Вялікабрытанія гатовая перадаць Украіне актывы Цэнтрабанка Расіі
Згодна з планамі Лондана, Расія зможа атрымаць грошы назад, калі выплаціць рэпарацыі Украіне, адзначае «Нямецкая хваля». Пры гэтым незразумела, якім чынам РФ атрымае грошы назад, калі Украіна не пераможа на полі бою, адзначае Guardian.
Кіраўнік МЗС Дэвід Кэмеран гатовы аддаць грошы Расіі Украіне. Фота Thomas Kienzle/AFP
Вялікабрытанія гатовая перадаць Украіне ўсе замарожаныя ў краіне актывы Цэнтрабанка РФ у выглядзе пазыкі з улікам таго, што пасля заканчэння вайны Расіі давядзецца выплачваць рэпарацыі, паведаміла ў сераду, 6 сакавіка, брытанская газета The Guardian са спасылкай на міністра замежных спраў Вялікабрытаніі Дэвіда Кэмерана.
Згодна з планам Кэмерана, калі Расія выплаціць рэпарацыі, пазыка будзе вернутая, і ў выніку Масква атрымае доступ да сваіх сродкаў.
«Ёсць магчымасць выкарыстоўваць нешта накшталт сіндыкаванага крэдыту або пазыковага абавязання, якое фактычна выкарыстоўвае замарожаныя расійскія актывы ў якасці закладу, каб перадаць гэтыя грошы ўкраінцам, ведаючы, што мы вернем іх, калі Расія заплаціць рэпарацыі», — растлумачыў Кэмеран.
Міністр адзначыў, што Вялікабрытанія імкнецца да скаардынаванай пазіцыі з краінамі «Вялікай сямёркі» і Еўрасаюза ў пытанні перадачы замарожаных расійскіх актываў Украіне, але ў выпадку неабходнасці гатовая пайсці на гэты крок і без калектыўнага рашэння.
Глядзіце таксама
Моцныя і слабыя бакі плана
The Guardian называе моцным бокам плану тое, што фармальна ён не прадугледжвае канфіскацыі расійскіх актываў, паколькі мяркуецца, што ў выніку Масква атрымае да іх доступ.
Пры гэтым, адзначае выданне, у плана ёсць і слабы бок: калі Украіна не атрымае перамогу на полі бою, то Расія не пагодзіцца выплачваць ёй рэпарацыі — і тады будзе незразумела, як вяртаць грошы Маскве.
На думку выдання, той факт, што Кэмеран упершыню так адкрыта і падрабязна кажа пра гэтую прапанову, можа сведчыць аб палітычнай падтрымцы гэтага плана ў ЗША, але не ў ЕС.
Глядзіце таксама
Замарожаныя актывы ЦБ РФ у Брытаніі
У Вялікабрытаніі пасля пачатку вайны Расіі супраць Украіны былі замарожаныя актывы ЦБ РФ амаль на 25 мільярдаў фунтаў стэрлінгаў (32 мільярды долараў), але афіцыйна пра гэта не паведамлялася, піша The Guardian.
У канцы студзеня краіны ЕС узгаднілі план перадачы прыбытку, атрыманага ад замарожаных у Еўрасаюзе расійскіх актываў, у спецыяльны фонд, з якога грошы пасля можна будзе выкарыстоўваць для аднаўлення Украіны. Механізм рэалізацыі гэтага плана ў цяперашні час распрацоўваецца.
Паводле звестак Bloomberg, ЗША разлічваюць, што краіны «Сямёркі» змогуць прыняць пастанову аб выкарыстанні актываў ЦБ РФ на саміце ў чэрвені. Пры гэтым краіны G7 пакуль не прыйшлі да адзінага меркавання аб тым, як менавіта выкарыстоўваць расійскія актывы, але ўсе яны згодныя з тым, што гэтыя сродкі павінны заставацца недаступнымі для Расіі, калі яна не паабяцае аказаць садзейнічанне ў аднаўленні Украіны.
Глядзіце таксама
Паводле www.dw.com