Хронікі рэпрэсій за 30 снежня: 64-гадовага ксяндза з Валожына асудзілі на 11 гадоў за «здраду дзяржаве»
З дапамогай праваабаронцаў і незалежных СМІ сабралі асноўную інфармацыю пра палітычны пераслед у Беларусі на сёння, 30 снежня.
Палітзняволенага ксяндза Генрыха Акалатовіча асудзілі на 11 гадоў калоніі за «здраду дзяржаве»
Пробашч касцёла ў Валожыне не прызнаваў сябе вінаватым, паведамляе katolik.life.
Справу святара з 25 лістапада ў закрытым рэжыме разглядалі ў Мінскім абласным судзе. 30 снежня прысуд па справе Акалатовіча вынес суддзя Уладзімір Арэшка.
Каталіцкаму святару 64 гады. Родам ён з вёскі Новая Мыш Баранавіцкага раёна. Апошнім часам Генрых служыў у каталіцкім храме святога Язэпа ў Валожыне. Яго затрымалі 17 лістапада 2023 года.
Акалатовіч раней перанёс інфаркт і хварэў на рак, таму незадоўга перад затрыманнем яму правялі аперацыю на страўніку. Святару трэба асаблівы дагляд і медыцынская дапамога. Але яго трымаюць у СІЗА КДБ, а стан здароўя невядомы.
За атаку дрона на базу АМАПа двух вайскоўцаў завочна асудзілі да вялікіх тэрмінаў і штрафаў
У Мінскім гарадскім судзе 23 снежня быў вынесены завочны прысуд добраахвотніку ва Украіне Паўлу Кулажэнку і былому вайскоўцу Віталю Пацехіну. Іх абвінавацілі паводле шасці артыкулаў Крымінальнага кодэкса, у тым ліку «акце тэрарызму», за атаку дронам на базу АМАПа ў ноч з 24 на 25 верасня 2021 года.
Суддзя Міхаіл Макарэвіч прызначыў ім 24 і 23 года калоніі ва ўмовах узмоцненага рэжыму адпаведна, а таксама штраф у памеры 1000 базавых велічыняў (40 000 рублёў) кожнаму. Апроч гэтага Пацехіна пазбавілі воінскага звання «капітан у адстаўцы».
Стэндап-коміка Славу Камісаранку завочна асудзілі да 6 гадоў калоніі
Ягоную справу ў Мінскім гарадскім судзе разглядала суддзя Анастасія Папко.
Вячаслава абвінавачвалі ў «паклёпе на Лукашэнку» (ч. 2 арт. 367 КК), «абразе Лукашэнкі» (ч. 1 арт. 368 КК) і «распальванні варожасці» (ч. 1 арт. 130 КК).
Адбываць свой тэрмін Камісарэнка павінен у папраўчай калоніі агульнага рэжыму.
Сёння пачалі судзіць адміністратара Telegram-чата «Propovednik»
Справу 52-гадовага Уладзіміра Шпака ў Мінскім гарадскімі судзе разглядае суддзя Вера Галаўкова. Уладзіміру інкрымінаваныя ч. 1 арт. 342 КК (актыўны ўдзел у дзеяннях, што груба парушаюць грамадскі парадак), ч. 1 арт. 361-1 КК (стварэнне экстрэмісцкага фармавання альбо ўдзел у ім), ч. 3 арт. 361 КК (заклікі да мераў абмежавальнага характару (санкцыяй)).
Нагадаем, МУС прызнаў праект «Propovednik» «экстрэмісцкім фармаваннем» 24 ліпеня. Аднак пра затрыманне адміністратара тэлеграм-канала «Propovednik» сілавікі адсправаздачыліся яшчэ ў траўні. Тады паведамлялася, што мужчына «распальваў нацыянальную і сацыяльную нянавісць, заклікаў да гвалту, выступаў за радыкалізацыю і тэрарызм».
У Віцебску зноў судзяць былога палітвязня Аляксандра Жалязоўскага
Яго вінавацяць паводле ч.2 арт.19.11 КаАП за «распаўсюд экстрэмізму». Справу Жалязоўскага ў судзе Кастрычніцкага раёна Віцебска разбірае суддзя Ганна Кот.
Падобна, што гэта працяг разбору, і што справу экс-палітвязня суддзя адпраўляла на дапрацоўку ў міліцыю. Бо 3 снежня імя Аляксандра Жалязоўскага ўжо фігуравала ў раскладзе суда Кастрычніцкага раёна, дзе мусіла разглядацца справа з такім самым нумарам.
7 снежня 2021 года Аляксандра Жалязоўскага асудзілі за абразу ў інтэрнэце прадстаўніка ўлады (арт. 369 КК) да трох гадоў «хіміі» і выплаты кампенсацыі маральнай шкоды (1000 рублёў) участковаму міліцыянту з Бабруйска Андрэю Комару, якога суд прызнаў пацярпелым. У судзе Жалязоўскі цалкам прызнаў сваю віну. І ў апошнім слове прасіў даць яму «апошні шанец», прыгадваючы, што ён сам калісьці меў дачыненне да сістэмы выканання пакаранняў — ахоўваў зняволеных падчас службы ва ўнутраных войсках.
Сёлета ён выйшаў на волю, адбыўшы тэрмін «хіміі».
За 2024 год асудзілі не меней за 1721 чалавека: вынікі крымінальнага пераследу
Не меней за 1721 чалавек асуджаныя па палітычных крымінальных справах у Беларусі за 2024 год. З іх 1241 мужчына (72,1%), 480 (27,9%) жанчынаў, распавядае Вясна пра крымінальны пераслед гэтага году. Сярод агульнай колькасці асуджаных 21 чалавек пенсійнага веку: 14 жанчын і 7 мужчынаў. Сёлета ў нашай краіне працягваецца практыка завочных судоў. На 144 чалавекі заведзена спецвытворчасць.
Больш за ўсё палітычных судоў адбылося ў Мінску, меней за ўсё — у Магілёўскай і Віцебскай абласцях. Самы распаўсюджаны від пакарання па палітычна матываваных крымінальных артыкулах — пазбаўленне волі. Да зняволення асудзілі агулам 55,4 % беларусаў. А самай папулярнай нагодай для палітычных крымінальных судоў застаецца ўдзел у акцыях пратэсту — паводле арт. 342 КК асудзілі 1019 чалавек.
