Медуніверсітэт перасяліў 386 студэнтаў, БНТУ Еўрапейскія гульні не закранулі

Еўрарадыё атрымала другі адказ на афіцыйны запыт пра высяленне студэнтаў са Студэнцкай вёскі.

У лінгвістычным універсітэце журналістам паведамілі, што са Студэнцкай вёскі ўжо выселілі 384 студэнтаў МДЛУ. Цяпер медыцынскі ўніверсітэт таксама адказаў — 386 будучых спецыялістаў атрымалі новыя месцы пражывання:
«386 студэнтаў пераселеныя ў інтэрнат №4 Беларускай медыцынскай акадэміі паслядыпломнай адукацыі (БелМАПА). Пры перасяленні студэнты засяляліся ў блокі інтэрната БелМАПА ў тым жа складзе, у якім і пражывалі ў інтэрнаце ўніверсітэта».
Кіраўніцтва БДМУ адзначыла, што месцы атрымалі ўсе студэнты, а за межы Мінска нікога не адправілі.
Падчас падрыхтоўкі матэрыялу адказ прыйшоў і з БНТУ. Як высветлілася, «правядзенне Гульняў не паўплывае на змену жыллёва-бытавых умоў студэнтаў, якія навучаюцца БНТУ, і "часовае перасяленне" не закране студэнтаў БНТУ».
Агулам у Студэнцкай вёсцы пражывала каля 7500 студэнтаў з БДУ, БДМУ, БДПУ, БДУІР і МДЛУ. У інтэрнацкія пакоі замест іх заселяць спартсменаў і прадстаўнікоў замежных дэлегацый, якія прыедуць у Беларусь на II Еўрапейскія гульні. Але пасля рамонту. Таму ўсіх студэнтаў з 1 лютага перасялілі ў іншыя інтэрнаты.
Раман Пратасевіч, Еўрарадыё