Генеральны сакратар NATO: Расія з беспрэцэдэнтнай хуткасцю рыхтуецца да новай вайны

Расія з беспрэцэдэнтнай хуткасцю рыхтуецца да новай вайны, і спроба захапіць Еўропу можа стаць толькі прамежкавым этапам на шляху да галоўнай мэты — нападу на ЗША, лічыць генеральны сакратар NATO Марк Рутэ. Адначасова Кітай захопіць Тайвань. Але пакуль РФ загразла ва Украіне. Ідзе 1229-ты дзень вайны Расіі супраць Украіны пры саўдзеле ў агрэсіі рэжыму Аляксандра Лукашэнкі.

За мінулыя суткі ва Украіне зафіксавана 200 баявых сутыкненняў, паведамляе Генштаб УСУ ў ранішняй зводцы 6 ліпеня.

На Пакроўскім кірунку абаронцы Украіны спынілі 59 атак расіян у раёнах Палтаўкі, Малінаўкі, Міралюбаўкі, Луча, Лісоўкі, Шаўчэнка, Разіна, Арэхавага, Дачнага, Удалага, Новасергіеўкі і іншых.

На Ліманскім кірунку расійцы атакавалі 37 разоў, спрабуючы прасунуцца паблізу Новаегораўкі, Грэкаўкі, Карпаўкі, Зялёнай Даліны, Студні, Новага свету, Рэдкадубу, Торскага, Рыгораўкі і іншых.

На Паўночна–Слабажанскім (Курскім) кірунку ўкраінскія абаронцы адбілі 23 атакі расійцаў. На Новапаўлаўскім кірунку сілы расійцы здзейснілі 18 штурмаў у раёнах Запарожжа, Шаўчэнка, Новаполю і іншых.

Па восем атак расіян на кожным адбылося на Купянскім і Гуляйпольскім кірунках. Па сем боесутыкненняў на кожным зафіксавана на Паўднёва-Слабажанскім (Харкаўскім) і Северскім кірунках. Па шэсць баёў на кожным адбылося на Краматорскім і Тарэцкім кірунках.

* * *

У бліжэйшыя месяцы войска РФ будзе спрабаваць акружыць Пакроўск і з захаду абысці ўмацаваную лінію Сіл абароны Украіны ў Данецкай вобласці, прагназуе амерыканскі Інстытут вывучэння вайны (ISW).

Расійскія войскі нядаўна прасунуліся на паўночны ўсход ад Пакроўска і, верагодна, паспрабуюць наступаць далей у кірунку горада Дабраполле. Геалакацыйныя відэаматэрыялы, апублікаваныя 4 ліпеня, сведчаць, што войскі РФ захапілі вёскі Копцева і Шаўчэнкі Першае на паўночны ўсход ад Пакроўска і прасунуліся да паўднёва-ўсходняй ускраіны Разіна.

Таксама эксперты канстатуюць спробы расійцаў прасунуцца на паўночны ўсход ад Пакроўска і засяродзіцца на прасоўванні ўздоўж трасы Т-0504 Пакроўск — Канстанцінаўка.

Расійскае вайсковае камандаванне, імаверна, мае намер выкарыстоўваць выступ паміж Пакроўскім і Тарэцкім для ахопу Пакроўска з паўночнага ўсходу і поўначы або для абыходу ўкраінскіх абарончых пазіцый у Канстанцінаўцы з паўднёвага захаду і захаду.

Расійскае прасоўванне на захад і паўночны захад ад Разіна непасрэдна падтрымлівае спробы ахопу Пакроўска і Мірнаграда — аперацыйнай мэты, якую расійскія сілы пераследуюць на працягу апошніх 18 месяцаў. «ISW яшчэ ў снежні 2024 года прагназаваў, што для ахопу Пакроўска з паўночнага ўсходу расійскім сілам трэба ажыццявіць істотнае прасоўванне ў кірунку Радзінскага (на захад ад Разіна), і апошнія прасоўвання РФ паблізу Разіна адпавядаюць гэтай ацэнцы», — гаворыцца ў справаздачы.

