КДБ больш не падазрае Рамана Васільва
Супраць маладафронтаўца Рамана Васільева таксама спынілі крымінальную справу за «арганізацыю масавых беспарадкаў».
Маладафронтавец Раман Васільеў (справа) адразу пасля вызвалення і жонка лідара «Маладога фронту» Змітра Дашкевіча Наста
КДБ паведаміў Раману Васільеву, што супраць яго спыненая крымінальная справа за «арганізацыю масавых беспарадкаў» (частка 3 артыкулу 293 КК).
Ліст з КДБ падпісаны старшым следчым у асабліва важных справах 1-га аддзелу следчага ўпраўлення КДБ падпалкоўнікам юстыцыі Грыбам.
Раней лідар “Маладога фронту” Зміцер Дашкевіч і маладафронтавец Сяргей Пальчэўскі таксама паведамілі, што супраць іх спынены крымінальны пераслед паводле таго ж артыкулу.
Уладзь Яроменак паведаміў карэспандэнту “Радыё Свабода”, што пакуль не ведае, ці прыйшла яму такая ж папера.
«Я зараз за мяжой, таму дакладна не магу адказаць на гэтае пытанне. Пакуль што я паперы аб спыненні крымінальнай справы не бачыў», — сказаў Яроменак.
Уладзь Яроменак праходзіў у справе ў якасці падазраванага.
«Тым, каму не прад’явілі абвінавачванні, давалі падпісваць абавязанні аб яўцы», — сказаў актывіст.