Сіла слова. Літва заявіла, што цалкам спыніла ўвоз санкцыйнай драўніны з Беларусі

Эканоміка

Мытная служба Літвы заявіла, што ёй удалося цалкам спыніць паступленне ў краіну драўніны і прадукцыі дрэваапрацоўкі беларускага і расійскага паходжання пад выглядам тавараў з Казахстана і Кыргызстана ў абыход санкцый ЕС.

Фота з bel-news.by

Фота з bel-news.by


«Узмацненне мытнага кантролю дало выдатныя вынікі», — адзначае ведамства.

Сумніўныя пастаўкі ў Літву пачаліся пасля таго, як у сакавіку 2022-га, пасля пачатку вайны, Еўрасаюз забараніў экспарт драўнянай прадукцыі з Беларусі. Неўзабаве пастаўкі дошак, пелет, брыкетаў і фанеры з зусім не лясістых Казахстана і Кыргызстана выраслі ў дзясяткі і нават тысячы разоў. У канцы снежня «Беларускі расследавальніцкі цэнтр» апублікаваў расследаванне, дзе даказаў, што такім чынам абыходзяць санкцыі беларускія вытворцы. У Літве прынялі меры.


«У мэтах прадухілення такіх злоўжыванняў у канцы мінулага года мытныя органы Літвы зрабілі больш жорсткім кантроль за такімі таварамі, узмацніўшы праверку прадстаўленых дакументаў і маршрутаў перавозкі на пунктах памежнага кантролю з Беларуссю і Калінінградскай вобласцю Расіі, каб пераканацца, што тавары, якія ўвозяцца на мытную тэрыторыю ЕС, сапраўды вязуцца з трэцяй краіны, а не з Расіі ці Беларусі», — гаворыцца ў паведамленні мытнай службы.

Акрамя дакументаў, якія пацвярджаюць вываз тавараў з трэцяй краіны, мытнікі сталі патрабаваць у перавозчыкаў пацвярджэнне паходжання тавару, уключаючы інфармацыю аб вытворцу і месцы вытворчасці. Пры адной з праверак аказалася, што па адрасе «месца вытворчасці» была жылая шматпавярхоўка. У шэрагу выпадкаў у кіроўцаў знаходзілі некалькі камплектаў дакументаў: частка была для беларускай мытні, а частка — для літоўскай.

У выпадку выяўлення нестыковак, невыканання патрабаванняў, непацверджання паходжання тавараў драўніну і прадукцыю дрэваапрацоўкі на тэрыторыю ЕС не прапускалі.

Усяго за першы квартал 2023 года мытная служба Літвы адмовіла ў працэдурах імпарту, экспарту і транзіту амаль 9 тысяч разоў, тады як летась з моманту пачатку вайны адмоваў было 27 тысяч. Цяпер вядзецца амаль 100 расследаванняў магчымых абыходаў санкцый, за іх невыкананне завялі 27 адміністрацыйных спраў.

Нагадаем, некалькі дзён таму «Беларускі расследавальніцкі цэнтр» апублікаваў новыя факты пра тое, як беларускія дрэваапрацоўчыя кампаніі дагэтуль абыходзяць санкцыі і пастаўляюць сваю прадукцыю ў ЕС.