Украіна раскрыла дэталі ваенных вучэнняў на мяжы з Беларуссю
На мяжы з Беларуссю цяпер праходзяць украінскія ваенныя вучэнні, на якіх вайскоўцы «трэніруюцца праводзіць сумеснае вызваленне і зачыстку раёнаў ад варожых сіл».
Фота з тэлеграм-канала Уладзіміра Зяленскага
Нацгвардзейцы, памежнікі і байцы тэрытарыяльнай абароны Украіны ўдзельнічаюць у ваенных вучэннях «Північний Буревій 2022», якія праходзяць на мяжы з Беларуссю.
Пра гэта паведамляе РБК са спасылкай на прэс-службу Міністэрства ўнутраных спраў Украіны.
«Нацыянальная гвардыя Украіны, Дзяржаўная памежная служба і іншыя падраздзяленні МУС сумесна з сіламі тэрытарыяльнай абароны УСУ праводзяць актыўную фазу вучэнняў «Північний Буревій 2022» у раёнах, якія мяжуюць з Рэспублікай Беларусь», — сказана ў паведамленні ўкраінскага ведамства.
Украінскі бок таксама распавёў пра свае памежныя вучэнні наступнае: падчас вучэнняў украінскія праваахоўнікі і вайскоўцы адпрацоўваюць заданні па інжынерным уладкаванні абаронных пазіцый і мініраванні тэрыторыі.
Таксама ўкраінскі МУС заявіў, што іх падраздзяленні «трэніруюцца праводзіць сумеснае вызваленне і зачыстку раёнаў ад варожых сіл і адточваюць выяўленне, блакаванне і ліквідацыю ўзброеных фарміраванняў».
Украінскія вучэнні цяпер праходзяць на тэрыторыі Жытомірскай, Роўненскай і Валынскай абласцей.