Контрнаступ: Бронетэхніка УСУ прарвалася праз галоўную лінію абароны РФ?

Амерыканскі інстытут вывучэння вайны (ISW) паведаміў, што ўкраінская бронетэхніка ўжо дзейнічае за апошняй лініяй расійскай абароны ў Запарожскай вобласці. Абарона арміі РФ прарвана?

ISW: Украінская бронетэхніка, магчыма, прарвала абарону ў Запарожскай вобласці

Украінская бронетэхніка выйшла за апошнюю лінію абарончай мяжы расійскай арміі на захадзе Запарожскай вобласці. Пра гэта са спасылкай на вынікі вывучэння геалакацыйных кадраў паведамляе ў аналітычным аглядзе 22 верасня Амерыканскі інстытут вывучэння вайны (ISW).

Адзначаецца, што менавіта гэтую лінію абароны штурмуюць у дадзены момант падраздзяленні УСУ. Аднак, нягледзячы на прасоўванне бронетэхнікі, яшчэ рана сцвярджаць, што ўкраінскія войскі прарвалі трохслаёвы абарончы рубеж.

Аналітыкі IDC адзначаюць, што ўпершыню назіраюць выкарыстанне бронетэхнікі ўкраінскіх узброеных сіл за межамі расійскай лініі абароны.

 «Wall Street Journal»: УСУ прарвалася праз галоўную лінію расійскай абароны ў раёне Рабоціна

Амерыканская газета «Wall Street Journal» (WSJ) паведаміла 21 верасня, што ўкраінскія сілы прарвалі асноўную расійскую абарончую лінію ў заходняй Запарожскай вобласці з дапамогай бронетэхнікі. Выданне публікуе рэпартаж пра падзеі ў раёне нядаўна вызваленай Украінай вёскі Рабоціна ў Запарожскай вобласці, дзе, як лічаць заходнія эксперты, знаходзіцца галоўны кірунак удару УСУ.

Паводле высновы аўтараў публікацыі, украінская бронетэхніка змагла ўпершыню за час контрнаступлення прарвацца праз асноўную лінію абароны арміі РФ каля населенага пункта Вербавае, што месціцца непадалёк ад Рабоціна.

Журналісты WSJ распавядаюць пра сітуацыю на фронце, грунтуючыся на інтэрв'ю ўкраінскіх вайскоўцаў, якія дзейнічаюць у гэтым раёне.

Як піша выданне, украінскія войскі здолелі пераадолець супрацьтанкавыя перашкоды, у тым ліку равы і бетонныя «зубы дракона», што дазволіла адправіць праз расійскія пазіцыі бронетэхніку. Пра гэта газеце паведаміў адзін з украінскіх вайскоўцаў, словы якога пацвярджаюцца апублікаванымі ў інтэрнэце расійскімі відэа з тэхнікай УСУ, па якой наносяцца артылерыйскія ўдары.

«Прарыў невялікі, і за гэты ўчастак ідуць жорсткія баі. Расіяне прасуюць раён артылерыяй і ідуць у контратакі. Украінцы нясуць цяжкія страты», — апісваюць сітуацыю карэспандэнты WSJ.

Аднак калі УСУ атрымаецца замацаваць тут свой поспех, яны могуць паспрабаваць завезці праз прарваную лінію больш цяжкай тэхнікі і накіравацца на менш абароненую тэрыторыю. Частка тэхнікі, якая прарвалася, была знішчана, распавёў газеце ўкраінскі афіцэр.

Выданне нагадвае, што галоўная мэта Украіны на гэтым участку — паспрабаваць перарэзаць расійскую групоўку на левым беразе Дняпра, дайшоўшы да Азоўскага мора або усталяваўшы агнявы кантроль над калідорам у Крым.

Выданне нагадвае, што першыя ўкраінскія спробы прарваць расійскую абарону аказаліся не вельмі ўдалымі, пасля чаго УСУ змянілі тактыку і пачалі берагчы тэхніку і жывую сілу, метадычна знішчаючы расійскую артылерыю і боепрыпасы.

Тым часам невялікія групы ўкраінскіх вайскоўцаў наступалі ад адной лесапалосы да іншай.

У апошнія тыдні Украіне ўдалося пашырыць зону прарыву і вызваліць Рабоцін, але каля вёскі Вербавае расійскія сілы абараняюцца асабліва ўпарта.

Яны выкарыстоўваюць фосфарныя боепрыпасы, каб падпальваць пасадкі, у якіх знаходзяцца захопленыя ўкраінскімі войскамі акопы. У выніку ўкраінскім войскам даводзіцца пакідаць пазіцыі пад артылерыйскім агнём, сказаў газеце афіцэр УСУ.

Аднак УСУ ўсё ж рухаюцца наперад: яны адваёўваюць акопы і ўтрымліваюць іх пад артылерыйскім і танкавым агнём. Яны таксама адбіваюць пяхотныя контратакі.

Украінскія войскі таксама спрабуюць прасоўвацца на іншых частках гэтага ўчастка фронту. У прыватнасці, на поўдзень ад Рабоціна яны дасягнулі мяжы вёскі Новапракопаўка. «Новыя прарывы вымусяць расійскіх камандзіраў размяркоўваць пяхоту і артылерыю па фронце, і іх шчыльнасць паменшыцца», — сказана ў публікацыі.

Сітуацыю ў акопах адна з вайсковак апісала журналістам як «гармонік». Па словах Алены Іваненка з 47-й штурмавой брыгады, «калі мы прарываемся наперад, вораг спрабуе вярнуць страчанае».

Як кажа Іваненка, з расійскага боку першую лінію абароны часта абараняюць дрэнна падрыхтаваныя войскі. Але пасля таго, як УСУ захопліваюць гэтыя акопы, у контратаку ідуць больш прафесійныя штурмавыя падраздзяленні.

Расійскія войскі знясілены доўгімі і крывавымі баямі, робяць высновы аўтары публікацыі. Але Масква працягвае ўмацоўваць сваю абарону, у тым ліку капаць акопы перад раёнамі, дзе УСУ канцэнтруюць свае сілы.

Паводле ВВС, «Нямецкай хвалі», www.understandingwar.org