РФ стварае «гуманітарны крызіс ва Украіне»: свет адрэагаваў на масіраваны абстрэл украінскай энергасістэмы
Паводле ўкраінскіх уладаў, больш за мільён карыстальнікаў ва Украіне засталіся без электрычнасці ў выніку масіраванай расійскай паветранай атакі ўначы. Прэзідэнт Украіны Уладзімір Зяленскі абвінаваціў Расію ў выкарыстанні касетных боепрыпасаў.
Ратавальнікі ліквідавалі пажар на аб'екце энергетычнай інфраструктуры пасля ракетнага ўдару ў Луцку, 28 лістапада 2024 года. Больш за мільён украінцаў засталіся без электрычнасці ў маразы пасля масіраваных расійскіх абстрэлаў. Фота: ДСНС Украіны / AFP
На Захадзе кажуць пра недапушчальнасць падобных нападаў, якія ствараюць гуманітарны крызіс. Нідэрланды абвясцілі аб пастаўцы Украіне ЗРК Patriot для абароны Украіны гэтай зімой, піша «Голас Амерыкі».
Ваенна-паветраныя сілы Украіны паведамілі аб выяўленні 188 сродкаў паветранага нападу, у тым ліку 91 ракеты розных тыпаў і 97 штурмавых беспілотнікаў розных тыпаў.
«Ракетна-беспілотны ўдар праціўніка быў нанесены па энергетычных аб'ектах Украіны», — адзначылі ў ВПС.
Прэзідэнт Украіны Уладзімір Зяленскі назваў выкарыстанне касетных боепрыпасаў «вельмі гнюснай эскаляцыяй расійска-тэрарыстычнай тактыкі».
«Усяго каля 100 ударных беспілотнікаў, больш за 90 ракет розных тыпаў. У шэрагу рэгіёнаў былі зафіксаваныя ўдары «Калібрамі» з касетнымі боепрыпасамі, у прыватнасці, па грамадзянскай інфраструктуры. Гэтыя касетныя дэталі значна ўскладняюць ліквідацыю наступстваў атакі нашым ратавальнікам і энергетыкам, і гэта вельмі подлая эскалацыя тактыкі расійскіх тэрарыстаў», — напісаў Зяленскі, у прыватнасці, на сваёй старонцы на Х.
Гэта другая буйная расійская атака на энергетычную інфраструктуру Украіны ў лістападзе. Па дадзеных украінскіх чыноўнікаў, пашкоджанні аб'ектаў энергетычнай і іншай крытычнай інфраструктуры ёсць у Львоўскай, Валынскай, Ровенскай і Хмяльніцкай абласцях на захадзе, Мікалаеўскай і Херсонскай абласцях на поўдні і Жытомірскай вобласці ў цэнтры Украіны.
Абараніцца ад абстрэлаў гэтай зімой дапамогуць устаноўкі Patriot, пастаўленыя ва Украіну Нідэрландамі. Пра гэта 28 лістапада напісаў міністр абароны Нідэрландаў Рубен Брэкельманс.
«Украінцаў чакае цяжкая зіма, бо працягваюцца разбуральныя авіяўдары», — напісаў Брэкельманс на сваёй старонцы ў сетцы «Х». — Таму мы ўстанавілі 3 пускавыя ўстаноўкі «Патрыёт». Гэта ратуе жыцці і абараняе жыццёва важную інфраструктуру».
Брэкельманс не сказаў, калі менавіта былі прадастаўлены пускавыя ўстаноўкі, і ці было яго паведамленне звязана з расійскай атакай 28 лістапада.
«У нашых агульных інтарэсах ёсць і застаецца спыніць расійскую агрэсію», — дадаў Брэкельманс.
На напад адрэагавала і амбасадар ЗША ва Украіне Брыджыт Брынк.
«Раніцай у чацвер у Кіеве, у Дзень падзякі, мы прачнуліся ад гукаў сірэнаў авіяналёту, а ў сховішчы ўбачылі, што ўся краіна «чырвоная» з-за пагрозы ракетнага ўдару з боку Расіі, энергетычная інфраструктура Украіна падвяргалася нападу», — сказала яна ў паведамленні ў сетцы X.
