На якія краіны можа нацэліцца Крэмль пасля Украіны?
Амерыканскі генерал Марк Арнольд назваў краіны, на якія можа нацэліцца Крэмль пасля Украіны. Але ёсць і добрая навіна — гэта не абавязкова здарыцца
Расійская Федэрацыя пагражае бяспецы краін Паўночнаатлантычнага альянсу. Наступнымі мэтамі для Масквы могуць стаць Латвія, Літва і Эстонія і Грузія.
Пра гэта распавёў амерыканскі брыгадны генерал у адстаўцы, ветэран Ірака і Афганістана Марк Арнольд у інтэрв'ю украінскаму РБК. Вайсковец адзначыў, што, на яго думку, трэба больш дапамагаць Украіне.
“Расія пры Пуціне не спыніцца. Нават дасягнутае шляхам перамоваў спыненне агню будзе толькі часовым. Пуцін не хоча, каб дэмакратычная Украіна ўмацавалася за кошт сучаснай зброі і вялікай, прафесійна падрыхтаванай арміі. Вось чаму я лічу, што Украіна павінна скончыць гэтую вайну ваенным шляхам”.
“Гэтую вайну трэба скончыць як мага хутчэй, таму што інакш расійскіх ваенных злачынстваў будзе больш, украінцы працягнуць пакутаваць. Пуцін хоча перамалоць Украіну ў дробны попел і гатовы выдаткаваць на гэта шмат гадоў. Вось чаму я лічу, што нам трэба пакласці канец гэтай вайне як мага хутчэй. Таксама мне ясна, што Расія пагражае бяспецы NATO. І нейкая частка NATO стане наступнай мэтай расійскай агрэсіі”, — заявіў вайсковец.
На ягоную думку, агрэсія Расіі супраць гэтых краін пачнецца павольна — з кібератак, палітычнага ўмяшання з дапамогай інфармацыйных аперацый і спробаў распаліць грамадзянскія войны. “А за гэтым, верагодна, здарыцца спроба Расіі анексаваць тэрыторыі ў Грузіі, Літве, Латвіі і Эстоніі. NATO можа пазбегнуць гэтага, працягваючы ізаляваць Расію, падтрымліваючы дэмакратычныя сістэмы NATO і умацоўваючы свае традыцыйныя ваенныя сродкі стрымлівання”, — адзначыў Арнольд.
