878-мы дзень вайны. Стала вядома, пра што размаўлялі Зяленскі і Трамп
Сабралі апошнія звесткі з франтоў расійска-украінскай вайны і вакол яе.
Фота Мікалаеўскай абласной адміністрацыі
Сталі вядомыя канчатковыя даныя і падрабязнасці ракетнага ўдару, які акупацыйная армія РФ нанесла 19 чэрвеня па Мікалаеву — чатыры чалавекі загінулі, больш за 20 параненыя.
Як паведаміў кіраўнік Мікалаеўскай абласной адміністрацыі ВітальКім, увечары, 19 ліпеня, у 17:13, расійцы нанеслі ўдар, папярэдне авіяцыйнай ракетай Х-59, па жылым квартале горада. Загінула чатыры чалавекі — хлопчык 13 гадоў, дзве жанчыны 53 і 63 гадоў і мужчына.
«24 чалавекі атрымалі раненні, з іх чацвёра дзяцей. Медыцынская дапамога амбулаторна аказаная дзевяці дарослым і двум дзецям. У медыцынскіх установах знаходзяцца двое дарослых і двое дзяцей. Выбухной хваляй і абломкамі пашкоджаныя дзевяць шматкватэрных дамоў, установа дашкольнай адукацыі і прыватныя аўтамабілі», — распавёў кім.
Таксама ўдар быў нанесены па Мікалаеўскім раёне: увечары, 19 ліпеня, у 17:15 ракетнаму ўдару падвергнулася Мяшкова-Пагарэлаўская грамада. Пашкоджаны ангар на тэрыторыі фермерскай гаспадаркі. Таксама ўзнік пажар сухой травы, які быў аператыўна ліквідаваны пажарнымі. Пацярпелых няма.
Учора расійская армія атакавала Мікалаеў ракетай. Адбылося трапленне па жылым сектары — ракета трапіла ў дзіцячую пляцоўку паблізу звычайнага жылога дома. Хлопчыка, які бег падчас паветранай трывогі да дома, літаральна «разарвала» прама ля пад'езда. Паведамлялася аб параненых і разбурэннях. Прэзідэнт Украіны Уладзімір Зяленскі заявіў, што Расія штодня даказвае сваім тэрорам, што ціску на яе мала. Такое знішчэнне жыцця, паводле яго слоў, павінна быць спыненае і патрэбныя новыя рашэнні ў падтрымку абароны.
Глядзіце таксама
За мінулыя суткі, 19 ліпеня, Узброеныя сілы Украіны ліквідавалі 990 расійскіх акупантаў на фронце. Як паведамляе Генштаб УСУ, агульныя страты Расіі ў вайне супраць Украіны ўжо дасягнулі 565 610 вайскоўцаў. Акрамя таго, сілы абароны знішчылі шмат варожай тэхнікі на поле бою, у прыватнасці: танкаў — 8257 (+7), баявых браніраваных машын — 15917 (+15), артылерыйскіх сістэм — 15542 (+22), РСЗВ — 1121 (+1), сродкаў СПА — 895 (+1), самалётаў — 362 (+1), верталётаў — 326 (+0), БПЛА аператыўна-тактычнага ўзроўню — 12350 (+34), крылатых ракет — 2401 (+0), караблёў / катэраў — 28 (+0), падводных лодак — 1 (+0), аўтамабільнай тэхнікі і аўтацыстэрнаў — 20968 (+59), спецыяльнай тэхнікі — 2607 (+14).
Глядзіце таксама
У ноч на суботу, 20 ліпеня, расійскія акупанты нанеслі ўдары па чыгунцы ў Харкаўскай вобласці, ёсць пашкоджаныя будынкі, рухомы састаў, а таксама пацярпелі чатыры чыгуначнікі.
У выніку атакі людзі атрымалі нязначныя раненні, паведаміла Украінская чыгунка. «Праз наступствы ўдараў была пашкоджаная кантактная сетка на выездзе з самога Харкава, і цягнікі злучэннем Кіеў — Харкаў», — гаворыцца ў паведамленні.
Рух цягнікоў ноччу аднавілі, і яны накіраваліся ў Кіеў. Акрамя таго, узнікла затрымка ў руху цягніка «Інтэрсіці», які накіроўваўся ў Краматорск.
Глядзіце таксама
Уначы расійскія БПЛА атакавалі аб'екты аператара сістэмы перадачы электраэнэргіі ў Палтаўскай, Сумскай і Чарнігаўскай абласцях. Пра гэта паведаміла прэс-служба Укрэнерга. Паведамляецца, што ў выніку атакі абясточваліся прамысловыя і бытавыя спажыўцы ў асобных раёнах Палтаўшчыны і Чарнігаўшчыны.
«На раніцу энергасілкаванне большасці спажыўцоў адноўленае. Працягваюцца аварыйна-аднаўленчыя работы», — адзначылі ў кампаніі.
Глядзіце таксама
Расійскія акупанты захапілі сяло Раздолаўка, якое знаходзіцца ў Бахмуцкім раёне Данецкай вобласці і ўваходзіць у склад Саледарскай гарадской грамады.
