«Упершыню за 8 месяцаў убачыў сына». Гомельскі праваабаронца Леанід Судаленка сустрэўся з сям'ёй

У канцы жніўня Судаленка дамогся спаткання з сям'ёй, аб чым напісаў у лісце: «Упершыню за 8 месяцаў ўбачыў сына. Дзве гадзіны па тэлефоне праз два шкла. Тым не менш, прамень святла ў цёмным царстве».

У верасні, як піша з СІЗА-3 праваабаронца, яму пералічаць тэрмін у зняволенні. Цяпер дзень у СІЗА «ідзе ў залік» як паўтара. Бо Судаленка ў ізалятары з 18 студзеня, 8 месяцаў, то ў верасні яму «залічаць» год пад вартай, піша «Наша Ніва».

Расказваючы пра суд над сабой, ён працытаваў Шэкспіра: «Грехи других судить вы так усердно рвётесь, возьмитесь за свои — и да чужих не доберётесь». Пра прапанову напісаць «пакаянны ліст» Судаленка заўважыў: «Але я ж не вінаваты!».

Суд па справе супраць палітзняволенага праваабаронцы «Вясны» Леаніда Судаленкі і валанцёрак Таццяны Ласіцы, Марыі Тарасенка пачаўся 3 верасня і праходзіць у закрытым рэжыме. Іх вінавацяць у «арганізацыі і фінансаванні дзеянняў, якія груба парушаюць грамадскі парадак».