Пазней Брынк дадала: «Пры мінусовых тэмпературах 1 мільён чалавек застаўся без электрычнасці ў выніку начной атакі Расіі 100 беспілотнікамі і 90 ракетамі па энергетычнай інфраструктуры Украіны».
Начны авіяўдар Расіі яшчэ больш узмацніў папярэджанні аб магчымых працяглых адключэннях электраэнергіі ў зімовыя месяцы, на фоне цяперашніх тэмператур ва Украіне, якія вагаюцца каля нуля.
Глядзіце таксама
Так, амбасадар Вялікабрытаніі ў Арганізацыі па бяспецы і супрацоўніцтву ў Еўропе (АБСЕ) Ніл Холанд абвінаваціў Расію ў стварэнні «гуманітарнага крызісу ва Украіне».
«За апошні месяц Расія ўзмацніла авіяўдары, у першую чаргу па энергетычнай інфраструктуры, што прывяло да поўнага адключэння святла ў некалькіх рэгіёнах. Атакі мінулай ночы былі апошнімі ў серыі (атак), сказаў Холанд у сваёй прамове ў Вене 28 лістапада, якую цытуе брытанскае выданне The Guardian. «З набліжэннем зімы і рэзкім падзеннем тэмператур гэтая дадатковая нагрузка на электрасетку выклікае глыбокую занепакоенасць і непрапарцыйна паўплывае на ўразлівыя групы насельніцтва, у тым ліку пажылых і хворых».
«Мы не можам ігнараваць пакуты ва Украіне. Наша калектыўная адказнасць дзейнічаць рашуча, каб палегчыць гэты гуманітарны крызіс», — дадаў ён.
«Калі тэмпература ніжэй за нуль, адчайнае становішча ўразлівых людзей становіцца яшчэ больш небяспечным», — заявіў у заяве каардынатар гуманітарнай дапамогі ААН ва Украіне Маціяс Шмале.
«Напады на мірных жыхароў і грамадзянскія аб'екты забароненыя міжнародным гуманітарным правам», — нагадаў ён.
Глядзіце таксама
Сцюарт Рамзі, галоўны карэспандэнт брытанскай сеткі SkyNews у Кіеве, назваў расійскія атакі «псіхічнай атакай».
«Расійская стратэгія — падарваць баявы дух і знясіліць украінскі народ», — сказаў Рамзі ў паведамленні з Кіева. — Абстрэл энергетычнай інфраструктуры неабавязкова дае расіянам ваенную перавагу, але гэта атака на псіхіку Украіны».
Рамзі засведчыў, што людзі, з якімі ён размаўляў ва Украіне ў апошнія дні, кажуць, што «спалучэнне адключэння электраэнергіі і пагрозы беспілотнікаў і ракет з неба моцна ўплывае на іх, і асабліва на дзяцей, некаторыя з якіх правялі чарговую ноч у бамбасховішчах».
Прадстаўніцтва ЮНІСЕФ ва Украіне таксама ўказала на павышаную небяспеку для дзяцей ва ўмовах, калі пакутуе энергетычная інфраструктура.
«Дзеці ва Украіне падвяргаюцца дадатковай рызыцы, калі ў марозныя зімовыя месяцы адключаецца электрагенерацыя, што ўплывае на:
- Сістэмы ацяплення
- Доступ да вады
- Медыцынскія паслугі
- Адукацыя
Абараніце мірных жыхароў і грамадзянскую інфраструктуру ад нападу!» — адзначыла арганізацыя на сваёй старонцы ў сетцы Х.
«Сёння раніцай на фоне паніжэння тэмпературы ўзброеныя сілы Расіі здзейснілі чарговую маштабную атаку на аб'екты энергетычнай інфраструктуры Украіны», — адзначылі ў Маніторынгавай місіі ААН па правах чалавека ва Украіне.
«Як мы пісалі ў дакладзе ў пачатку гэтага года, такія напады наносяць сур'ёзны і доўгатэрміновы ўрон грамадзянскаму насельніцтву», — дадаецца ў паведамленні місіі на Х.
Паводле прэзідэнта Расіі Пуціна, масіраваная начная паветраная атака Расіі па энергасістэме Украіны стала адказам на выкарыстанне Кіевам амерыканскіх ракет ATACMS для паражэння ваенных аб'ектаў на тэрыторыі Расіі.