У акупаваным Данецку пад абстрэл трапіў рынак. Загінулі дзясяткі чалавек

Аб масіраваным абстрэле Данецка ўлады самаабвешчанай «ДНР» паведамілі раніцай 21 студзеня. Прызначаны Расіяй мэр анексаванага горада Аляксей Кулемзін заклікаў жыхароў Кіраўскага раёна, у якім знаходзіцца пацярпелы рынак «Меркурый», не пакідаць хованак прыкладна а 10:20.

Праз менш чым 15 хвілін Кулемзін паведаміў пра тое, што ў выніку абстрэлу Кіраўскага раёне ёсць пацярпелыя, а яшчэ праз паўгадзіны — што снарады, нібыта запушчаныя УСУ, «упалі ў ажыўленым месцы мікрараёна Тэкстыльшчык, дзе размешчаны гандлёвыя рады, крамы». Тады ж мэр анексаванага Данецка заявіў пра першых загінулых.

У наступныя некалькі гадзін Кулемзін і прызначаны Расіяй кіраўнік самаабвешчанай «ДНР» Дзяніс Пушылін паведамлялі аб павелічэнні колькасці загінулых у выніку ўдару. Спачатку стала вядома пра восем ахвяр абстрэлу, затым — пра 12, 13, 18 і, нарэшце, 25. Мяркуючы з паведамленняў тэлеграм-канала «Вайна вачыма журналіста», не ўсе 25 загінулых знаходзіліся ў момант удару на рынку. Як мінімум адзін мужчына загінуў у выніку «прылёту» ў двор шматпавярховага жылога дома ў тым жа Кіраўскім раёне.

Яшчэ не менш за 20 чалавек атрымалі раненні, уключаючы двух дзяцей, якія, паводле даных Пушыліна, знаходзяцца ў стане сярэдняй цяжкасці. Ёсць і цяжкапараненыя, «у многіх пранікальныя раненні ў вобласці жыццёва важных органаў, траўматычная ампутацыя канечнасцяў». «Трое з пацярпелых, на жаль, не выжылі», — удакладніў Пушылін.

«Полк Каліноўскага мае патрэбу ў рэформах, прычым вялікіх»

Паводле інфармацыі кіраўніка самаабвешчанай «ДНР», па квартале, дзе размешчаны рынак, быў нанесены «камбінаваны ўдар са ствольнай артылерыі калібрам 152 і 155 міліметраў з Курахоўскага і Краснагораўскага кірункаў». Ва Узброеных сілах Украіны (УСУ), якіх Пушылін і Кулемзін абвінавацілі ў наўмысным абстрэле грамадзянскай інфраструктуры, гэтую інфармацыю пакуль ніяк не каментавалі. Як адзначае выданне «Важныя гісторыі», аддаленасць ад данецкага рынку пазіцый УСУ, размешчаных у падкантрольных Украіне гарадах Краснагораўцы і Курахове, «адпавядае далёкасці прымянення ствольнай артылерыі».

Рынак «Меркурый», па якім прыйшоўся ўдар, мяркуючы па водгуках на сэрвісе «Яндэкс.Карты», папулярны сярод мясцовых жыхароў, якія, як правіла, хваляць гандлёвы аб'ект за даступныя цэны на прадукты харчавання і вопратку.

«Важныя гісторыі» адзначаюць, што атака 21 студзеня, верагодна, стала самай кровапралітнай для Данецка за ўсе дзесяць гадоў вайны з 2014 года. З параўнальных па колькасці ахвяр сярод грамадзянскага насельніцтва абстрэлаў выданне прыводзіць ракетны ўдар 14 сакавіка 2022 года. Па цэнтры Данецка тады трапіла ракета «Кропка У», бакі абвінавачвалі ў яе запуску адзін аднаго. Паводле версіі самаабвешчанай «ДНР», у выніку той атакі загінуў 21 чалавек. ААН зафіксавала гібель 15 жыхароў.

Паводле «Медузы».