519-ты дзень вайны: Атака на порт і аэрадром

Уначы Расія атакавала Украіну ўдарнымі БПЛА і крылатымі ракетамі. Усяго зафіксавана два пускі крылатых ракет «Калібр» з падводнай лодкі ў акваторыі Чорнага мора і восем пускаў іранскіх дронаў-камікадзэ «Shahed-136/131» з кірунку Прыморск-Ахтарск. «Калібры» атакавалі партовую інфраструктуру Адэскай вобласці, збіць іх не ўдалося. У той жа час усе восем ударных дронаў знішчаны ў межах Хмяльніцкай, Днепрапятроўскай і Данецкай абласцей, паведаміла камандаванне паветраных сіл.

Начны абстрэл Украіны: што вядома?

У ноч на 27 ліпеня Расія зноў абстраляла Украіну ракетамі і беспілотнікамі-камікадзэ. Прыцэльныя ўдары наносіліся па порце і аэрадроме.

Гэтай ноччу паветраная трывога аб'яўлена ў паўднёвых, усходніх, цэнтральных і часткова паўночных раёнах Украіны. Ваенна-паветраныя сілы Узброеных сіл Украіны паведамілі, што сёння ўначы РФ з Чорнага мора выпусціла па Украіне дзве ракеты «Калібр». Пускі ажыццяўляліся з падводнай лодкі. На жаль, сілы супрацьпаветранай абароны не здолелі збіць расійскія ракеты, яны трапілі ў порт у Адэскай вобласці.

Таксама з паўднёва-ўсходняга напрамку РФ выпусціла 8 беспілотнікаў-камікадзэ іранскай вытворчасці. Украінцы «прызямлілі» ўсе беспілотнікі. Сістэма супрацьпаветранай абароны працавала ў Хмяльніцкай, Днепрапятроўскай і Данецкай абласцях.

Адэская вобласць. Ноччу дзве расійскія крылатыя ракеты трапілі ў партовую інфраструктуру Адэскай вобласці. Вайскоўцы і мясцовыя ўлады паведамілі, што пашкоджана вытворчае абсталяванне аднаго з грузавых тэрміналаў, а таксама будынак аховы і аўтамабілі.

У выніку нападу загінуў 43-гадовы ахоўнік. Праваахоўнікі ўжо распачалі крымінальную справу па факце парушэння законаў і звычаяў вайны, спалучанага з наўмысным забойствам (ч. 2 арт. 438 Крымінальнага кодэкса).

Хмяльніцкая вобласць. Прэс-сакратар ВПС Узброеных сіл Украіны Юрый Ігнат удакладніў, што ўначы РФ спрабавала атакаваць аэрадром у Стараканстанцінаве Хмяльніцкай вобласці. Усе варожыя беспілотнікі былі збіты, таму расіяне не дасягнулі пастаўленых задач.

«Шахеды, як мы бачым, знішчаны на 100 працэнтаў. Ізноў жа Стараканстанцінаўскі аэрадром не дае спакою акупантам. Ну, не сам аэрадром, а нашы вайсковыя лётчыкі, якія наносяць удары. Ну, бачыце, якая добрая «вата» робіцца на акупаванай тэрыторыі. Таму сёння гэты аэрадром пад прыцэлам», — сказаў ён Ігнат і нагадаў, што гэты самы аэрадром і ўчора быў пад прыцэлам «Шахедаў». Іх «таксама сёння ў большасці выпадкаў туды накіравалі».

У Данецкай вобласці за мінулыя суткі ў выніку расійскіх абстрэлаў загінуў адзін чалавек (у Жалезным), яшчэ дзевяць атрымалі раненні, паведаміў кіраўнік АВА Павел Кірыленка.

Ноччу расіяне нанеслі ўдар кіраванай авіябомбай КАБ-250 па Каўшароўцы Купянскага раёна Харкаўскай вобласці. Пашкоджаны пяціпавярховы жылы дом і суседні дзевяціпавярховы. Адзін чалавек загінуў, чацвёра пацярпелі, паведаміў кіраўнік АВА Алег Сінягубаў.

Акрамя таго, ноччу зафіксавана траплянне ракетай С-300 у нежылы будынак у пасёлку Вялікі Бурлук Купянскага раёна. Таксама на працягу мінулых сутак РФ абстрэльвала з артылерыі, мінамётаў і іншай зброі населеныя пункты Багадухаўскага, Харкаўскага, Ізюмскага, Чугуеўскага і Купянскага раёнаў, людзі не пацярпелі.

У Адэсе павялічылася колькасць пацярпелых з-за расійскага нападу 23 ліпеня

Колькасць ахвяр у выніку ракетнага абстрэлу Адэсы 23 ліпеня вырасла. Вядома пра двух загінулых. Цела жанчыны знайшлі ў нежылой прыбудове каля разбуранага прыватнага дома па вуліцы Паркавай. Асоба загінулай высвятляецца.

Яшчэ адна ахвяра ракетнага абстрэлу ў нядзелю, 23 ліпеня — ахоўнік рэстарана. Таксама вядома пра 22 чалавекі, якія пацярпелі з-за абстрэлаў.

