Расія планавала атакаваць базу NATO з самалётамі-разведчыкамі?
Узмацненне мер бяспекі на авіябазе NATO ў нямецкім горадзе Гайленкірхен выклікана пагрозай дыверсіі з боку РФ. Ці расійскія шпіёны рыхтавалі правакацыю на натаўскай авіябазе , высвятляў «Голас Амерыкі».
Авіябаза ў Гайленкірхене, 2017 год. Фота wikimedia.org/Clemens Vasters
Пра пагрозу расійскай дыверсіі паведамляе агенцтва dpa са спасылкай на крыніцу ў нямецкіх спецслужбах.
Гэта адбылося яшчэ 23 жніўня. Тады авіябаза NATO ў Гайленкірхене (што недалёка ад Ахена) заявіла, што павысіла ўзровень пагрозы «на аснове разведданых, якія ўказваюць на патэнцыйную пагрозу».
Афіцыйны прадстаўнік базы сказаў, што ўзровень пагрозы быў павышаны да другога па велічыні з чатырох станаў гатоўнасці, што вызначаецца як «адбыўся інцыдэнт або атрыманая інфармацыя, якая ўказвае на тое, што нейкая форма тэрарыстычнай дзейнасці супраць арганізацый або персаналу NATO вельмі верагодная».
Таксама днямі пракуратура ў Фленсбургу, на поўначы Германіі, заявіла, што расследуе падазрэнні ў шпіянажы з мэтай дыверсіі, не ўдакладняючы, хто можа за гэтым стаяць. Нямецкія СМІ паведамляюць, што беспілотнікі былі заўважаныя над хімічным заводам у Брунсбютэлі на ўзбярэжжы Паўночнага мора.
«Радыё Свабода» адзначае, што гэта можа быць тып «Арлан-10», аднак гэтыя здагадкі пакуль афіцыйна не пацверджаныя. Дроны ляцелі з хуткасцю 100 кіламетраў на гадзіну, што адпавядае хуткасці руху гэтых лятальных апаратаў.
Артыкул агенцтва dpa
У Гайленкірхене, недалёка ад мяжы з Нідэрландамі, базуюцца самалёты Альянсу па бартавой сістэме ранняга папярэджання і кантролю (AWACS).
Гэта быў другі раз за апошнія дні, калі на базе, дзе размешчаны самалёты назірання NATO AWACS, узмацнілі ахову.
Самалёты Awacs маюць радыус дзеяння 9250 кіламетраў і могуць вызначаць месцазнаходжанне і ідэнтыфікаваць іншыя самалёты на адлегласці больш чым 400 кіламетраў. На самалётах таксама ёсць вялікі радар, які нагадвае грыб.
Паводле слоў прэс-сакратара, на аэрадроме NATO працуе каля 1600 чалавек, цяпер іх значна менш з-за святаў. Каля паловы супрацоўнікаў ужо не было на месцы з-за мер бяспекі. Многія працавалі дома.
Раней ваенная база ў Кёльне была часова закрытая, бо ўлады расследавалі магчымыя дыверсіі на водазабеспячэнні: было падазрэнне на атручванне вады трэцімі асобамі, якія праніклі на вайсковую базу. Пазней нямецкія ваенныя заявілі, што вынікі аналізаў паказалі, што вадаправодная вада не была забруджаная.
У той жа дзень база Хайленкірхен таксама паведаміла аб спробе незаконнага пранікнення, што выклікала поўную праверку на базе.
У мінулым NATO папярэджвала аб кампаніі варожых дзеянняў, арганізаванай Расіяй, у тым ліку дыверсіях і кібератаках.
Зрэшты, раней на многіх ваенных базах у Германіі гучалі папярэджанні аб тэрарыстычнай пагрозе.
Расія рэгулярна абвінавачвае НАТО ў пагрозе яе бяспецы.
У чэрвені генеральны сакратар NATO Енс Столтэнберг заявіў, што Альянс бачыць заканамернасць і што нядаўнія атакі былі вынікам узмацнення расійскай разведкі.
Некалькі інцыдэнтаў на тэрыторыі NATO за апошнія гады разглядаліся аналітыкамі як падазроныя, у тым ліку разрыў жыццёва важнага падводнага кабелю, які злучае Шпіцберген з мацерыковай Нарвегіяй у 2022 годзе.
Гэтыя інцыдэнты адбываюцца ў той час, калі саюзнікі занепакоеныя магчымай уразлівасцю крытычна важнай інфраструктуры краін NATO перад спробамі расейскіх дыверсій.