«Белапанаўцам» Ірыне Леўшынай і Дзмітрыю Наважылаву прад'явілі абвінавачанні

Дырэктарцы і галоўнай рэдактарцы «БелаПАН» Ірыне Леўшынай, а таксама былому дырэктару кампаніі Дзмітрыю Наважылаву прад'яўленыя абвінавачанні.

Абвінавачанне па ч. 2 арт. 243 КК абодвум прад'явілі яшчэ на мінулым тыдні. Мера стрымання ў выглядзе заключэння пад варту абраная на два месяцы з моманту затрымання, паведаміла «БелаПАН» інфармаваная крыніца.

Леўшыну і Наважылава затрымалі 18 жніўня як падазраваных паводле арт. 342 КК («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх»). 27 жніўня СК паведаміў, што іх таксама падазраюць у здзяйсненні злачынства па ч.2 арт. 243 КК («Ухіленне ад выплаты падаткаў, што пацягнула за сабой прычыненне шкоды ў буйным памеры — "звыш 100 тысяч рублёў"»).

18 жніўня таксама затрымалі бухгалтарку «БелаПАН» Кацярыну Боеву. Праваабаронцы прызналі ўсіх траіх палітвязнямі.

Боеву адпусцілі на свабоду раніцай 28 жніўня пад абавязацельства аб яўцы. Яна застаецца ў статусе падазраванай.

Офіс «БелаПАН» тым часам застаецца апячатаным. Рэдакцыйны сервер і сервер, на якім размяшчаўся сайт кампаніі, канфіскаваныя. Сайт «БелаПАН» недаступны.