Больш чым Брытанія або Беларусь: Украіна ператварылася ў самае вялікае міннае поле ў свеце

Уварванне Расіі ва Украіну прывяло да таго, што краіна ператварылася ў самае вялікае ў свеце міннае поле. Забруджаная выбухованебяспечнымі прадметамі тэрыторыя складае 250 тысяч квадратных кіламетраў, сказаў прэм'ер-міністр Украіны Дзяніс Шмыгаль у інтэрв'ю паўднёвакарэйскаму выданню Yohnap.

Прэм'ер адзначыў, што гэта абцяжарвае перамяшчэнне людзей і сельскагаспадарчую дзейнасць.

«Цяпер ва Украіне самае вялікае міннае поле ў свеце. Гэта не толькі абцяжарвае рух людзей, але і выклікае сур'ёзныя збоі ў сельскай гаспадарцы, якая з'яўляецца адной з нашых асноўных галін», — сказаў кіраўнік урада.

Журналісты адзначылі, што плошча мінных палёў ва Украіне большая, чым увесь Карэйскі паўвостраў — каля 221 тысячы квадратных кіламетраў. Гэта больш, чым Румынія — 238 тысяч квадратных кіламетраў, або Вялікабрытанія — 244 тысячы квадратных кіламетраў.

Плошча Беларусі складае 201 тысяч квадратных кіламетраў, і замінаваная ўкраінская тэрыторыя таксама больш, чым нашая краіна.

Усяго плошча Украіны складае 603 тысячы квадратных кіламетраў. Такім чынам, на амаль палове яе тэрыторыі знаходзяцца выбухованебяспечныя прадметы.

7 студзеня Дзяржаўная служба надзвычайных сітуацый Украіны запусціла інтэрактыўную карту замініраваных тэрыторый. Ратавальнікі раяць спраўджвацца з ёй, каб не трапіць у непрыемнасці падчас паездак па рэгіёнах краіны.

Мяркуючы па карце, самыя небяспечныя зоны знаходзяцца ў Мікалаеўскай, Запарожскай, Харкаўскай, Чарнігаўскай, Сумскай і Данецкай абласцях, а таксама ва ўсходняй частцы Кіеўскай вобласці. Некалькі «чырвоных» лакацый адзначаны каля Чаркас, Крэменчуга, Белай Царквы, Крывога Рога, Палтавы, Умані.

«Будзьце пільнымі. Тысячы боепрыпасаў застаюцца нездэтанаванымі пасля варожых абстрэлаў. Міны і іншыя выбухованебяспечныя прадметы могуць быць: у кінутых дамах, на вуліцах, на дзіцячых пляцоўках, у палях, лясах, на абочынах дарог», — папярэдзіла ДСНС.Паводле focus.ua, dw.com