Украіна цяпер мае ўласную зброю, каб нанесці ўдар па тэрыторыі Расіі без згоды ЗША — Зяленскі

Прэзідэнт Украіны Уладзімір Зяленскі заявіў у нядзелю, што Украіна цяпер можа нанесці ўдар глыбока ў тэрыторыю Расіі без неабходнасці каардынацыі з ЗША. «На сённяшні дзень мы выкарыстоўваем нашу айчынную зброю далёкага радыусу дзеяння. І, шчыра кажучы, мы апошнім часам не абмяркоўвалі такія пытанні з ЗША», — сказаў Зеленскі на сумеснай прэс-канферэнцыі з прэм'ер-міністрам Канады Маркам Карні. Ідуць 1279-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

«Быў час, калі паступалі розныя сігналы адносна нашых удараў у адказ пасля іх нападаў на нашу энергетычную сістэму», — сказаў Зяленскі, маючы на ​​ўвазе ўдары Расіі па ўкраінскай інфраструктуры. «Гэта было ўжо вельмі даўно. Сёння мы нават пра гэта не згадваем».

Заява ўкраінскага лідара сведчыць пра маштабныя змены ў тым, што гадамі было статус-кво ў галіне глыбокіх ударных магчымасцей Кіева. Украіна, якая ў значнай ступені залежыла ад заходніх сістэм далёкага радыусу дзеяння, такіх як амерыканскія тактычныя ракетныя сістэмы, звычайна патрабавала ўхвалення ЗША і іх саюзнікаў для нанясення ўдараў па Расіі, піша businessinsider.com.

Краіны NATO, баючыся эскалацыі з Масквой, месяцамі не дазвалялі Кіеву наносіць удары па тэрыторыі Расіі, абмяжоўваючыся ўдарамі па цэлях на тэрыторыі Украіны.

Кошты на нафту растуць пасля ўкраінскіх атак на расійскія энергетычныя аб'екты

Кошты на нафту выраслі ў панядзелак пасля таго, як Украіна ўзмацніла напады на Расію, што выклікала занепакоенасць з нагоды магчымага парушэння паставак расійскай нафты, паведамляе Reuters. Ф'ючэрсы на нафту маркі Brent выраслі на 13 цэнтаў, або на 0,19%, да 67,86 долара а 06:56 па Грынвічы, а ф'ючэрсы на нафту West Texas Intermediate (WTI) — на 15 цэнтаў, або на 0,24%, да 63,81 долара.

У нядзелю Украіна здзейсніла атаку беспілотнікаў на Расію, што прывяло да рэзкага падзення магутнасці рэактара на адной з найбуйнейшых расійскіх атамных электрастанцый і справакавала велізарны пажар на тэрмінале экспарту паліва ва Усць-Лузе, паведамілі расійскія чыноўнікі.

Акрамя таго, пяты дзень працягваецца пажар на расійскім Новашахцінскім нафтаперапрацоўчым заводзе, выкліканы атакай украінскага беспілотніка. Нафтаперапрацоўчы завод прадае паліва ў асноўным на экспарт і мае гадавую магутнасць 5 мільёнаў метрычных тон нафты, або каля 100 000 барэляў у дзень.

«Улічваючы поспех Украіны ў нападзе на расійскую нафтавую інфраструктуру... рызыкі для сырой нафты ссоўваюцца ўверх», — сказаў аналітык рынку IG Тоні Сікамор.

24 жніўня Украіна і Расія правялі чарговы абмен палоннымі

Украінскі каардынацыйны штаб па абыходжанні з ваеннапалоннымі і Міністэрства абароны Расіі паведамілі, што Украіна і Расія абмяняліся па 146 ваеннапалоннымі. Расія таксама вызваліла трох мірных жыхароў, двух журналістаў і былога мэра Херсона Уладзіміра Мікалаенку, а Украіна — восем жыхароў Курскай вобласці. Украінскі каардынацыйны штаб па абыходжанні з ваеннапалоннымі паведаміў, што гэты абмен адпавядае дамоўленасцям, дасягнутым бакамі ў Стамбуле 2 чэрвеня. Абмен прайшоў пры пасрэдніцтве Аб'яднаных Арабскіх Эміратаў.

Нарвегія выдаткоўвае 7 млрд крон на супрацьпаветраную абарону Украіны

Урад Нарвегіі афіцыйна абвясціў аб выдзяленні каля 7 мільярдаў крон для ўзмацнення ўкраінскай СПА. Сістэмы будуць дастаўленыя з Германіі ва Украіну.

У пакет дапамогі ўваходзіць:

два комплекса Patriot разам з ракетамі (фінансаванне сумесна з Германіяй);

закупка радараў СПА ад нямецкага вытворцы Hensoldt;

пастаўка сістэм супрацьпаветранай абароны ад нарвежскай кампаніі Kongsberg.

Германія настойвае на пашырэнні гарантый для Украіны

Будучыя гарантыі бяспекі для Украіны пасля магчымага мірнага пагаднення павінны быць максімальна набліжанымі да сяброўства ў NATO. Пра гэта заявіў міністр замежных спраў Германіі Ёган Вадэфуль .

Паводле яго слоў, гарантыі бяспекі для Украіны павінны прадастаўляць не толькі еўрапейскія краіны. Вадэфуль падкрэсліў, што каля 30 дзяржаў, сярод якіх і Японія, ужо заявілі пра гатоўнасць падтрымаць Украіну.

«Мы не можам патрабаваць ад Украіны сур'ёзна думаць аб тэрытарыяльных саступках, калі яна не атрымае як мінімум рэальныя гарантыі бяспекі ад як мага большай колькасці дзяржаў, што прынамсі астатняя частка (украінскай тэрыторыі, – рэд.) будзе ў бяспецы», — цытуе кіраўніка МЗС Deutsche Welle.

*****

У ноч на 25 жніўня РФ атакавала Украіну 104 ударнымі БпЛА типу Shahed і беспілотнікамі-імітаторамі розных тыпаў з Курску, Шаталава, Арла, Мілерава, Прыморска-Ахтарску. 

Сілы СПА абясшкодзілі 76 БПЛА. 28 дронаў трапілі на 15 лакацыях, таксама зафіксавана падзенне абломкаў на 4 лакацыях.

У выніку масіраванага ўдару дронаў па Сумшчыне загінуў адзін чалавек, яшчэ дзевяць параненыя.

*****

Агульныя баявыя страты праціўніка з 24.02.22 па 25.08.25 арыентыровачна склалі:

• асабістага складу — каля 1076940 (+870) чалавек
• танкаў — 11130 (+1) адз
• баявых браніраваных машын — 23175 (+8) адз
• артылерыйскіх сістэм —31946 (+48) адз
• РСЗА — 1472 (+0) АДЗ
• сродкі СПА — 1211 (+0) адз
• самалётаў — 422 (+0) адз
• верталётаў — 340 (+0)
• БПЛА аператыўна-тактычнага ўзроўню — 53347 (+291)
• крылатыя ракеты — 3598 (+0)
• караблі / катэры — 28 (+0)
• падводныя лодкі — 1 (+0)
• аўтамабільная тэхніка і аўтацыстэрны — 59672 (+ 79)
• спецыяльная тэхніка / special equipment — 3948 (+ 4).