Пра тое, што населены пункт акупавалі расійцы, у ноч на 20 ліпеня паведамілі аналітыкі DeepState. «Вораг акупаваў Раздолаўку», — напісалі эксперты.
Паводле іх звестак, расійцам таксама ўдалося прасунуцца наперад у сяле Прагрэс, якое знаходзіцца ў Пакроўскім раёне Данецкай вобласці. У DeepState апублікавалі свежую карту баявых дзеянняў, на якой відаць, што расійцы ў Прагрэсе спрабуюць рухацца наперад з двух кірункаў.
Глядзіце таксама
Тэлефонная размова паміж прэзідэнтам Украіны Уладзімірам Зяленскім і кандыдатам у прэзідэнты ЗША Дональдам Трампам была «добрай размовай у духу ўзаемапавагі», распавёў прэс-сакратар украінскага прэзідэнта Сяргей Нікіфараў.
«Дональд Трамп назваў размову добрай, і гэтак жа лічым і мы — гэта была добрая размова ў духу ўзаемапавагі. З таго, што не ўвайшло (у афіцыйныя паведамленні), але пра што варта сказаць — Уладзімір Зяленскі заклікаў Дональда Трампа не верыць прадстаўнікам тых краін, якія спрабуюць неяк растлумачыць, апраўдаць дзеянні расійскага дыктатара Пуціна. Ніякіх апраўданняў тут, вядома, няма, ён звычайны забойца — прэзідэнт так і сказаў у тэлефоннай размове», — сказаў Нікіфараў у эфіры тэлемарафона.
Паводле яго слоў, Зяленскі распавёў Трампу пра ўчорашні расійскі ўдар па Мікалаеву, падчас якога зноў загінулі ўкраінцы. Таксама ў ходзе гутаркі абмеркавалі і асудзілі ўдар 8 ліпеня па Кіеве, па лякарні «Ахматдзет».
«А Трамп сказаў таксама вельмі цікавую рэч. Ён сказаў не верыць — гэта яго фірмовая цытата — не верыць фэйк-ньюз пра тое, што яго перамога на выбарах можа быць выгадная Расіі», — распавёў прэс-сакратар прэзідэнта.
Таксама, паводле слоў Нікіфарава, падчас размовы была зафіксаваная прынцыповая згода абодвух бакоў на сустрэчу, але пра гэта казаць яшчэ вельмі рана — каманды будуць узгадняць графікі і дэталі, калі гэта будзе магчыма.
20 ліпеня стала вядома, што Зяленскі правёў тэлефонную размову з Трампам. Паводле слоў украінскага лідара, ён пагаварыў з амерыканскім палітыкам, каб павіншаваць яго з вылучэннем у кандыдаты ў прэзідэнты ЗША ад Рэспубліканскай партыі і асудзіць шакавальную спробу забойства ў Пенсільваніі.
У сваю чаргу, Трамп пацвердзіў інфармацыю аб праведзенай тэлефоннай размове з Зяленскім і назваў яе «вельмі добрай». Таксама ён зноў падкрэсліў, што «як наступны прэзідэнт Злучаных Штатаў прынясе мір ва ўсім свеце і спыніць вайну».
Глядзіце таксама
Міністр унутраных спраў Украіны Ігар Кліменка заявіў, што праваахоўнікі знайшлі гільзу пасля смяротнага стрэлу ў экс-нардэпа Ірыну Фарыён. Разам з тым ён не стаў раскрываць падрабязнасці адносна калібра.
Паводле яго слоў, следчыя не выключаюць, што забойства магло быць арганізаванае расійскімі ўладамі. Да расследавання забойства Ірыны Фарыён прыцягнутая практычна ўся паліцыя Львова і частка паліцыі Львоўшчыны.
Паводле слоў Кліменкі, на месцы злачынства таксама працуюць аператыўнікі і следчыя групы, якія прыехалі з Кіева на чале з намеснікам кіраўніка Нацыянальнай паліцыі і на чале з намеснікам кіраўніка Службы бяспекі Украіны.
Ужо прызначаны шэраг экспертыз, у тым ліку балістычная экспертыза, аналізуюцца відэа з камер назірання.
«Паралельна выкарыстоўваем тэхнічныя магчымасці для ідэнтыфікацыі нападніка. Асноўныя версіі, якія разглядаюць на гэтую хвіліну: асабістая непрыязнасць, грамадска-палітычная дзейнасць спадарыні Фарыён. Не выключаем, што забойства мае заказны характар», — сказаў ён.
Кліменка паведаміў, што ў следства ёсць звесткі, што падазраваны некалькі дзён знаходзіўся каля дома Фарыён у пэўны час.
19 ліпеня каля 19:30 невядомы стрэліў у 60-гадовую Ірыну Фарыён. Паводле звестак СМІ, замах адбыўся на вуліцы Масарыка, каля дома, дзе жыла экс-дэпутат. Як паведамілі медыі, мужчына гадоў 20-25 стрэліў Фарыён у скронь, калі яна выйшла з дому.
Фарыён шпіталізавалі ў вельмі цяжкім стане. Яе прааперавалі і падключылі да апарата ШВЛ, але не змаглі выратаваць.