Пратэст медыкаў у Мінску: Каранік збег (фота, відэа)
Сёння беларускія медыкі праводзяць акцыю супраць гвалту ля Міністэрства аховы здароўя. Наш карэспандэнт распавядае, што там адбываецца.
Гаворка ў натоўпе: «А Каранік будзе? Не ведаю, але казаць, што не далажылі, што ёсць траўмы гэта ўжо мяжа. Нават сітуацыя з каронавірусам вам не здаецца такой жудаснай».
16.52. Акцыя яшчэ не пачалася. Ужо шмат людзей. Грае Вольскі «Сонца нам дапаможа», «Тры чарапахі», змяняючы словы «чаканне дастала» . Людзі пляскаюць у ладкі, падпяваюць. Шмат людзей са сцягамі, плакатамі, у адзенні з нацыянальнымі колерамі.
16.55 прыйшлі прадстаўнікі ПДВ. Людзі іх вітаюць. Музыка кажа: «Зараз усе мы — адзін народ».
17.00 натоўп скандуе «Дзякуй» музыкам.
17.00 выйшаў Каранік. Скандуюць «Ганьба!», «У адстаўку!», «Сыходзь!»
17.11 Каранік знікае. Праз пару хвілін раздаюцца воклічы «Жыве Беларусь!»
Да акцыі медыкаў далучаецца лідар Руху «За свабоду» Юрый Губарэвіч. Людзі скандуюць: «Трыбунал! Выпускай! Сыходзь!».
Наш карэспандэнт паведамляе, што на месцы правакатар здымае твары людзей. Людзі заўважылі і не далі яму здымаць.
17.17. Каранік з'язджае пад воклічы «Ганьба!»
17.23 Натоўп скандуе: «Дзякуй медыкам!»
Доктар абураецца: чаму калегі выходзяць на вуліцы на акцыі салідарнасці, а потым вяртаюцца ў сваі кабінеты і не даюць праўдзівых медыцынскіх заключэнняў.
Доктарка Эмілія Уладзіміраўна Мезіна распавядае, што 12 гадоў лячыла людзей у пагонах. «Я не ведаю, чаму яны звярэюць. Але я ведаю, што нам звярэць нельга», — гаворыць яна.
Да пратэстоўцаў прыйшла прадстаўніца аб'яднанага штабу Марыя Калеснікава. Па яе словах, да Віктара Бабарыкі дапусцілі адвакатаў, ён ведае пра ўсе жахі і вельмі спачувае ўсім ахвярам, а таксама верыць, што мы пераможам.
Наш карэспандэнт перадае, што заўтра аб 11 гадзіне адбудзецца акцыя ля заводу «Атлант».
Пасля гэтага людзі пачынаюць паціху разыходзіцца.
Юрый Губарэвіч кажа, што людзі збіраюцца а 18 на плошчы Незалежнасці.
Акцыя завяршаецца, дэсантнікі прыбіраюць смецце, разносяць ваду. Жанчына пытае: «Вы тут адказныя за прыбіранне і клопат?» Яны адказваюць: «Мы адказныя за народ».