У той жа час, адзначаюць у ISW, з канца 2024 года расійскія войскі адчуваюць складанасці з прасоўваннем на паўднёвы ўсход, поўдзень і паўднёвы захад ад Пакроўска. Са студзеня 2025 года расійцы практычна не змянілі свае пазіцыі ў гэтых раёнах.

* * *

Акрамя таго, адзначаюць у ISW, расійскія войскі дагэтуль не змаглі прарвацца з Тарэцка і рэалізаваць істотныя прасоўванні ў Часавым Яры альбо на поўнач ад вадасховішча Клябан-Бык (на паўночны захад ад Тарэцка). Гэта ўскладніла рэалізацыю плана РФ па аперацыі супраць Канстанцінаўкі (на паўночны захад ад Тарэцка) і ўсёй умацаванай лініі.

У ISW не выключаюць, што камандаванне РФ, імаверна, карэктуе свой план, і можа паспрабаваць стварыць наступ у сельскагаспадарчых раёнах і малых населеных пунктах паміж Дабраполлем і Канстанцінаўкай для абыходу ўмацаванай лініі з захаду.

На думку экспертаў, пакуль незразумела, ці здольная Цэнтральная групоўка войскаў РФ на Пакроўскім кірунку правесці падобную аперацыю сіламі, якія зведалі значнае знясіленне.

«Расійскія войскі, верагодна, дасягаюць крытычнага ўзроўню стомленасці і страт пасля больш за год актыўных наступальных дзеянняў на гэтым кірунку. Такая аперацыя, хутчэй за ўсё, стане шматгадовым працэсам з вялікімі стратамі ў асабовым складзе і павольнымі вынікамі. Зрэшты, расійскае камандаванне неаднаразова дэманстравала гатоўнасць весці менавіта такія зацяжныя кампаніі», — перакананыя ў ISW.

* * *

Расія ў ноч на 6 ліпеня атакавала Украіну 157 дронамі і 4 зенітнымі кіраванымі ракетамі С-300. Сілы супрацьпаветранай абароны абясшкодзілі 117 дронаў: 98 збілі, 19 — лакацыйна страчана/задушана РЭБ.

У Кіеўскай вобласці ў выніку атакі БПЛА пацярпелі тры чалавекі, пашкоджаныя дзве шматпавярхоўкі і прыватныя дамы, знішчаныя 4 гаражныя памяшканні.

Расійцы масіравана атакавалі Нікалаеў дронамі тыпу Shahed131/136. Пад ударам была партовая інфраструктура. У выніку атакі пашкоджаныя склады і электрасеткі, пацярпелых няма.

* * *

* * *

Перад дзяржавамі-чальцамі NATO, перш за ўсё, перад ЗША, стаіць надзвычай сур'ёзны геапалітычны выклік. Расія з беспрэцэдэнтнай хуткасцю рыхтуецца да новай вайны, і спроба захапіць Еўропу можа стаць толькі прамежкавым этапам на шляху да галоўнай мэты — нападу на ЗША. Пра гэта заявіў у інтэрв'ю Тhe New York Times генеральны сакратар NATO Марк Рутэ.

Рутэ адзначыў, што бяспека ЗША залежыць ад сітуацыі ў трох стратэгічна важных рэгіёнах: Арктыцы, Атлантычным акіяне і Еўропе. Ён падкрэсліў, што Арктыка ператварылася ў зону ўплыву Расіі і Кітая, а бяспека Атлантыкі крытычна важная, бо гэта — «наша мора».

«ЗША патрэбная бяспечная Еўропа, таму што менавіта побач знаходзіцца Расія, і яна з неверагоднай хуткасцю пераўзбройваецца — не для таго, каб атакаваць Нарвегію, а каб урэшце здзейсніць напад на ЗША. Калі Арктыка, Атлантыка і Еўропа не будуць бяспечныя, Злучаныя Штаты сутыкнуцца з надзвычайнай праблемай», — падкрэсліў ён.

Рутэ дадаў, што цяперашняя сітуацыя стварае сур'ёзны геапалітычны выклік.

