647-мы дзень поўнамаштабнай вайны Расіі супраць Украіны: галоўнае на гэты момант

Апошнія навіны з украінскага фронту — у аглядзе СМІ.

***

На думку спецыялістаў амерыканскага «Інстытута вывучэння вайны» (ISW), кіраўніцтва Расіі гаворыць пра «актыўную абарону» Аўдзееўкі, каб «схаваць адсутнасць якога-небудзь значнага расійскага прагрэсу вакол Аўдзееўкі» і растлумачыць няздольнасць акупантаў «трансфармаваць тактычныя дасягненні ў аператыўна значныя поспехі».

Аналітыкі адзначаюць, што міністр абароны Расіі Сяргей Шайгу працягвае ілжыва характарызаваць расійскія наступальныя дзеянні ва Украіне як частку «актыўнай абароны», спрабуючы зменшыць чаканні адносна здольнасці расійскіх вайскоўцаў дасягнуць аператыўна важных мэт.

Шайгу заявіў 1 снежня падчас селектарнай нарады з расійскім вайсковым кіраўніцтвам, што расійскія войскі вядуць «актыўную абарону» ва Украіне і захопліваюць больш выгадныя пазіцыі на кожным аператыўным кірунку.

Паводле звестак экспертаў, расійскі міністр адзначыў тыя брыгады, якія, імаверна, дзейнічаюць у раёнах, дзе расійскія войскі праводзяць наступальныя аперацыі на ўсходзе Украіны, а не абараняюцца ад украінскіх контрнаступальных аперацый у Запарожскай вобласці.

Шайгу і Пуцін раней называлі расійскія наступальныя аперацыі па захопе Аўдзееўкі «актыўнай абаронай» пасля таго, як першае расійскае механізаванае наступленне не змагло дасягнуць значных тактычных поспехаў у пачатку кастрычніка 2023 года.

Пасля гэтага расійскія войскі пачалі два наступныя шырокамаштабныя наступы з мэтай захопу Аўдзееўкі і працягваюць высокімі тэмпамі атакаваць населены пункт з выкарыстаннем знясіленай пяхоты.

У аглядзе ISW адзначаюць: «Расійскія афіцыйныя асобы наўмысна ўводзяць у зман, называючы гэтыя наступальныя дзеянні часткай "актыўнай абароны"».

Украінскія войскі ніколі не праводзілі маштабных наступальных аперацый у раёне Аўдзееўкі з пачатку поўнамаштабнага ўварвання Расіі ва Украіну ў 2022 годзе, а Аўдзееўка была вядомай статычнай украінскай абарончай пазіцыяй з 2014 года.

Тым не менш, расійскае кіраўніцтва працягвае ілжыва прадстаўляць аперацыі вакол Аўдзееўкі як "актыўную абарону", што, верагодна, тлумачыць адсутнасць якога-небудзь значнага расійскага прагрэсу вакол Аўдзееўкі, нягледзячы на больш чым два месяцы шырокамаштабных расійскіх нападаў.

На думку спецыялістаў, расійскае ваеннае камандаванне павінна было б пераследаваць выразна пэўную аператыўную мэту, калі б прызнала аперацыі па захопе Аўдзееўкі наступальнымі.

Такім чынам, «актыўная абарона» дазваляе расійскаму вайсковаму кіраўніцтву заяўляць пра поспех да таго часу, пакуль расійскія войскі не дазволяць украінскім сілам дасягнуць значных поспехаў, што з'яўляецца цалкам дасягальнай мэтай, улічваючы, што ўкраінскія войскі не праводзяць і ніколі не праводзілі контрнаступальных аперацый у гэтым раёне.

***

Увечары 1 снежня адбыўся абрыў лініі электраперадачы «Запарожская ЦЭС — Ферасплаўная» з напружаннем 330 кВ, праз якую станцыя атрымлівала энергію ад украінскай энергасістэмы, паведаміў «Энергаатам Украіны».

Падчас паветранай трывогі была абясточаная апошняя лінія «Запарожская АЭС — Дняпроўская» з напружаннем 750 кВ. Здарыўся поўны блэкаўт, і ЗАЭС перайшла на харчаванне ад дызельгенератараў, якія ўключыліся ў аўтаматычным рэжыме, піша «Бі-бі-сі».

«Энергаатам» паведамляе, што самая вялікая пагроза бяспекі была ад 4-га энергаблока, паколькі расійскія войскі, якія акупавалі ЗАЭС, выкарыстоўвалі яго з парушэннем правілаў эксплуатацыі і трымалі ў гарачым стане.

«Абясточванне галоўных цыркуляцыйных помпаў, якія астуджаюць актыўную зону, прыводзіць да пераходу рэактарнай устаноўкі ў рэжым натуральнай цыркуляцыі. Такі рэжым цяжкі для рэактарнай устаноўкі, яго працягласць абмежаваная праектам, і ён можа прывесці да адмовы асноўнага абсталявання энергаблока. Блок патрабуе тэрміновага пераводу ў халодны стан», — гаворыцца ў паведамленні «Энергаатама».

Паведамляецца, што да 7-й раніцы сувязь ЗАЭС з украінскай энергасістэмай была адноўленая.

***

За мінулыя суткі ўкраінскія абаронцы адбілі па 21 атацы на Бахмуцкім і Аўдзееўскім напрамках, адбылося 84 баявыя сутыкненні, гаворыцца ў ранішняй зводцы Генштаба УСУ.

Расійцы нанеслі 2 ракетныя і 30 авіяцыйных удараў, здзейснілі 71 абстрэл з рэактыўных сістэм залпавага агню па пазіцыях украінскіх войскаў і населеных пунктах.

Авіяцыйным ударам падвергліся Серабранскае лясніцтва Луганскай вобласці; Наваміхайлаўка Данецкай вобласці.

Пад артылерыйскім агнём аказаліся больш за 100 населеных пунктаў Сумскай, Харкаўскай, Луганскай, Данецкай, Запарожскай, Днепрапятроўскай, Херсонскай і Мікалаеўскай абласцей.

***

Уначы 2 снежня Паветраныя сілы УСУ знішчылі 10 ударных БпЛА «Shahed-136/131» з 11 запушчаных у межах Адэскай вобласці і кіраваную авіяцыйную ракету «Х-59» на Днепрапятроўшчыне.

«У ноч на 2 снежня 2023 года праціўнік атакаваў адзінаццацю ўдарнымі БПЛА тыпу "Shahed" з мыса Чаўда (Крым) і кіраванай авіяцыйнай ракетай з паветранай прасторы акупаванай Запарожскай вобласці», — паведамляюць УСУ.

***

Два чалавекі загінулі ў выніку расійскіх начных абстрэлаў Херсонскай і Данецкай вобласці (па адным у кожнай вобласці), паведамілі мясцовыя ўлады.

Паводле паведамлення Херсонскай абласной ваеннай адміністрацыі, па вобласці было выпушчана 338 снарадаў з мінамётаў, артылерыі, «Градаў», ПТРК, танкаў, авіяцыі і БПЛА. У выніку адзін чалавек загінуў, яшчэ адзін атрымаў раненні.

У Данецкай вобласці, як паведамляе абласная ваенная адміністрацыя, у выніку абстрэлаў загінуў адзін чалавек у Часавым Яры, яшчэ двое параненыя (у Тарэцку і Багданаўцы).