Беларускія артысткі-эмігранткі Кацярына Ваданосава і Ганна Лепяшкевіч запрашаюць на канцэрт у Кіеве

Арт-паб «Торвальд» у Кіеве запрашае на канцэрт Кацярыны Ваданосавай і Ганны Лепяшкевіч, паведамляе «Радыё Рацыя».

Дата: 28 студзеня

Час: 19.00 (час мясцовы)

Месца: арт-паб «Торвальд», пр-т Лабаноўскага, 119-Б, Кіеў

Кацярына Ваданосава — аўтар песень, паэтка, спявачка, мультыінструменталістка.

Ганна Лепяшкевіч — цымбалістка, былая артыстка Белдзяржфілармоніі.

Калісьці Кацярына і Ганна супрацоўнічалі ў межах фольк-рок гурта Kaciaryna Vadanosava & Fantasy Orchestra, пасля жніўня 2020 года яны адыгралі акустычным складам каля двух дзясяткаў дваровых канцэртаў для жыхароў Мінска і ваколіцаў, а пазней з-за палітычнага пераследу апынуліся ў эміграцыі: Кацярына — у Кіеве, Ганна — у Вільні.

Але, паколькі для сяброўства межаў не існуе, то яны сустрэнуцца цудоўным пятнічным вечарам, каб адыграць сумесны канцэрт і падзяліцца з наведвальнікамі сваёй музыкай і творчасцю.

Уваход вольны.