Нагадаем, у ноч на 23 ліпеня РФ выпусціла 19 рэактыўных снарадаў розных тыпаў па цэнтры Адэсы. Войскі супрацьпаветранай абароны здолелі збіць 9 з іх. Гэта быў адзін з самых масіраваных абстрэлаў Адэсы з пачатку поўнамаштабнай вайны. Ракеты трапілі ў гістарычны цэнтр горада. Пашкоджана больш за 20 гістарычных помнікаў, у тым ліку часткова разбураны Спаса-Праабражэнскі сабор.

Расія рыхтуецца да блакады Чорнага мора?

Толькі за апошнія дзевяць дзён пасля выхаду Расіі са збожжавага пагаднення ў выніку варожых нападаў пашкоджана і часткова знішчана 26 аб'ектаў партовай інфраструктуры і пяць грамадзянскіх суднаў, паведаміў міністр інфраструктуры Аляксандр Кубракоў. Акрамя таго, з ягоных слоў, расіяне абмяжоўваюць суднаходства ў раёне Крыма і каля тэрытарыяльных вод Балгарыі. Гэтым РФ фактычна блакіруе рух караблёў у кірунку марскіх партоў Украіны.

Чарнаморскі флот Расіі нарошчвае вайсковую прысутнасць у акваторыі Чорнага мора, верагодна, з мэтай стварыць умовы для прымусовага прыпынення і дагляду грамадзянскіх судоў, а таксама каб узмацніць кантроль, адзначаюць эксперты.

Ёсць некалькі прыкмет таго, што расіяне рыхтуюцца да блакады Чорнага мора, заявіла прэс-сакратарка ВА ПДВ Наталля Гумянюк:«Першая дэманстрацыя — вучэнні, якія яны праводзілі па сцэнары магчымага нападу на грамадзянскі карабель, як гэта будзе развівацца. Гэта значыць, яны апрабоўваюць тыя правакацыі, якія яны задумалі».

Паводле яе слоў, пра падрыхтоўку да блакады гаворыць і тое, што расіяне рыхтуюць марскую групоўку. «За апошні тыдзень у Чорным моры мы назіралі не менш за 14 караблёў праціўніка, гэта даволі шырока прадстаўлены фармат», — сказала прэс-сакратарка.

Мінабароны Вялікабрытаніі таксама лічыць, што расійскія сілы рыхтуюць караблі ў Чорным моры для «ўзмацнення блакады Украіны».

Вайсковы медыяцэнтр паведаміў, што Чарнаморскі флот РФ актывізуе баявыя дзеянні, падрыхтоўку надводных сіл і марской авіяцыі.

У той жа час аналітыкі Інстытута вывучэння вайны (ISW) адзначаюць, што расійскі Чарнаморскі флот наўрад ці будзе спрабаваць цалкам блакіраваць Украіну, нягледзячы на ўзмацненне мер супраць грамадзянскіх суднаў.

«Поўная расійская блакада Украіны ў Чорным моры будзе азначаць, што расійскія сілы змогуць абстрэльваць усе караблі, якія спрабуюць увайсці ва Украіну», — гаворыцца ў паведамленні.

Так, наўрад ці РФ будзе спрабаваць увесці такую поўную блакаду, каб не справакаваць ваенны канфлікт з прыбярэжнымі краінамі Чарнаморскага рэгіёна, у тым ліку з чальцамі NАТO — Румыніяй, Балгарыяй і Турцыяй.

На думку экспертаў, цяперашнія расійскія дзеянні ў Чорным моры, хутчэй за ўсё, сведчаць пра тое, што Крэмль стварае ўмовы для пошуку грамадзянскіх і камерцыйных караблёў і адначасова выступае за блакаду як сродак атрымання дадатковых рычагоў уплыву.

Навіны вайны

Генштаб агучыў арыенціровачныя страты РФ паводле стану на раніцу 27 ліпеня: асабовага складу — каля 244 270 (+590) чалавек.

За мінулыя суткі на фронце адбылося 28 баявых сутыкненняў, паведаміў Генштаб у ранішняй зводцы.

Украінскія войскі працягваюць наступ на поўнач і поўдзень ад Бахмута, на паўднёвым фронце мелі поспех у раёне Старамаёрска, замацоўваюцца на дасягнутых рубяжах, паведаміў спікер Генштаба Андрэй Кавалёў.

Да 82% параненых і хворых украінскіх вайскоўцаў пасля лячэння вяртаюцца ў строй, паведаміла намесніца міністра абароны Ганна Маляр. Паводле яе слоў, каля 80% параненых на працягу так званай «залатой гадзіны» атрымліваюць неабходную дапамогу. А дзякуючы прафесіяналізму ўкраінскага медперсаналу смяротнасць вайскоўцаў на этапе эвакуацыі зменшылася да 1,35%.

