Расія заблакавала нараду АБСЕ па выкананні правоў чалавека

Расія заблакавала правядзенне ў Польшчы нарады АБСЕ па пытаннях чалавечага вымярэння ў рэгіёне Еўропа-Еўразія. Пра гэта гаворыцца ў заяве кіраўніка Дзярждэпа ЗША Энтані Блінкена.

«Учора ў Варшаве павінна была адбыцца вядучая канферэнцыя па пытаннях чалавечага вымярэння-2021 у рэгіёне Еўропа-Еўразія. На жаль, нарада АБСЕ не адбылася праз рашэнне ўрада Расіі яе сарваць. Мы глыбока занепакоеныя спробай расіян заблакаваць праверку з нагоды пагаршэння становішча ў сферы правоў чалавека», — тлумачыць Блінкен.
Адзначаецца, што з моманту прыняцця Хельсінкскага заключнага акта 1975 года АБСЕ прызнала, што павага да правоў чалавека неабходная для захавання міру і бяспекі.
«Мы працягваем заклікаць Расію выконваць узятыя на сябе абавязацельствы, у тым ліку гарантаваць абарону асноўных свабод і дазваляць грамадзянам патрабаваць ад урада падсправаздачнасці, у тым ліку шляхам свабодных і справядлівых выбараў», — гаворыцца ў паведамленні.
У Вашынгтоне дадалі, што ЗША не будуць ігнараваць парушэнні правоў чалавека.
«Мы працягваем рабіць усё, што ад нас залежыць, каб прыцягнуць увагу да ўсяго спектру праблем у сферы правоў чалавека ў рэгіёне АБСЕ. І мы будзем працаваць з саюзнікамі і партнёрамі для абароны прынцыпу ўсёабдымных штогадовых аглядаў чалавечага вымярэння пры актыўным удзеле грамадзянскай супольнасці», — заявіў Блінкен.
Расію пастаянна абвінавачваюць у ігнараванні правоў чалавека ў краіне і на акупаваных тэрыторыях. Так, згодна з дакладам ААН за чэрвень 2021 года, на вышэйшым дыпламатычным узроўні пацвердзілі пераслед крымчан, прымяненне катаванняў для самаагаворвання, перасоўванне незаконна асуджаных на тэрыторыю Расіі, беспакаранасць органаў улады, у тым ліку і ФСБ.
16 верасня ў ЕС прынялі жорсткі даклад аб пераглядзе адносін з Расіяй на фоне правядзення выбараў у Дзярждуму РФ. Тады да галасавання незаконна прыцягнулі жыхароў Луганскай і Данецкай абласцей і Крыма з расійскімі пашпартамі.
Паводле unian.net