«Вярнулі Ганконг, вернем і Уладзівасток». Кітай рыхтуецца да паразы Расіі?
На фоне нібыта ўмацавання сувязяў з Масквой і чутак пра пастаўкі ўзбраенняў Расіі Міністэрства прыродных рэсурсаў Кітая апублікавала новыя правілы тапанімікі карт. Ініцыятыва дзіўная і паказальная.
Малюнак з тэлеграм-канала «Кітайская пагроза»
Асаблівасць новых правілаў заключаецца ў тым, што ў правілах гаворыцца аб вяртанні да выкарыстання кітайскіх назваў васьмі гарадоў і раёнаў, акупаваных Расійскай імперыяй у канцы XIX і пачатку XX стагоддзяў. Згодна з дырэктывай, Уладзівасток зноў называецца Хайшэньвай (Заліў марскіх агуркоў), Хабараўск — Болі, а востраў Сахалін — Куедао.
Аўтар тэлеграм-канала «Кітайская пагроза» адзначае, што для некаторых кітайскіх аглядальнікаў не было незвычайным час ад часу пісаць артыкулы, у якіх чытачам нагадвалі, колькі кітайскіх зямель было захоплена замежнымі дзяржавамі з сярэдзіны XIX стагоддзя. Прычым, гэтыя артыкулы дазволена размяшчаць і распаўсюджваць у Інтэрнэце. Тым не менш дзіўна, што Пекін змяніў правілы для карт у гэты складаны час, на фоне ўмацавання сувязяў з Масквой.
Расійскі ўрад пакуль ніяк не пракаментаваў гэтае пытанне.
«Кітайская пагроза» таксама цытуе японскага журналіста Акіё Яіта:
— Гэта рашэнне выклікала гарачую дыскусію сярод кітайскіх карыстальнікаў сеткі. Некаторыя нават лічаць, што «кітайскі ўрад прыгадаў гады зневажанняў і вырашыў вярнуць страчаныя тэрыторыі ў будучыні».
Выкарыстоўваць сітуацыю, каб набыць для сябе перавагу — звычайная манера паводзінаў Кітая, адзначае журналіст. Цяпер дружба з Расіяй — выгадная здзелка, але, калі Расія абрынецца, Сі Цзіньпін накладзе вялікую руку на аднаўленне страчаных у мінулым пазіцый.
Акіё Яіта нагадвае пра нядаўні візіт у Маскву Ван І, загадчыка канцылярыяй камісіі ЦК КПК па замежных справах:
— Ён усюды паляпваў сябе па грудзях і казаў: «Кітайска-расійскае сяброўства — гэта трывалая скала». Аднак кожны, хто вывучае гісторыю кітайска-расійскіх адносін, ведае, што гэта цэлая энцыклапедыя інтрыг і падступства.
Нагадаем, днямі заходнія СМІ распаўсюдзілі звесткі, згодна з якімі Кітай сур'ёзна разглядае магчымасць продажу Расіі баявых беспілотнікаў, асабістай зброі, а таксама артылерыйскіх снарадаў калібра 122 мм і 152 мм. Гэта пацвердзіў дырэктар ЦРУ Уільям Бернс, аднак, па яго словах, Кітай яшчэ не прыняў рашэння з гэтай нагоды.
Са свайго боку, адзначыў ён, адміністрацыя Джо Байдэна спрабуе перасцерагчы ўладу Кітая ад прыняцця такога рашэння.
«Мы не бачым, што канчатковае рашэнне ўжо прынятае і не бачым доказаў фактычных паставак смяротнага ўзбраення. Менавіта таму Блінкен і прэзідэнт выразна выступілі з тлумачэннямі аб наступствах такога кроку», — заявіў Бернс.