны, тралейбусныя лініі электраперадачы і дарожныя знакі, гарэла трава і шпалы.

Расіяне заявілі, што ўначы 10 верасня беспілотнікі атакавалі часова акупаваны Крым. Расійскае СПА нібыта збіла восем дронаў. У атацы дронаў Расея традыцыйна абвінаваціла Украіну. Акрамя таго, Мінабароны РФ заявіла, што гэтай ноччу ў акваторыі Чорнага мора акупанты нібыта знішчылі тры хуткаходныя катэры УСУ, якія рухаліся ў кірунку крымскага ўзбярэжжа. Таксама нібыта ліквідаваныя і дэсантныя групы ВСУ.

Брытанская выведка мяркуе, што атакі беспілотнікамі расейскіх аэрадромаў у глыбокім тыле, амаль дакладна ажыццяўляюцца з тэрыторыі Расіі. «Улічваючы абмежаваную далёкасць беспілотнікаў-квадракоптараў, іх амаль дакладна запускаюць з тэрыторыі РФ», — піша ў зводцы Міністэрства абароны Вялікабрытаніі.

Таксама выведка звярнула ўвагу на заяву губернатара Пскоўскай вобласці РФ, які распарадзіўся арганізаваць «валанцёрскія патрулі» для прадухілення далейшых нападаў на вайсковы аэрадром «Крыжы», дзе 29 жніўня атрымалі пашкоджанні два Іл-76.

Паведамляецца, што ў атрады для барацьбы з беспілотнікамі запісаліся каля 800 чалавек — іх плануюць падзяліць на групы па 50 чалавек, якія будуць патруляваць пэўныя зоны — памежныя раёны, важныя аб'екты інфраструктуры і аэрадромы.

Выведка лічыць, што гэтыя валанцёрскія патрулі, верагодна, стануць элементам стрымлівання і дадуць нейкую абарону ад магчымага запуску дронаў непасрэдна побач з аэрадромам. Але паколькі збіваць беспілотнікі са стралковай зброі аказалася складана, то расійцам для абароны гэтых аб'ектаў усё роўна спатрэбяцца сур'ёзныя сістэмы СПА з радарамі і больш складанымі сродкамі захопу мэты.

Таксама разведка паказвае, што прыцягненне валанцёрскіх патрулёў сведчыць пра недахоп кадравага персаналу для падобных задач.

Аналітыка вайны

Старшыня Аб'яднанага камітэта начальнікаў штабоў ЗША генерал Марк Мілі заявіў ВВС, што ўмовы надвор'я дазволяць украінскім вайскоўцам працягваць актыўныя наступальныя дзеянні яшчэ на працягу 30-45 дзён. У інтэрв'ю вядучай нядзельнага ранішняга тэлешоў ВВС Лоры Кунсберг Мілі адзначыў, што з надыходам восеньскага надвор'я Узброеным сілам Украіны будзе цяжэй манеўраваць.

Ён таксама заявіў, што ўкраінская армія рухаецца наперад, хоць больш павольна, чым чакалася.

«Цяжкія баі ўсё яшчэ працягваюцца. Украінцы б'юцца і паслядоўна прасоўваюцца, — заявіў Мілі. — Засталося яшчэ некаторы колькасць часу, верагодна, каля 30-45 дзён прыдатнага для баёў надвор'я, так што ўкраінцы пакуль не скончылі. УСУ пакуль не скончылі баявую фазу таго, што яны запланавалі».

Кіраўнік Галоўнага ўпраўлення выведкі Мінабароны Украіны Кірыл Буданаў адзначыў, што контрнаступленне УСУ працягнецца і пасля наступлення халоднага надвор'я, нават калі прасоўвацца наперад стане цяжэй.

«Баявыя дзеянні так ці інакш будуць працягвацца. У холадзе, волкасці і бруду змагацца складаней. Баявыя дзеянні будуць працягнутыя. Контрнаступленне будзе працягвацца», — заявіў кіраўнік ГУР.

Паводле яго слоў, контрнаступленне адбываецца на некалькіх кірунках, пры гэтым ён прызнаў, што прасоўванне ідзе павольней, чым ён хацеў, і апісаў сітуацыю як складаную. На яго думку, сярод ключавых фактараў, якія тармозяць контрнаступленне УСУ — вельмі шчыльная канцэнтрацыя расійскіх мін, а таксама вялікая колькасць кампактных варожых дронаў-камікадзэ.

9 верасня, у інтэрнэце з'явілася інфармацыя, што генеральны сакратар ААН Антоніу Гутэрыш прапанаваў Расіі пагадненне з чатырох пунктаў, каб Расія вярнулася да «збожжавай угоды».

«Гэта не чуткі. Гэта безумоўна была чарнавік, які кажа пра тое, што ААН сапраўды не разумее, што гэта за вайна, да чаго можа прывесці такая пазіцыя, якая дакладна заахвочвае Расію да працягу вайны, максімізацыі вайны, да павелічэння маштабаў вайны. Безумоўна, ААН будзе апраўдвацца, але гэта выглядае вельмі недарэчна», — сказаў дарадца офіса ўкраінскага прэзідэнта Міхаіл Падаляк.

Пункты новага пагаднення, якія прыводзяць СМІ, нібыта ўзятыя з сакрэтнага ліста Гутэрыша кіраўніку МЗС РФ Сяргею Лаўрову. Гэта:

• Адмена санкцыі ЕС (выключэнне з сістэмы SWIFT) супраць Аграрнага банка РФ. Гаворка ідзе аб выкарыстанні спецыяльна створанай кампаніі расійскага банка RSHB Capital SA для абыходу санкцый;
• Страхаванне расійскіх караблёў ад «нападаў Украіны ў Азоўскім і Чорным морах»;
• Дапамога ААН у размарожванні актываў расійскіх кампаній па вытворчасці ўгнаенняў у ЕС;
• «Забеспячэнне доступу расійскіх судоў, якія перавозяць прадукты харчавання і ўгнаенні, у парты ЕС праз хуткія партовыя дазволы».

Па даных СМІ, Крэмль пакуль не пагадзіўся на гэта, бо лічыць прапановы «занадта добрымі», каб быць праўдай.