ПАСЕ прызнала Лукашэнку датычным да генацыду ўкраінцаў
Парламенцкая асамблея Савета Еўропы на пасяджэнні 27 красавіка прыняла папраўку, прапанаваную дэпутатам украінскай Вярхоўнай Рады Аляксеем Ганчарэнкам. Сэнс папраўкі палягае ў тым, што вываз украінскіх дзяцей і дарослых з акупаваных Расіяй тэрыторый трэба лічыць генацыдам, а Аляксандр Лукашэнка, таксама як Уладзімір Пуцін, абвяшчаецца датычным да гэтага.
Аляксей Ганчарэнка. Фота з сацсетак дэпутата Вярхоўнай Рады
«Мая папраўка да рэзалюцыі ПАСЕ — аб прызнанні самаабвешчанага прэзідэнта Беларусі Аляксандра Лукашэнкі датычным да прымусовай дэпартацыі
дзяцей і дарослых з акупаваных тэрыторый Украіны. Што аўтаматычна робіць
Лукашэнку вінаватым у генацыдзе, які праводзіць Расія ва Украіне», — напісаў Аляксей Ганчарэнка ў сваім тэлеграм-канале.
Паводле яго слоў, ПАСЕ таксама афіцыйна прызнала ордэр Міжнароднага крымінальнага суда (МКС) на арышт Пуціна.
«Сёння Парламенцкая асамблея Савета Еўропы прыняла надзвычай важную рэзалюцыю, якая тычыцца прымусовай дэпартацыі ўкраінскіх дзяцей і дарослых у Расію, — адзначыў Ганчарэнка. — Самае галоўнае з рэзалюцыі:
упершыню ў афіцыйным дакуменце такога ўзроўню згадваецца тэрмін «генацыд» у дачыненні да дзеянняў Расіі;
адзначаецца, што, згодна з нормамі міжнароднага
права, прымусовая дэпартацыя — гэта прыкмета генацыду, таму ўсе выпадкі павінны
расследавацца, а ўсе датычныя панесці адказнасць».
Наконт прызнання ордэра МКС на арышт Пуціна ўкраінскі дэпутат заўважыў: «Гэта адно з самых галоўных рашэнняў ПАСЕ ў гэтай рэзалюцыі. Не ўсе члены Парламенцкай асамблеі Савета Еўропы з'яўляюцца краінамі, якія ратыфікавалі Рымскі статут. І менавіта прыняцце гэтай рэзалюцыі пашырае кола краін, дзе Пуцін афіцыйна лічыцца падазраваным у ваенных злачынствах. Пуцін — ваенны злачынец, якога шукаюць. Цяпер гэта пацвердзіла і ПАСЕ».
Ганчарэнка падкрэсліў, што галасаванне за прыняцце рэзалюцыі з яго папраўкай было фактычна аднагалосным. Спачатку, удакладніў дэпутат, супраць прагаласавала прадстаўніца Нарвегіі, але потым яна прызналася, што зрабіла гэта выпадкова і насамрэч падтрымлівае рашэнне ПАСЕ.
«Турцыя, Азербайджан, Кіпр, Манака і Арменія не ратыфікавалі Рымскі статут, таму чакалася, што яны могуць прагаласаваць супраць. Але бачым, што Манака прагаласавала «за» рэзалюцыю, а вось Арменія, Турцыя і Кіпр не галасавалі наогул. Схаваліся?» — напісаў Ганчарэнка.
Рэзалюцыю Парламенцкай асамблеі Савета Еўропы пракаментаваў палітычны аглядальнік і гісторык Аляксандр Фрыдман:
— ПАСЕ назвала дэпартацыю ўкраінскіх дзяцей у Расію генацыдам і адначасова падтрымала папраўку ўкраінскага дэпутата Аляксея Ганчарэнкі аб прызнанні Лукашэнкі датычным да гэтых расійскіх злачынстваў. Рэзалюцыя ў нейкай ступені набліжае Лукашэнку да ордэра на арышт ад Міжнароднага крымінальнага суда, але і ставіць Украіну ў няпростае становішча. Атрымліваецца, што Лукашэнку прызнаюць саўдзельнікам генацыду, але працягваюць падтрымліваць дыпламатычныя стасункі з ягоным рэжымам.
Нагадаем, Аляксей Ганчарэнка ўваходзіць у Вярхоўнай Радзе ў міжфракцыйную групу «За дэмакратычную Беларусь». Ён вядомы сваёй рэзкай і паслядоўнай крытыкай Лукашэнкі.
У жніўні мінулага года Генпракуратура Беларусі распачала ў дачыненні да яго крымінальныя справы. Яму закінулі пагрозу гвалтам у дачыненні да Лукашэнкі і дыскрэдытацыю Беларусі.
Раней дэпутат
адказаў на віншаванне Лукашэнкі з Днём Незалежнасці Украіны словамі, маўляў, «у
наступны Дзень Незалежнасці Украіны Лукашэнка будзе вісець на слупе, а
беларускі народ будзе вольны і будзе жыць у дэмакратычнай дзяржаве!».
Даведаўшыся пра
крымінальную справу ў Беларусі, Аляксей Ганчарэнка адказаў: «Мне інкрымінаваны пагроза гвалтам «прэзідэнту» Беларусі і дыскрэдытацыя Рэспублікі
Беларусь. Адно пытанне: а як я пагражаў гвалтам Святлане Ціханоўскай? Я
пагражаў вашаму клоўну Лукашэнку, які незаконна захапіў уладу і якому вы
дапамагаеце заняволіць мой любімы беларускі народ. Жыве Беларусь!»
Сёлета ў студзені суд Ленінскага раёна Магілёва прызнаў «экстрэмісцкімі» сацсеткі Аляксея Ганчарэнкі.