«Эканоміка Літвы ацэньваецца больш, чым у 70 млрд еўра»: Аляксандр Кныровіч разбівае міфы прапаганды

Бізнесовец і блогер Аляксандр Кныровіч параўноўвае эканомікі Літвы і Беларусі і разбівае міфы прапаганды аб «жабрачай Літве», піша «Салідарнасць».

Бізнесовец і блогер, каб разбурыць міфы прапаганды, прадэманстраваў розніцу паміж Літвой і Беларуссю.

— Прапагандысты не стамляюцца распавядаць пра тое, як «жабракі літоўцы б'юцца праз памежны пераход у Беларусь для таго, каб купіць танныя і якасныя беларускія прадукты харчавання, Літва вымірае, яе прамысловасць разбураная», — заўважыў Аляксандр Кныровіч на сваім канале і вырашыў разбурыць міфы беларускай прапаганды.

У цяперашні час насельніцтва Літвы складае 2,8 млн чалавек, насельніцтва Беларусі — 9,2 млн чалавек. За два апошнія гады больш за 500 тысяч чалавек сапраўды наведалі Беларусь па бязвізе.

— Калі камусьці здаецца, што гэта велізарны паток, то задумайцеся над іншай лічбай, — раіць блогер. — За мінулы год аэрапорты Літвы перавезлі 6 мільёнаў пасажыраў.

Калі нават адкінуць, дапусцім, палову тых, зто вылятае, і нейкую колькасць транзітных пасажыраў, пакінуўшы толькі тых, хто прыляцеў, усё роўна атрымаецца, што ў Беларусь з Літвы за год заехала ў 10 разоў менш чалавек (250 тысяч), чым колькасць тых літоўцаў, якія аддаюць перавагу ездзіць па іншых напрамках.

Для таго, каб разбурыць міф пра нібыта забітую эканоміку суседняй краіны, Кныровіч прыводзіць некалькі наглядных прыкладаў.

— Нафтазавод Orlen Lietuva сёння належыць польскай кампаніі. Ён быў заснаваны яшчэ ў Савецкім Саюзе. Летась выручка гэтага завода склала 7,6 млрд еўра.

У Беларусі проста няма кампаніі, якую можна было б параўнаць па гэтым паказчыку з літоўскай. Выручка Orlen прыкладна ў тры разы большая, чым, напрыклад, выручка «Беларуськалія». А нашы абодва беларускія нафтазаводы ў лепшыя часы рабілі выручку ў два разы меншую, не кажучы ўжо пра тое, што літоўскае прадпрыемства яшчэ і прыбытковае. Прыбытак склаў каля паўмільярда долараў, з чаго, натуральна, была выплачаная велізарная сума ў бюджэт краіны.  

А вось беларускія нафтазаводы, як і многія іншыя прадпрыемствы, хутчэй забіраюць грошы з бюджэту, чым плацяць іх туды. Далей, вядомая беларускім будаўнікам кампанія Paroc. Гэта завод фінскага вытворцы каменнай ваты, які быў заснаваны ў Літве гадоў 30 таму і куды прыйшлі замежныя інвестыцыі.

Выручка гэтага завода склала больш за 70 млн еўра, прыбытак — каля 3 млн еўра. На заводзе працуюць 250 чалавек, а сярэдняя зарплата ў іх — 3633 еўра. Дырэктар такога ж беларускага завода «Гомельбудматэрыялы» ў адным з інтэрв'ю ганарыўся тым, што заробак супрацоўнікаў дасягнуў 2400 рублёў, або менш за 800 еўра.

Гэта значыць розніца ў заробках паміж двума вельмі падобнымі прадпрыемствамі — у 6-7 разоў!

Пры гэтым у гомельскі завод будматэрыялаў дзяржава ўклала велізарную колькасць бюджэтных грошай, а выручку ён мае ў два разы меншую, чым падобнае літоўскае прадпрыемства.  

Прадпрыемства Thermo Fisher Scientific Baltic працуе з біятэхналогіямі. Яно ў тым ліку вырабляла кампаненты для барацьбы з кавідам.

Амерыканскія інвестыцыі ў прадпрыемства склалі больш за 6 млн еўра. Выручка ў мінулым годзе была паўтара мільярда еўра, прыбытак — 500 млн. У кампаніі працуюць 1500 чалавек, сярэдні заробак — 3000 еўра.

Для параўнання: у Беларусі такога прадпрыемства няма. У нас уся медыцынская прамысловасць дае прыкладна 500 млн долараў выручкі, не кажучы ўжо пра тое, што прыбытку там не назіраецца.

Яшчэ адно вядомае ўсім беларусам прадпрыемства — літоўская сетка супермаркетаў Maxima, з выручкай — 4,5 млрд еўра. Затое ў Беларусі ёсць «Еўраопт» з выручкай прыкладна 2 млрд еўра.

І гэта ўсё, нягледзячы на памер і колькасць насельніцтва Літвы і Беларусі, адзначае блогер.

Кныровіч робіць выснову, што эканоміка суседняй, значна меншай дзяржавы, значна больш моцная, чым эканоміка Беларусі.

— Эканоміка Літвы знаходзіцца прыкладна на 40-м месцы ў свеце — і гэта вельмі высокі паказчык. Эканоміка Беларусі знаходзіцца на 80-м месцы ў свеце. Гэтым вызначаецца розніца ў сярэдніх заробках: у Літве гэта 1500 еўра пасля выліку падаткаў, а ў Беларусі — блізу 500 еўра. Істотная і розніца ў сацыяльных выплатах, у пенсіях і па многіх іншых эканамічных і фінансавых паказчыках.

Нагадаю, што ў Літву з'ехалі EPAM, Wargaming і іншыя IT-кампаніі, якія ствараюць ім дадатковы валавы прадукт і новую дабаўленую вартасць. У выніку эканоміка маленькай Літвы сёння ўжо большая, чым Беларусі. Так, эканоміка Беларусі ацэньваецца ў 66 млрд еўра, а Літвы — больш, чым у 70 млрд еўра.

Мы адсталі ад Літвы на шмат-шмат гадоў, а ў яе трэба было б павучыцца таму, як будаваць эканоміку без танных нафтапрадуктаў з Расіі, без пацалункаў з Пуціным і без размяшчэння войскаў і допуску агрэсіі са сваёй тэрыторыі ў бок іншай краіны, — зрабіў выснову Кныровіч.