«Расія ажыццяўляе пераўзбраенне з тэмпамі, якія не маюць аналагаў у найноўшай гісторыі. Цяпер яны вырабляюць у тры разы больш боепрыпасаў за тры месяцы, чым усё NATO разам узятае — за год. Расійцы супрацоўнічаюць з Паўночнай Карэяй, Кітаем, Іранам у сваёй несправакаванай агрэсіі супраць Украіны», — сказаў Рутэ.

* * *

Кітай можа прымусіць Расію напасці на краіны NATO, каб адцягнуць увагу блока ад Азіяцка-Ціхаакіянскага рэгіёну. Калі Пекін збярэцца атакаваць Тайвань, ён з вельмі высокай імавернасцю выкарыстоўвае Расію для нападу на Еўропу. Такое меркаванне выказаў у інтэрв'ю Тhe New York Times генеральны сакратар NATO Марк Рутэ.

Рутэ мяркуе, што Кітай можа выкарыстоўваць Расію, каб адцягнуць увагу ЗША ў Еўропе, каб захапіць Тайвань. Рутэ лічыць, што амерыканцам і еўрапейцам не варта быць «наіўнымі ў гэтых адносінах»:

На думку Рутэ, гэты сцэнар з'яўляецца адным з найбольш верагодных у будучыні. Ёсць дзве рэчы, якія трэба зрабіць для стрымлівання расійцаў і кітайцаў. Першая з іх — зрабіць перспектыву атакі на NATO настолькі суіцыдальнай для Крамля, каб ён ніколі не пагадзіўся на гэта пайсці.

«А па-другое, супрацоўнічаць з Інда-Ціхаакіянскім рэгіёнам — тое, што прэзідэнт Трамп вельмі актыўна прапагандуе. У нас ёсць цесная ўзаемасувязь, сумесная праца ў абароннай прамысловасці, інавацыях паміж NATO і Інда-Ціхаакіянскім рэгіёнам», — дадаў генсек NATO.

* * *

Асцярогі, што амерыканскія запасы зброі нібыта занадта знясіленыя — прычына, па якой міністр абароны ЗША Піт Хегсет спыніў ўзгодненыя раней пастаўкі ваеннай дапамогі Украіне — неабгрунтаваныя. Так лічаць дэмакраты ў Кангрэсе, піша The Guardian.

Адзначаецца, што спыніў пастаўкі зенітных ракет і высокадакладных боепрыпасаў ва Украіну асабіста Хегсет, галоўны абаронны дарадца Дональда Трампа і былы вядучы Fox News. «Гэта ўжо трэцяя блакіроўка паставак, і гэтым разам — праз нібыта страх празмернага скарачэння запасаў ЗША», — паказвае выданне.

У Пентагоне патлумачылі, што рашэнне было прынятае, каб паставіць інтарэсы ЗША ў аснову пасля перагляду аб'ёмаў вайсковай дапамогі іншым краінам.

Дэмакраты настойваюць: няма ніякіх доказаў дэфіцыту. «Нашы запасы не менш, чым былі за ўвесь час вайны ва Украіне за апошнія тры з паловай гады», — сказаў журналістам дэмакрат Адам Сміт, вядучы член Камітэта па пытаннях Узброеных Сіл Палаты прадстаўнікоў.

* * *

На фоне цяжкіх страт на фронце Расія амаль цалкам засакрэціла дэмаграфічную статыстыку, паведамляе расійскі навінавы праект Агенцтва.Навіны.

Расстат апублікаваў 2 ліпеня чарговы зборнік статыстычнай інфармацыі, у якім не аказалася аднаго з найважнейшых раздзелаў — «Дэмаграфія». Расійская ўлада схавала амаль усю інфармацыю пра насельніцтва, акрамя двух паказчыкаў: сумарны каэфіцыент нараджальнасці па рэгіёнах і сумарны каэфіцыент трэціх і наступных дзяцей.

Цяпер у Расіі засакрэчаныя такія базавыя статыстычныя даныя як:

• колькасць пастаяннага насельніцтва,
• колькасць народжаных,
• колькасць памерлых,
• колькасць шлюбаў і разводаў,
• колькасць імігрантаў.

У бліжэйшы час павінен быць апублікаваны рэгулярны бюлетэнь «натуральны рух насельніцтва», але, падобна, яго таксама засакрэцяць.