Міністэрства культуры адказала пра закон аб бел-чырвона-белым сцягу
Адказ прыйшоў на імя дэпутаткі Палаты прадстаўнікоў Ганны Канапацкай, паведамляе «Радыё Свабода».
Ілюстрацыйнае фота. Апазіцыйная акцыя «Парад сцягоў» у Мінску. 21 жніўня 2015 года
«Калі казаць коратка, то адказ можна
звесці да аднаго сказу: гэта пытанне не нашай кампетэнцыі» — сказала 8
кастрычніка «Свабодзе» Канапацкая.
Паводле яе, паколькі ў лісце з Міністэрства культуры, як, дарэчы, і ў адказах яшчэ з двух міністэрстваў — унутраных спраў і юстыцыі, няма стаўлення міністэрстваў да законапраекту і бел-чырвона-белага сцяга, то давядзецца звяртацца ў іншыя інстанцыі. «Куды канкрэтна, мы вырашым з маёй калегай Аленай Анісім, таму што законапраект аб бел-чырвона-белым сцягу мы рыхтавалі супольна», — удакладніла Канапацкая.
Абедзве дэпутаткі выказвалі думку, што трэба дазволіць вольнае выкарыстанне гістарычнага сцяга ў Беларусі, у тым ліку дзяржаўнымі ўстановамі, і абараніць яго ад неправамерных перашкод у выкарыстанні.
Пазіцыя МУС: «У пададзеным праекце закону няма нарматыўных праўных загадаў і даручэнняў», якія датычацца ведамства.
Пазіцыя Міністэрства юстыцыі: «Законапраект неабходна ўзгадніць з шэрагам дзяржаўных органаў, у прыватнасці з Міністэрствам культуры».
Што важна ведаць аб законапраекце пра бел-чырвона-белы сцяг
14 траўня дэпутатка Палаты прадстаўнікоў Ганна Канапацкая прэзентавала грамадскасці законапраект аб выкарыстанні і ахове бел-чырвона-белага сцяга.
- Дакумент накіравалі ў міністэрствы
культуры, унутраных спраў і юстыцыі.
- Раней кампаніямі за наданне
бел-чырвона-беламу сцягу статусу гісторыка-культурнай каштоўнасці займаліся
«Арт Сядзіба», «Гавары праўду» і «Малады Фронт».
- Дзяржаўным сімвалам Рэспублікі
Беларусь бел-чырвона-белы сцяг быў з 1991 па 1995 год.