Хронікі рэпрэсій. Ніну Багінскую затрымалі за БЧБ-сцяг на тумбачцы
З дапамогай інфармацыі праваабаронцаў і незалежных медыя сабралі звесткі пра палітычны пераслед у Беларусі за 28 сакавіка.
У Дзень Волі супрацоўнікі міліцыі прыйшлі да Ніны Багінскай — яе будуць судзіць за нацыянальны сцяг. Як паведамляюць крыніцы «Белсата», яе адвезлі ў пастарунак і трымалі там да вечара.
Вядомая грамадская актывістка Ніна Багінская мусіць з’явіцца ў суд Першамайскага раёну Мінску для разгляду адміністрацыйнага пратаколу за тое, што ў яе кватэры сілавікі знайшлі нацыянальны сцяг Беларусі. Бел-чырвона-белы сцяг быў на тумбачцы ў пакоі, дзе жыве Багінская.
Гомельскі абласны суд вынес прысуд палітзняволенай пенсіянерцы і
велаактывістцы Святлане Кароль. Жанчыну пакаралі пазбаўленнем волі
тэрмінам на адзін год і шэсць месяцаў калоніі ва ўмовах агульнага рэжыму.
Пенсіянерку абвінавацілі ў паклёпе на Лукашэнку паводле ч. 2 арт. 367 КК і распальванні сацыяльнай варожасці паводле ч. 1 арт. 130 КК. Справу разглядаў суддзя Вадзім Бобыраў.
Святлана — пенсіянерка і велаактывістка з Гомеля, былая старшыня абласнога грамадскага аб'яднання «ВелаГомель». У 2020 годзе жанчына далучылася да гомельскай Каардынацыйнай рады. Дома на Святлану чакаюць маці сталага веку і муж з анкалагічнай хваробай, якімі апякуецца жанчына.
У Мінску супрацоўнікамі КДБ быў затрыманы гісторык царквы Ілля Вішнеўскі. Вішнеўскі — выпускнік магістратуры Інстытута тэалогіі імя святых Мяфодзія і Кірыла і аспірантуры гістарычнага факультэта Беларускага дзяржаўнага ўніверсітэта.
Цягам больш за 10 гадоў працуе ў Нацыянальным архіве Рэспублікі Беларусь, з'яўляецца вядомым у Беларусі даследчыкам гісторыі канфесійных устаноў, аўтар шматлікіх публікацый аб дзейнасці абнаўленчай царквы ў БССР.
Апошнім часам быў адным з арганізатараў (разам з Мінскай духоўнай акадэміяй і інш.) і мадэратарам працы круглых сталоў па гісторыі рэлігійных супольнасцяў БССР у 1920-1930-я гады (у тым ліку па праблемах узаемадносін праваслаўнай царквы з савецкай дзяржавай і рэпрэсій сярод духавенства) на базе архіўных, адукацыйных і царкоўных устаноў.
На дадзены момант ён знаходзіцца ў ІЧУ на Акрэсціна. Прычыны затрымання і прад'яўленыя абвінавачванні невядомыя.
ГУБАЗіК сцвярджае, што затрымаў мужчыну, які наведваў
суды і нібыта перадаваў інфармацыю праваабаронцам. Паводле сілавікоў, 40-гадовы жыхар Брэста
«сістэматычна наведваў суды па крымінальных справах экстрэмісцкай
накіраванасці. Ён фіксаваў ход і вынікі пасяджэнняў, інфармацыю аб
сведках і прадстаўніках праваахоўных органаў. Далей гэтыя звесткі перадаваліся
замежным куратарам для публікацыі на дэструктыўных інтэрнет-рэсурсах».
Следчымі распачата крымінальная справа за садзейнічанне экстрэмісцкай дзейнасці. Мужчына змешчаны ў следчы ізалятар.
Глядзіце таксама
У Рагачоўскім раёне быў затрыманы Іван Скуратовіч. Вядома, што затрыманне мужчыны адбылося ўчора раніцай. Прычына пераследу Івана і яго далейшы лёс высвятляюцца.
Сілавікі затрымалі жыхара Мінскай вобласці. Сцвярджаецца, што мужчына хацеў
далучыцца да ўкраінскай арміі і спрабаваў нелегальна перайсці мяжу. Пасля
няўдалай спробы ён нібыта напісаў начальніку Галоўнага ўпраўлення разведкі
Міністэрства абароны Украіны Кірылу Буданаву з просьбай дапамагчы трапіць ва
Украіну, аднак той прапанаваў падарваць адміністрацыйны будынак ці чыгунку ў
Беларусі.
Пасля гэтага беларус «патэлефанаваў у польскую амбасаду і сказаў, што гатовы служыць ва ўкраінскім войску» — на наступны дзень яго затрымалі.
У Беларусі палітвязнямі
прызнаныя яшчэ сем чалавек: Алег Дзегцярэнка, Аляксандр
Марчанка, Наталля Гаўрон, Алена Тоцкая, Алёна Дземянчук,
Алеся Сяргеенка, Юлія Краўцова. Цяпер у спісах праваабаронцаў 1406 палітзняволеных. Але
насамрэч, вядома, іх нашмат больш.
Глядзіце таксама
МУС забараняе беларускія дыяспары — «Асацыяцыя беларусаў у Амэрыцы» прызнаная «экстрэмісцкім фармаваннем». Рашэнне аб прызнанні «ABA Together (Association of Belarusians in America)» «экстрэмісцкім фармаваннем» было прынятае МУС 28 сакавіка.
Як паведамляецца ў сацсетках ініцыятывы, «агульнанацыянальная арганізацыя ABA аб’ядноўвае беларусаў ЗША. Мы — беларусы-амерыканцы рознага ўзросту, заняткаў і адукацыі, якія жывуць у розных штатах, але звязаны праз сваю беларускую спадчыну, і імкнуцца дапамагаць роднай краіне».
25 сакавіка суд Цэнтральнага раёна Мінска прызнаў
«экстрэмісцкімі матэрыяламі» два артыкулы нямецкага штотыднёвіка Die
Tageszeitung — «"Братский народ" как пушечное мясо» (пра тое, ці
вырашыць Лукашэнка ўводзіць войскі ва Украіну) і «Наш Пушкин» (пра смерць
палітвязня Алеся Пушкіна).
Таксама спіс «экстрэмісцкіх матэрыялаў» трапілі: тэлеграм-каналы і чаты «Беларусы Брытанii», «Тутэйшы Шляхцiч», «Filiżanka», «НУЛЕВЫЕ+», «Янгмаша’s Bizarre Adventure», «Belarus Women’s Foundation», «Baranki Punx»; інстаграм-старонкі «belarus_in_america», «razam.bremen», «hrystyna_kafka»; ютуб-канал «Слухай сюда»; старонка ў «Аднакласніках» «БХД-Беларуская Хрысцiанская Дэмакратыя»; цік-ток-акаўнты «Belarusian volunteers», «дзякую Богу што не маскаль», «Volnyruh», «Вольныя паштоўкі», «bel.info.today24», «Два погляды», «Сергей», «НАУ Беларусь».