Украінскі наступ

Украінскае камандаванне апавясціла Вашынгтон аб новай фазе контрнаступлення, піша «The New York Times» са спасылкай на неназваных амерыканскіх чыноўнікаў. У прыватнасці, узмоцненыя ўкраінскія групоўкі паспрабуюць прасунуцца на поўдзень праз расійскія мінныя палі і ўмацаванні да Такмака, а ў выпадку поспеху — да Мелітопаля. Мэта УСУ — разарваць так званы сухапутны калідор паміж акупаванымі Расіяй украінскімі тэрыторыямі і Крымам або прасунуцца досыць далёка, каб паўвостраў апынуўся ў зоне дасяжнасці ўкраінскай артылерыі.

Новая аперацыя Сіл абароны ў выпадку поспеху можа заняць ад аднаго да трох тыдняў, паведамілі ўкраінскія чыноўнікі калегам з Вашынгтона. У цэлым фронт у Запарожскай вобласці з'яўляецца адной з трох восей украінскага контрнаступлення. Адна з вайсковых мэт Украіны — выйсці да Азоўскага мора і ўбіць клін паміж акупаванымі Расіяй тэрыторыямі на поўдні і ўсходзе Украіны.

Уладзімір Зяленскі паведаміў, што правёў выязное пасяджэнне Стаўкі вярхоўнага галоўнакамандуючага ў Дняпры, у зоне адказнасці аператыўна-стратэгічнай групоўкі войскаў «Таўрыя». Абмеркавалі сітуацыю на фронце, ход наступальных і абаронных дзеянняў, забеспячэнне войскаў боепрыпасамі, а таксама выніковасць выкарыстання наяўных сістэм СПА і ўзмацненне паветранага шчыта з улікам будучых паступленняў. Паводле слоў украінскага прэзідэнта, падыходзіць да канца комплексная праверка тэрытарыяльных цэнтраў камплектавання і сацыяльнай падтрымкі, 11 абласцей — «на асаблівым кантролі».

Наступ УСУ ў цэлым ідзе паводле плана, які Кіеў і Захад распрацоўвалі зімой, распавёў у інтэрв'ю «Daily Telegraph» намеснік міністра абароны Вялікабрытаніі Джэймс Хіпі: «У гэты момант Украіна апраўдвае нашы чаканні. У цэлым яны выконваюць план, які быў распрацаваны разам з намі, з амерыканцамі і іншымі бакамі на працягу зімы. Гэта не галівудскі фільм. Не будзе моманту, калі паедуць танкі, зайграе музыка, пакажуць чараду эфектных ваенных кадраў, а ў канцы צ перамога да верасня».

Хіпі мяркуе, што Украіна праяўляе «належную асцярожнасць», адмаўляючыся накіраваць вялікую колькасць людзей і перададзеную зброю на шчыльныя расійскія мінныя палі. Паводле яго слоў, УСУ трымалі напагатове дастатковую агнявую моц, каб здзейсніць прарыў у патрэбны момант.

Замежныя навіны

Байдэн даў таемнае распараджэнне аб перадачы ў Міжнародны крымінальны суд у Гаазе доказаў расійскіх вайсковых злачынстваў ва Украіне, піша «The New York Times» са спасылкай на крыніцы. Са слоў чыноўнікаў, такая пастанова прэзідэнта ЗША перакрэслівае шматмесячны супраціў з боку Пентагона, які сцвярджаў, што такі крок можа стварыць прэцэдэнт, што дазволіць пераследаваць амерыканскіх вайскоўцаў.

Паводле інфармацыі выдання, амерыканскія спецслужбы сабралі інфармацыю, уключаючы дэталі аб рашэнні расійскіх чыноўнікаў наўмысна нанесці ўдары па цывільнай інфраструктуры ва Украіне і прымусова дэпартаваць тысячы ўкраінскіх дзяцей з акупаванай тэрыторыі. ЗША ўжо дзяліліся некаторымі з гэтых доказаў з украінскімі пракурорамі, аднак устрымаліся ад прадастаўлення іх Гаазе.

МУС РФ абвясціла ў вышук суддзю Міжнароднага крымінальнага судаТамакі Аканэ, якая выдала ордэр на арышт Пуціна і дзіцячага амбудсмена Марыі Львовай-Бяловай. Раней супраць Аканэ і двух іншых суддзяў, а таксама пракурора МУС Следчы камітэт РФ распачаў крымінальныя справы аб «Прыцягненні заведама невінаватага да крымінальнай адказнасці» і «Падрыхтоўцы да нападу на прадстаўніка замежнай дзяржавы, які карыстаецца міжнароднай абаронай».

Брытанская выведка звярнула ўвагу, што апошнім часам Расія ўзмацніла свае войскі на поўдні Украіны новымі верталётамі Ка-52М. Яны былі істотна мадэрнізаваны з улікам урокаў, вынесеных з расійскага досведу ў Сірыі, адзначаюць эксперты. Адным з ключавых паляпшэнняў Ка-52 з'яўляецца інтэграцыя новай супрацьтанкавай ракеты «LMUR», якая мае далёкасць паражэння каля 15 кіламетраў. Экіпажы Ка-52 хутка скарысталіся магчымасцю запускаць гэту зброю па-за межамі дасяжнасці ўкраінскай супрацьпаветранай абароны, гаворыцца ў аглядзе.