«Бі-бі-сі»: У Беларусі пабудаваны першы лагер для «вагнераўцаў»
Ранейшыя чуткі пра будаўніцтва лагера для размяшчэння ў ім наймітаў з ПВК «Вагнер» пацвердзіліся. Гэта будзе самы вялікі лагер з тых, у якіх размяшчаюцца расійскія вайскоўцы на тэрыторыі Беларусі.
«Беларускі Гаюн» са спасылкай на выданне «BBC Verify» паведамляе, што пад Асіповічамі завершана будаўніцтва палявога лагера. BBC атрымала апошнія спадарожнікавыя здымкі тэрыторыі былой ВЧ №61732 у в. Цэль (Асіповіцкі р-н, Магілёўская вобл.) за 30 чэрвеня 2023 года.
На іх выразна відаць, што будаўніцтва палявога лагера завершана. Камандзе «Гаюна» ўдалося падлічыць, што на фота прыкладна 298 намётаў. Відаць, што гэта палаткі М-30, у якіх у сярэднім можа размяшчацца па 30 чалавек. Такім чынам, абсталяваны месцы для 8 940 чалавек. Варта таксама разумець, што не ўсе палаткі з'яўляюцца жылымі. Там павінны быць арганізаваны таксама месцы для гаспадарчых патрэб: прыбіральні, душавыя, сталовыя і г. д.
Аднак можна з упэўненасцю сказаць, што лагер разбіты прыкладна для 8 000 чалавек. Гэтыя лічбы супадаюць з агучанымі раней расійскім выданнем «Вёрстка». Сваімі памерамі лагер перавышае іншыя вядомыя палявыя лагеры ў Беларусі, дзе праходзяць падрыхтоўку да вайны з Украінай мабілізаваныя расійскія салдаты.
Глядзіце таксама
Акрамя таго, на здымку можна заўважыць таксама абсталяваныя ўмацаванні ў паўночнай частцы былой ВЧ. Пры гэтым якой-небудзь будаўнічай або вайсковай тэхнікі на здымку не бачна.
Нагадваем, што некалькі дзён таму з'явілася інфармацыя пра будаўніцтва лагера ў Асіповіцкім раёне для размяшчэння там наймітаў з ПВК «Вагнер». Згаданае вышэй выданне «Вёрстка» паведамляла пра размяшчэнне васьмі тысяч чалавек. Акрамя таго, было заяўлена, што гэта будзе не адзіны лагер такога кшталту ў Беларусі. Як мінімум яшчэ адна пляцоўка для «вагнераўцаў» можа з'явіцца ў Гродзенскай вобласці.
Размяшчэнне расійскіх наймітаў стала магчымым пасля пагаднення паміж Уладзімірам Пуціным і Яўгенам Прыгожыным, якое было заключана пры пасрэдніцтве Аляксандра Лукашэнкі. Паводле заключаных дамоўленасцей, у Расіі спыняюць крымінальную справу «вагнераўцаў», заведзеную пасля так званага «мяцяжа», ПВК атрымае «гарантыі бяспекі», а яе кіраўнік «сыдзе ў Беларусь».