Мікіта Емяльянаў спыніў галадоўку, але яго працягваюць утрымліваць у ШІЗА

Мікіту Емяльянаву дадалі яшчэ 10 сутак штрафнога ізалятара. Вядома таксама, што хлопец спыніў галадоўку, якую трымаў з 3 лютага.

24 лютага стала вядома, што палітзняволенаму анархісту Мікіту Емяльянаву дадалі яшчэ 10 сутак штрафнога ізалятара. Цяпер ён прабудзе там да 4 сакавіка. Вядома, што хлопец спыніў галадоўку, якую трымаў з 3 лютага, паведамляюць палітвязні.

Маці палітзняволенага атрымала два адказы на свае скаргі ад адміністрацыі турмы №4 за подпісам начальніка Аляксандра Лауэра. 

У першым адказе значыцца, што Мікіта абвясціў галадоўку, яго паводзіны носяць «установачны, дэманстратыўна-шантажны характар, што ў наступстве можа нанесці шкоду яго здароўю». Родным хлопца прапаноўвалася ў пісьмовай форме паведаміць сыну пра неабходнасць спынення галадоўкі з мэтай захавання здароўя.

Пасля гэтага кіраўніцтвам быў дасланы ліст, дзе было ўказана, што першы адказ — памылковы. Быў дасланы другі адказ, у якім ужо адзначалася, што Мікіта спыніў галадоўку і на 25 лютага яго стан задавальняючы, за ім працягваюць назіраць медыкі.